Tang el ngara Kristo

A President Dallin H. Oaks a kmo, chelechal sils eng Basqua el Sandei, e luchelel a Chedaol Sandei, lolterkokl er sel mle omerolel a Rubak el mo soiiseb e ra Jerusalem, me Ngii el mlo cheuarem ra Gethsemane ma kodall ra kerus ra uriul e ra edei klebesei, ma klebokel Lokisel ra Kodall e ra Basqua el Sandei. Mei mede rokui el tibir el diak ke dobes ra Kristo e lultekangel el mlo chouarm el kired.¹ E mei melak ke dobes ersel mui el deurreng el deluut elmo melchesuar ra Basqua sel bo dolbedebek er Ngii el mlo mesisiich e ra kodall mesel sengk el mora re bek el chad el lemult elmo ngar.

Sel kesus ruchei ra ikel longarem ma bol mekerus longiil er Ngii, e a Jesus a mlo benterir ra Basqua lomengur tirkel Teruich ma terung el Apostol er Ngii. Ngorokiolel tial Chedaol Belsoil, me lultab ra chedaol Nglunguuch el kirir a rechad, a Jesus ulengit ra Demal lokiu a ikakid el tekoi: “Chedaol Demak, mngiteterir lekor kau (tirkal Apostol er ngak) el bileskak, me bol tang,el uai kid.”²

Meng, ngara delmedemek el reng, e a Osobel a uldersii a ongtil el moldimukl er tirkel loumerang:

“E diak di kululuuch el kirir tirkang el lemerkong, me a dirrek el tirkel mo oumerang er ngak lokiu a tekingir;

“Me tir e rokui bol tang; el di uaikau, e Chedam, el lobengkek, me ngak obengkem, me tir el dirrek bol tang lobengked.”³

A mo tang a blechoel medekduum el tekoi e ra ebangkelio ra Jesus Kristo ma ikel delongelel a Dios ma rengelekel. Ngokiu omenguul el mora beluu ra Zion er sera le temel a Enoch, eng mle tekoi el kmo “te mle tang a rengrir ma uldesuir.”⁴ Me tirkel mle kot el Santo ersel luchlel a Ikelesia ra Jesus Kristo, ea Beches el Renged a melekoi el kmo, “Ng klou lobdois er tir el lulemerang a mle tang a rengrir e mle tang a bedengir.”⁵

Me chelechal kuk temed, ea Rubak a mellach, “Ak melekoi er kemiu, bol tang a rengmiu; e alsekum eng diak eng diak kudengelkemiu.”⁶ A tara a ikel moktek ea Rubak a uluuchais ra uchul e tirkel kot el Santo ra Missouri a mlo diak el ketmeklii a basio ra Zion a tir “el dimlak el tang a rengrir lotireklii sel keltalreng el lusbechall loltirakl ersel llach e ra rengedel a celestial.”⁷

Mesel sekum a Dios a mo kiei ra rengrir ma uldesiur a rechad, e temo okodongall el kmo “te tang, el ngelekel a Kristo.”⁸

Me sera le bekiis ra kodall a Osobel el bol duum er tirkel chad e ra ngaramong ra Babier ra Mormon, e Ngii a mle bleketakl el diak el kengei el ua ngaramong el kmo ngarngii a uldikel e ra delongelir a rechad el kirel a techolbchelid ma bebil ra tekoi. Ngii a milelach:

“Ngdiak el kirel ngarngii a klautitekangel e ra delongeliu, el uai chelechang; malechub el ngarngii a klautitekangel ra delongeliu el kirel a ikel belkul a osisecheklek, el uai chelechang.

“E klemerang, klemerang mak kmal subedemiu, ngkel loba reng ra uldikel a diak kudengelii, ngdi ngara diablong, el ngii a demerir a rumtok.”⁹

Me tial kmal mlamo klou el nglemuu er ngii el beluulechad, eng mekerang a keltal reng a le meketmokl, tokuni ra elsel a Ikelesia el kired e lobang a “imol Rubak, imol klaumerang, imol techolebchelid”?¹⁰A Paulus a meskid a olechotel:

“Tirkel nga er kemiu el mla metecholb er a Kristo a mla nguu a Kristo.

