Ewe Noun Mi Mwanecheno me ewe An Ngeni Imw

A fen afat seni ekkoch ewe mwurinon mochomochen tutunap ra rongorong.¹ Pokiten a fen chiaku non ngoroun kapas non unusen fonufan, a unusen tufich pwe fansoun ekewe ruu ngorou ier annea seni ewe fansoun uputiwen Jises, ewe akar ese mo tuputiw nge ese fiti ewe porous ra poraus ussun ekis iwe me non ewe fonufan.

A fen wor porousan meren Jises Kraist, ach Chon Amanau me Chon Angasano, ewe a feito ngeni fonufan “epwe amanaua ekkewe mi mwanecheno.”² A poputani ren ekkei mecheresin kapas: “Emon mwan mi wor ruemon noun at.”³

Mwitir chok sia sinei usun eu porous mi aweires. Emon noun kewe⁴ a uereni seman pwe a mochen tou seni imwer ewe. A mochen epwe pusin nemeni an fansoun. A mochen suseni ewe oreni me met a kaeo seni seman me inan. A tingor epwe angei wisan seni ewe tufich—iei.⁵

Ka tongeni ekieki met seman we epwe mefi nupwen a rong ei? Nupwen a kuna pwe met noun we at a kon mochen seni meinisin pwe epwe tou seni ewe famini me esap chiwen niwin sefan?

Ewe at meni epwe fen mefi ew apwapwan kokkot me meseik. Ren fansoun nakatam, a imuno won pusin an. Ngasano seni kewe nongonong me annukun ewe orenien an ierin onuon, I a tongeni pusin fori an mochen ese pwan chiwen wor ourouran seni seman me inan. Ese wor netipengaw. A tongeni epwe ketiw me non ewe neni me uta won pusin an kokkot.

A tori non eu neni towaw, a mwitir ne kunokun chienan me poputa ne manaueni ewe manau a mochen. A fokkun kefich me ren chommong, pwe a onusmwanieno noun mwoni. Chiechian kewe minefo—ra feiochuni an kewe tufich—rese opungu. Ra apwapwai, emweira, me forngeni tipan.⁶

Ika iwe mi wor nenien kunou won fon non ena fansoun, ewer ina epwe amasoua ekkewe peich ngeni sasing mi ameseik ren takirikirin chienan: #Manaunpwapwa! #Unusenpwapwa! #Itaururunupwechokforieimenomw!

Nge ewe apwapwa ese tam fansoun—ese fokkun. Ruu mettoch a fis: ewin, a iteno noun mwoni, me oruwan, ewe nengita a tori ewe fonu.⁷

Nupwen ewe osukosuk a wattena, a noninen. Ewe ese kukupach, a pwarano an chok fokkun akapwapwai ne onusano noun mwoni iei ese chiwen tongeni awora ew anan, sisap fen pano won ew neni an epwe nom ie. Ifa usun an epwe manau?

Amen kirekiroch ngeni chienan kewe—repwe ir mi fen anisi iei? Ua tongeni kuna an tingor ren ekis aninis—ren chok iei—tori an epwe tongeni utta sefan won an.

Ekkewe pukefel ra aiti kich, “Ese wor emon epwe ngeni I.”⁸

A nochongaw fan iten epwe manau, a kuna emon chon atake ewe a mut ngeni an epwe ammongo pik.⁹

Iei a fokkun echik, ese wor an tufich me alamon, ewe anuwon a ekieki ifa ussun ekkewe mettoch ra fokkun fen ngaweno, wesewesen ngaweno.

Esap chok ponun nukan mine a aweiresi. Pwe eu ngun a pon. A fokkun ekieki pwe epwe fori an mochenin ei fonufan epwe fori an epwe pwapwa, pwe annukun manau ew appet ngeni ena pwapwa. Iei a weweno. Me pwan, met ew niwin epwe moni fanitan ena wewe!¹⁰

Nupwen ewe echik non pekin inis me ngun a napeno, an ekiek a niwin ngeni seman we. Epwe fen mochen anisi i mwirin mettoch meinisin a fen fis? Pwan mwo ewe tipetekison an noun saman kewe chon angang a wor ener ar repwe mongo me imwer seni ewe monumon.

