Epwe Watte Om Pwapwa
Iei ua pesei kemi oupwe aea tipachem, fengen me kapasen pwarata, me feino fiti misineri.
Pwi me fefinei kana, ai memef ikenai ra usun ionfengenin Israel, met Preseten Russell M. Nelson a aita ngeni “ewe angang mi fis ikenai mi kon auchea won fonufan. Ese pwan wor met mi nonno watten, ese pwan wor met mi nonno auchean, ese pwan wor met mi nonno ningan.”1
Ewe ionfengenin ina ewe esisin pwe “auchean ekkewe ngun mi auchea fan mesan Kot.”2 Mi chok fokkun mecheres. Sia ionfengeni noun Kot semerit non ekkei ranin soponon pwe “feioch epwe ninitiw won mokurer”3 me ekkewe pwon ren “pisekisekin nang.”4 Ika sipwe ionfengeni Israel mi namwot epwe wor misineri—chommong seni mi wor ikenai.5 Ikenai ua mochen poraus ngeni ekkewe chinnap non ewe Mwichifen ra tongeni fiti angangen misineri. Ami mi auchea ngeni ewe Samon. Mi namwot oupwe feino New York me Chicago, Australia me Africa, Thailand me Mexico, me ekis meinisin nefiner.
Sipwe niwin ngeni ewe ier 2015. Ua keran kokko ngeni wisei non ewe Mwichen Engon me Ruemon Aposel. Eu ekkewe wis mi fakkun murinno ren Aposel pwe aupwe finata ia ekkewe misineri repwe feino ia. Ua fen fiti ei wis nupwen ngang emon ekkewe Fik,6 nge ren wisei we Aposel, ua wesen mefi choun ewe angang. Ua poputa ren ai iotek me finata misineri repwe feino ekis meinisin won fonufan. Ua sopweno ren misineri ekkewe mi pupunu. Mi chok work 10 won ewe taropwe. Ese chommong. Mairu, ua eisini chienei a angang ren ekkewe misineri, “Fitemon mi namwot ika sipwe apwonueta ekkewe wis mi namwot?”
A ponueni, “300.”
Ena atun a chok nom rei: 10 chon pupunu nge 300 wis.
President Russell M. Nelson a pesei chon pupunu repwe “fotopukutiw me eisini Semach won Nang ika inet ewe atun mi pung ar repwe fori angangen misineri.”7 Ren meinisin mi namwot, a apasa, “ mochen ne aninis epwe ina met mi wesen auchea.”8
Usun met mi mak non ekkewe pukefel, “Ika mi wor om mochen aninis ngeni Kot kopwe kokko ngeni ewe angang.”9 Ena angang a nongonong won ewe annukun kini uwaan. Sia anneani non John, “Ir ekkewe ra fotuki me ewe a kini uwaan repwe pwapwa fengen.”10
Ua fen kuna ewe annukun kini uwaan a fis non ai famili.
Fite ier a no ua no churi ai famili, nupwen ewe pisop a eisiniei ika upwe asopwano ewe mwichen sakramen.11 Nupwen ua totiw me won ewe rong, emon fefin a feito fiti noun kewe fumon me ereniei pwe itan Sister Rebecca Guzman.
A eis, “Elder Rasband, en mi sinei Rulon me Verda Rasband?”
Ua fakkun pwapwa me ponueni, “Ir inei me semei.”
Sia tongeni kuna ian ei epwe feinno ian. Rebecca a tipeu upwe awewe ei poraus, me i me an famili ir mi nom non ei mwich ikenai.12
Inei me semei, Elder Rulon me Sister Verda Rasband, ir ra angangen misineri chinnap non Fort Lauderdale Florida Mission.13 Ir ra afanafan fetan me ren an Kot emwen ra fichifich won asamwen imwen Rebecca. I a emon chok serafo me a sani konun ewe famili Osmond, akkaewin chienei Donny-ion mi momot rech ikenai.14 I a ausening ngeni ar kewe interfiu me kaeo pwe ir memper non Ewe Mwichefenin Jises Kraist ren Aramas mi Pin non Fansoun Soponon. I a mefi pwe ir mi sokkono, me a ekieki pwe meni ina ar namanam. Rebecca a anneani me kaeo usun ewe Mwichefen non library non an sukun. Iwe, nupwen ruemon pupunu ra feito me fichifich won ewe asam me apasa pwe ir misineri seni ewe Mwichefen, i a mairu.