“Ngdiak a chad ra Iudea ma Greek, ngdiak a kelbus ma mimokl, ngdiak a sechal ma redil: le kom rokui eldi imong ra Kristo.”¹¹

Kede kmal limis el kakerous esel bebil ra taem e kede kebosech ra uldasu elmo diak el sebeched elmo tang a rengud ra ngidil tekoi malechub eng ngokiu a ngidil ngakl. Ngdi imong a de borngii el Jesus Kristo eng sebeched elmo tang.

Sel mo tang e ra Kristo a dubech ra dertang ma tang—me kede omuchel er kid. Kede chad el betok a teleteled ra tech ma reng e a bebil ra taem eng chetiteuokel a klechad er kid. A Paulus a ulechotii:

“Leng dmeu a renguk e ra llechul a Dios el kirel sel klechad e ra chad;

“Ngdi ak mesang a tara llach el [kirel] a blebelel [a bedengek], lou mekemad lomtok e ra uldesuek, e obekak elmo melechet er ngak el morsel lechul a klengit el seluk e ra ikal blebelek.”¹²

A Jesus meng dirrek el blebelel a tech ma reng. Ngii meng mlora ongarem; Ngii a ungil medengei; Ngii a sebechel ngosukid el toketek a ikel ngara rengud.¹³ Ma leuaisei, esel dosiik ersel llomes ma krasia e ra Kristo, e kede melasem el msa reng er kid ma Chedaol Reng—a klisiich me bol mesisiich e ra bedenged. E sel le borngii a ngesengesed, ea Kristo, lokiu Tngakireng er Ngii, a mla meskid sel sengk e ra ouchel el reng mesel techall el lmuut el lomuchel.

Alsekum e kede derta el chad el “nguu a Kristo,” me dedak eng sebechel lurunguled elmo tang, el ua Paulus ra lolekoi, “te bedengel a Kristo.”¹⁴ Sel “nguu a Kristo” a ultebechel luldimukl el meruul ra llechul ersel “kot e klou el llach”¹⁵ elmo kot el klou el llechud, e alsekum e kede betik a rengud ra Dios, e kede mengeluolu a llechul.¹⁶

Keltal reng lobengterir a rodam ma rodos er kid e ra bedengel a Kristo a mukeroul sel doltirakl ersel longerung el llach—el chelidoid e ulech el morsel kot—elmo betik a rengud ra bebil el di uai kid.¹⁷ Mak di omdasu ra lmuut el klebechel el kltal reng a de nguu alsekum e kede oltirakl e ra Osobel ersel ngarbab e chedaol tekingel kirel tial longerung el llach—elmo kau beltik el reng ra diak el dil delongeled e bai di mo uai Ngii el betik a rengul er kid.¹⁸ Mesel cherrengelel, eng kirel “bekl el chad el kerekikl e ra klengar e ra kmeed er ngii el chad, e meruul a rokui el tekoi el klebechel osengel el kirel sel klebkelel a Dios.”¹⁹

A President Marion G. Romney, el mle counselor ra Kot el Presidency, a milsaod el kmong mekerang a domsau a budech ma kltal reng me lolemolm, a dilu el kmo:

“Alsekum a imol chad, a otireklii a Satan, meng mui ra chelitechetul a tech, eng di ngii el lou mekemad er ngii. Alsekum me te terung el lotireklii ngil rael, e tedi tir el lou mekemad er tir e kakeuad e ra delongelir. Alsekum e te betok el lotireklii ngil rael, eng beluu el [merimt] e ra redechel a klou el ringel ma uldikel. Alsekum e te merredel ra beluu el lotireklii ngil rael, eng klou luldikel e ra beluulechad.”