Nge niwin ngeni saman we?

Ese Tongeni!

A pwarata ngeni sapun we pwe a onusmwanieno tufichin?

Ese tufich.

Churi chon nenian ewe ekewe ra ngeni ar kapasen ourour pwe i a aitangawa an famili me achou netipan seman me inan kewe? Niwiniti chienan kewe me akkom mwirin an einga ifa ussun an a imuno?

Amen aweires

Nge ewe echik, tipitipingaw, me niamam ese tongeni epwe wes seni-tori “I a tepereni ussun nonomun.”¹¹

A sinei met a auchea epwe fori.

Iei sipwene niwin sefan ngeni ewe sam, ewe mastan ewe imw mi netipeta. Fitte pukku, meni ngorou, awan an nom nge oureki ussun noun we at?

Fan fite an nenetiw chok won ewe an ikewe noun we a fen feino won me chemen sefani ewe pochokunen riaffoun a mefi nupwen noun ewe at a fetan seni? Fite iotek a apasa nepwin, tingor ngeni Kot pwe noun we at epwe tumun, pwe i epwe kuna met mi ennet, me epwe niwin sefan?

Non ew ran, ewe sam a neu won ewe tipitipingawan an—ewe an ngeni imw—me kuna napan emon a fetan ngeni i.

Epwe fen tufich?

Nge ewe emon mi chok towaw seni, ewe sam a sinei chok me non ena atun pwe noun we at.

A sa ngeni i, foropachano noun we, me kisi.¹²

“Semei,” ewe at a kechiw ne apasa, non ew kapas i eniwini ne apasa fan ew ngerou, “Uwa tipis ngeni nang me ngonuk. Use chiwen fich ngeni ai upwe emon noum. Upwe chok tingor pwe kopwe angei ei upwe emon noum chon angang.”¹³

Nge ewe sam ese mut ngeni an epwe wes. Fiti surun chonun mesan, i a ureni noun chon angang: “Watto echo uf mi ning non ewe imw me watta won afaran nei at. Anounou efoch ring won outun poun me chori won pechen. Fori eu kamwetip ne apwapwai. Nei we at a niwinsefan!”¹⁴

Non ai we ofes a pacheta echo chunga seni emon chon chunga seni German itan Richard Burde. Harriet me ngang am ouwa sani ei chunga. A pwarata eu umoumoch an ewe Chon Amanau kapas monomon non eu anononun napanap.

Sasing

The Return of the Prodigal Son, seni Richard Burde.

Nupwen meinisin ra fokkun pwapwa ren niwinsefaniton ewe at, emon ese—pwin we watte.¹⁵

I a uwei ekkoch an memef me akkom me ekkewe mettoch a fis ngeni me a awosukosuka nonomun manuan.

I a nom nupwen pwin we a tingor epwe angei wisan me non tufichin saman ewe. I a akom kuna ukukun watten chourekin an saman we netipeta.

Seni ewe fansoun pwin we a susenir, a sotuni ne anisi seman ne apanata an chourek. Iteiten ran, a angang an epwe eniwini an seman we epwe pwapwa.

Iwe iei noun we mi tumunungaw a niwinsefan, me aramas rese ukutiw ne ingeiti mokutokutun pwin we mi kan ungeni.

“Meinisin ekkei ier,” a ereni saman we, “esap mwo fan eu ai use rongorong ngeni ew mettoch ka ereniei upwe fori. Nge non unusen ekkena fansoun, en kose apwapwaei.”¹⁶

Ewe sam mi tong a ponuweni, “Nei achengicheng, mettoch meinisin ai pwan om! Ei esap ren anonnou nifang ika apwapwan. Ei fan iten echikara. Iei ewe fansoun sia aneanei non ekkei ier. Pwim we a mano me a manau sefan! A mworukono nge iei i a pwato!”¹⁷

Achengicheng pwi me fefinei, achengicheng chinei, usun meinisin an ewe Chon Amanau kapas monomon, ei esap chok faniten aramas non ewe fansoun nom. Fan iten en me ngang, ikenai.