“Inei a ereniei upwe asureno,” Rebecca a makei, “nge netipei a apasa, ‘Apw.’ Ua nenenong ne meser, me ua mefi ar tong. Ua chechemeni ai pwapwa me ai kechiw ren non ennetin netipei.”15
Rebecca a etiwa ir, me inei me semei ra afanafana poraus ngeni I me pwiin kewe ruemon, me, inan we, ika mo ese mochen.
Rebecca a awewe ngeniei: “Inom me Semom ra fakkun murinno ne awewei am kewe kapas eis. Ua chiwen kuna meser usun ir mi uren saram. Aua turufi inom nupwen a no iteitan, me fakkun achocho ne anisi inei epwe mefi kinamwe me a sufoniti. Semom a nengenikem ren saram non mesan nupwen a aitikem usun Jises Kraist. A achocho pwe semei epwe pwan fitikem me ren ekis fansoun i a chiechi ngeni i. Semei emon sou kuk non eu nenien mongo me a poputa kuku anen inom me semom kewe, a pwan fori anan semom a sani, key lime pie.”16
Nupwen Elder me Sister Rasband ra eisini Rebecca me an famili repwe aneani ewe Puken Mormon, Rebecca a aneani non nimu ran. I a mochen muttir ne papatais, nge chon ewe famili resamo monnota. Mwirin ruanu maram, Rebecca a peser epwe papatais me choni ewe Mwichefen mi ennet. A chechemeni, “Ekis meinisin non inisi a sinei pwe mi ennet.”17 Won April 5, 1979, misineri ra papataisi Rebecca ewe a 19 ierin, inan me ruemon pwiin kewe. Semei i emon chon kuna non ewe mwichen papatais.
Nupwen ua churi Rebecca me an famili non fan, aua fichi sasing ren am me an famili. Ua uwei ngeni neimw ren inei we chinnap, me a kamoch ewe sasing ngeni fan mwarin. A apasa ngeniei, “Ronnie, iei eu ran mi ennetin pwapwa non unusan manauei.”
An inei ponu a efisi ei kapas eis ngeni memper mi chinnap: “Met oua fori non ei kinikinin manauemi?” Mi chommong aanen ekkewe misineri chinnap ra tongeni fori met ekkoch resap tongeni. Ami eu watten pisekin fofor murinno, sinenap non ewe Mwichifen, me monnot oupwe pesei me tumunu noun Kot kewe.
Ekkoch meni oua ekieki: “Nge met ren ai no seni noun nei kewe? Ausap nom ren ekkewe minen apwapwa, ranin uputiw, chienem, pwan noum kewe maan.” Ika ua eisini inei pwata i me Semei ra no misineri, ua sinei pwe epwe era: “Mi wor noun nei kewe. Ua mochen repwe sinei pwe aua achocho ne aninis non angangen misineri, aua mochen am kewe newo repwe sinei, pwe aua feioch, aua ennetin feioch.”
Ren ai churi misineri non unusan fonfufan, ua kuna ewe angang mi amwarar ren ekkewe misineri chinnap. Mi fat pwe ir mi pwapwa non ar fori “netipen ewe Samon” me achocho non “an ewe Samon angang.”18
Ren ekkoch ami, meni epwe fite ngeru, feino ne misineri non pwan fonu won ewe fonufan epwe ina ewe neni mi pung.19 Ren ekkoch, aninis non neniemi meni epwe och ngenikemi. Pokiten pekin inis me ekis samau, mi wor ekkoch resap tongeni misineri. Sia weweiti ekei osukosuk, me ita ai mochen pwe oupwe kutta aanen anisi ekkewe ra fiti misineri. Tapweno an ewe soufous aurour me iotek pwe oupwe sinei met ewe Samon a mochen kopwe fori.