A President Romney melmolem: “Ma chelitechetul a tech a ngarngii a blerek lomengetmeklel, meng dirrek el uaisei el mora ebangkelio ra budech. Alsekum a imol chad a kiei lotireklii, eng budech a klengar er ngii. Alsekum a terul chad a kiei lotireklii, eng ngarngii a budech ra klengar er tir me a delongelir. Alsekum ea rechad a kiei lotireklii, eng beluu el ngara budech. Sel sekum eng betok el beluu e loldeu a rengrir el ngara ikel redechel a Reng el menguteling a tekingel a beluulechad, eng seikid, ngdi tal tiakid, eng sebechel a ikel cherdechel a mekemad el meterob, ma banderang e ra odechelakl a meriou. … (Mesa Alfred Lord Tennyson, “Locksley Hall,” The Complete Poetical Works of Tennyson, ed. W. J. Rolfe, Bong Boston, Houghton–Mifflin Co., 1898, p. 93, lines 27–28.)”²⁰

Mesel de “nguu a Kristo,” eng mo sebeched el sumechokl a klekakerous er kid, ma de kebosech er ngii el tekoi, ma mondelnged. A kora uldingerongel el lokesiu e ra mlo kebosech el luldasu el milsumech a de betik er ngii ra reksii er kid ra Ikelesia. A Elder Brigham Henry Roberts (eldi dodengelii el B. H. Roberts), a milchell e ra England sera 1857, a milesiou el chedal a Kot el Chelechad e ra Rukeuid—el kid er chelechal taem e domekedong er ngii el Presidency e ra Rukeuid. A Elder Roberts a mle meduch e meses el mesebechakl e ra mla moluut el ebangkelio me a Ikelesia e ra ikel bebil ra mle metacherbesul el taem.

Sera 1895, e tial, lomesiungel a Elder Roberts e ra Ikelesia a mlo melmesim ra klautok. b. A H. a milngilt el lomtechei ra beluu el ngara cheldebechel el mileketek ersel luchetemel a llach e ra Utah sera le bol lileakl. Nguriul, e ngii a mlo soal mo remuret elmo ra Congress e ra Merikel engdi dimlak el sebedeterir malechub el ngiluu a kengei e ra Kot el Presidency. President Joseph F. Smith, a counselor er a First Presidency, censured B. H. er sel mlo chelitechut er a miting er a general priesthood. A Elder Roberts a mlo mechitechut e ra sengkio e milchesuar el kmo tiang a mle uchul a ikel tekingel a President Smith. Ng mlo melechedech ra re merredel e ra Ikelesia ra ikel bebil ra tekoi el buai ma ker ma nger. Ng mlo chetil el mesiou ra Ikelesia. Ngara kemanget el cheldecheduch ersel Templo ra Salt Lake lobengterir a rechedal a Kot el Presidency ma Chelechad ra re Teruich ma terung, ea B. H. a millemolm el tekangel el kirel a loumerang er ngii el tekoi. Nguriul, ea “President [Wilford] Woodruff a milsang a [Elder Roberts] a edei el sandei el lmuut elmo ungil lomes e ra deruchelel. Alsekum meng diak el bol lou uchel, e te mo ngubetii ra Rokuid.”²¹

Ma mlo ongingil ra mle berotel el longdibel lobengterir a re Apostol el Heber J. Grant ma Francis Lyman, ea B. H. a diak el metekoi, engdi beltik el reng ma Chedaol Reng a silumech a tekoi meng mlo ungil. Ng mlo merael iousech e ra medal. Tirkal terul Apostol a mlo sebecherir el longer a bebil ra leues el mle ngesengesel ma telemelel a tekoi el mengesang ra uldesuel a B.  H. me tir a mlo remei lulebang a tmolech e longit me bol kausubes. A tutau ra bol kukuk, uriul ra kemanget el nglunguuch, ea Elder Roberts a uldureklii a babier el mora Elders Grant ma Lyman el kmong keltmokl el lmuut elmo obenterir a rodam er ngii.²²

Me sera le kaseues ngii ma Kot el Presidency, ea Elder Roberts a diluu el kmo, “Ak mlora Rubak e ngiIuu a llomes ma ulekrael lokiu a Reng er Ngii elmo orrenges ra rubang a ngerachel e ra Dios.”²³ Semeriar leng beltik el reng er ngii el mora Dios, a B. H. Roberts a millemolm loumerang e mesisiich el mengeteklel a Ikelesia el molmuut e ra kodelel.²⁴