Ion me neich ese mwo awen suseni ewe an mi pin, umwesin ekieki pwe sia tongeni kuna chommong pwapwa non manauach won pusin ach?

Ion me neich ese mefi tipetekison, netipechou, me mochen musono me umoumoch?

Naman sipwe fen ekiek, “Mi tufichi ach sipwe niwinsefan? Upwe fen esisineno fochofoch, katiwengaw, me sinengaw meren pukutan chienei kewe? Mi tufich sipwe chok mwanecheno? Ifa ussun mokutun Kot ika ua sotuni ne niwinsefan?

Ei kapas monomon a ngeni kich ponuwan ewe.

Samach won Nang epwe sangeni kich, Ngasangasan epwe ureno ren tong me umoumoch. I epwe turufi kich; watta echo uf won afarach, efoch ring won outun pouch, chori won pechech, me esinesin, “Ikenai sipwe apwapwa! Ren nei we, ewe a mano, a pwan manau sefan!”

Nang epwe pwapwa ach niwinsefan.

Kose mochen upwe ani ekis fansoun ne kapas ngeni emon me emon ami?

Inamo ika met a fen fis non manauom, uwa enniwini me pwarata ewe kapas seni achengicheng pwi me chon kuno Elter Jeffrey-R. Holland: “Ese tufich om kopwe kokkotiw fatiwen ewe saramen ach Kraist ese kouk[fangeno manau] saram.”¹⁸

Inamwo ika met ekkewe ka finata epwe atowawakono seni ewe Chon Amanau me An Mwichefen, ewe Masta Chon Echikara epwe uta won ewe an ngeni imw epwe etiwok. Me kich chon ewe Mwichefenin Jises Kraist sipwe kuta me tapweno mwirin An nenien apiru me foropachek usun pwich me fefinach, usun chiechiach. Sia pwapwa me fituk ne apwapwai.

Om niwinsefan esap ekisano feiochun ekkoch. Ren an ewe Sam kinikin ese kouk, me met a ngeni emon esap ekisano ururun wisen ekkoch.¹⁹

Usap fori ren anapanap pwe niwisefan och mettoch mi mecheres sipwe fori. Ua tongeni pwarata usun. Meni epwe, non ennetin, pwe epwe ew finata mi weires kopwe fori.

Nge uwa pwarata pwe ewe fansoun ka finata pwe kopwe niwin me fetan non anen ewe Chon Amanau me Chon Angasano, An we manaman epwe tonong non manauom me kopwe kuna ekesiwin.²⁰

Chon nang non nang repwe pwapwa.

Me sipwe pwan, om famini non Kraist. Nge auchean, sia sinei met sokkun ach sipwe ussun ewe noun mi mwanecheno. Iteitan kich meinisin sia anongonong won ewe chok manamanen fangono manau an Kraist. Sia sinei ei an, me sipwe fituk ne fetan won.

Apw, ach ewe an esap tongeni an esap wor netipechou, netipengaw, me netip weires. Nge sia tori ei kaukun “seni ewe kapas an Kraist fiti nukucharen ach nuku non I, anongonong ren unusan won ekkewe murinon mi manaman epwe ach manau.” Ach chufengen sia pwan “fetan non apinukunuk non Kraist, kamuch ew saramen ach apinukunuk, me ewe tong an Kot me meinisin noun [aramas].”²¹ Kich sipwe unusen “pwapwa me uren ning,”²² ren Jises Kraist ach tongeni!²³

Iei ai iotek pwe emon me emon kich sipwe ausening, non ei kapas monomon mi pwa ngeni kich, nouwen ewe Sam an kokori kich sipwe tonong non ewe an ngeni imw—pwe epwe wor ewe pochokun ach sipwe aier, omusomus, me tapwei ewe an ngeni ach we Kot mi tong me umoumoch. Ua pwarata usun ekkei mettoch me efeiochukemi fan iten Jises Kraist, amen.