Nenien angangen misineri ra mochen ami aninis. President Nelson a poraus usun misineri chinnap, “Ra pochokkun non ngunur, mirit me ra mochen angang.”20
Non ewe angangen misineri, mi chommong tufich: meni oupwe aninis non ofis ika tempel, apochokkuna misineri minafo, anisi branch mi kukkun, anisi chon kaeo ren ar newo, osukuna seminary ika institute, fori aninisoch, anisi ekkewe ra kutta angang, ika non ekkewe atake an ewe Mwichifen. Ekkewe aninis oupwe sinei ifa usun oua tongeni aninis, met sokkun misin oupwe sani, ia ra mochen aninis ia, me ifa usun sipwe ammonata a nom won website “Senior Missionary.”21 Oua tongeni fos ngeni noumi pisop ika branch president.
Ua kokkori chommong misineri chinnap me kuna pwe ewe Saramen Kraist a uren inisir me meser.22 Nupwen ra niwin, ra awewei och fefeita ngeni ewe Samon me fengen non ar apupunu, me mefien ewe Ngun mi Fel a nitiw wor, me ra sinei pwe ir mi anisi ewe Samon.23 Ion esap mochen ena?
Angangen misineri epwe eu sopun non manauemi mi fakkun murinno. Iten ewe sopun epwe “Ai Samon a Mochen ai Aninis.”24 Oupwe ekis niuokus; nge, manamanen ewe Ngun mi Fel epwe echimwakemi.
Semei me inei me fite ngerou misineri mi pupunu ekkewe ra niwin me ra kuna pwapwa non angangen misineri. Ewe Samon a apasa non ekkewe pukefel, “Ika sipwe angang unusen manauach ren ach aiti aramas usun aier, me sia chok emweni emon chok ngeni I, sipwe ennetin pwapwa ren i non muun Seman we!”25
Isaiah a ngeni kich eu awewe usun an emon angang non ewe nenien “atake.” Pukefel a aitikich “ewe atake ina ewe fonufan.”26 Ei emon soufosun noom a makei, “Oupwe touu seni Babylon non pwapwa. Repwe emwenikemiu seni ewe teninimw non kinamwe. Ekkewe chuk me kukkun chuk repwe ne kokkon o ekkewe ira repwe ne puchorun pwapwa.”27 Ewe chuk, paan, kuranto, me ira ra usun missin president, bisop, meinap, memper, me ekkewe ra kutta ewe enlet nge “resap sinei ian repwe kuna me ian.”28 Ir repwe kapas pwarata usun chinnap missionari an akasiwini ar kapasan pwarata ren Ach Chon Amanau me Achesefan, Jises Kraist.
Non wisei pwe emon Aposel noun ewe Samon Jises Kraist, ua tingor oupwe angangen misineri non ionfengenin Israel me meni angang sefan. Mi namwot ami aninis-mi namwot. Aua kinisou ngeni ami chinnap ren ekkewe manau murinno me ami nenien appiru non imwemi, wart me steik. Iei ua pesei kemi oupwe aea tipachem, fengen me kapasen pwarata, me feino fiti misineri. Ua iotek pwe nupwe ua niwin ne finata wisan ekkewe misineri mi pupunu epwe wor fite puku ami oua pwapwaiti ami oupwe misineri.
Ua pwan pwon pwe ika oupwe aninis, oupwe mefi ewe tongen ewe Samon non manauemi, oupwe sinei I, I epwe sineikemi, me “epwe watte ami pwapwa.”29 Ami angang murinno ngeni Jises Kraist epwe efeiochu ami famili, noun noumi kewe, me noun noun noumi kewe. “Kinamwe, me tong [epwe] chommongono”30 non manauer ren ier epwe feito. Ua pwon. Non iten Jises Kraist, amen.