Kede dirrek el mesang er tial lokesiu el kmo a kltal reng a diak el belkul a kongei el kmo a re bek el chad a kirir meruul a ikel sorir malechub e te di ngara llemeltir. Ngdiak el sebeched elmo tang a lak kede bek el chad el remuul a rengud el dimo tang a moktek er kid. Ng belkul a kmo, el ua ikel dilung a B. H. Roberts, kongei lorenges ra rubang a ngerachel ra Dios. Kede kakerous el chedal a bedengel a Kristo, el mengetmokl a kakerous el lureor ra kakerous el taem—a dingad, a chelsul a medad, a btelud, a imad, a ochid—engdi kede rokui eldi tang a bedenged.²⁵ “Me ng mo diak le kautok a ikel kakerous el klekedellel a bedenged; e bai mo dmak el kaukerreu.”²⁶

A kltal reng a diak el kirel losisiu, ngdi bai kirel ta besul. Ng sebeched el odak a rengud el mo tang el ngara beltikerreng, mo tang er a klaumerang me a olisechakl, e oyeng a kakerous el team, omtok a kakerous el tekoi er a balatiks, mesaod a tekoi el soad el ngoriakl er ngii el ngara ungil omerollel, ma muut el betok el tekoi. Eng di ng diak el kired el mo kautok loba ngasecherreng or klengit el reng el mo er a tang ma tang. Ng millekoi Osobel:

“E Klemerang, klemerang mak kmal subedemiu, ngikel loba reng er a ultok a diak el chedak, ng chedal a diablong, el ngii a chedam er a ultok, e ngii a omdui a rengrir a rechad el mo kautok loba ngasechereng, el mo er a ta me a tang.

“Mesang, tiang a diak el llechuk, el mengitikaik a reng ra rechad loba ngasech el reng, e kautok ra delongelir; engdi tiakid a llechuk, a ikaikid lomeruul a kirel mo diak.”²⁷

A tal rak ra memongm ea President Russell M. Nelson a ulengit er kid lolab aikal tekoi: “Diak a ta er kid el sebechel omtebechel a beluu me a teletelir ar bebil er a rechad mo lmuut er a rechedal a telungalek er kid. Ng di kid a sebeched el metebechelid. A kulekoi er ngii er chelechal sils, e rodam me a rodos, a mo torrob a uldikel el ngararengmiu, me arekeblimiu, me a ngaraklengar kemiu. Mdakl a rokui el teletael el ngii a mo melemall er a rebebil—el ngii el teletael a ngasechereng, a lechub eng mesechesuched el cheldecheduch, a lechub eng klsibereng el kirel a chad el blechoel mengerusii er kau. Eng di, a Osobel a dirrek el mla dmu er kid el mo odersii a bita lotenged,1e mo oubeltikereng el mo er a rechereued, e meluluuch el kirir tirkel mekngit a blekerdelir el mei er kid.²

Ak lemuut el melekoi el kmo ngdi ngarkid e okiu er kid loltirakl ra Jesus Kristo eng sebechel a urungulled el mo tang—tang ra reng, tang ra keblid, tang ra Ikelesia, e merael mo tal Zion, esel ngarbab ra rorkui el tekoi, a mo tang lobengkel a Demad ma Ngalk ma Chedaol Reng.

Ak lmuut el mora ikel dilubech ersel Chedaol Sandei me a blol mesisiich er ngii a Osebeled. Sel Lokisel a Jesus Kristo a bleketakl el sioning ersel Chedolel me Ngii el mlo mesisiich ra rokui el tekoi. A Okisel ra kodall a bleketakl el sioning el kmo, kede llechotel elmo er Ngii e lokiu a telbiil, e kid meng sebeched elmo mesisiich ra rokui el tekoi e di mo tang. A Okisel ra kodall a bleketakl el sioning el kmo ngokiu Ngii, eng diak a kodall ma diak a ulebengelel klengar a klemerang.

Chelechal tutau, a kumeketakl e sioning el kirel Ngii a meral Milkiis e ra Kodall ma ikel rokui el melutk el kirel, loba ngklel a Jesus Kristo, Amen.