Pwipwi me Momongeang non Kraist

Achengicheng chiechiei, a fen wor ach amwararen kinikinin mwich ikenai. Kich meinisin sia fen mefi Ngunun ewe Samon me An tong seni ekkewe murinon porous a kawor seni ekkewe sou emwen. Ua mefi feioch ai upwe afanafan ngenikemi non ei kunionun ren ai emon chon kapasen osopwano ei mwich. Ua iotek pwe Ngunun ewe Samon epwe sopweno ne etikich nupwen sia pwapwa fengen ussun ennetin pwipwi me momongeang non Kraist.

Nouch achengicheng soufos, Russell M. Nelson, a affata: “Ua kokori memper ekis meinisin ar repwe poputani ne poutano ekkewe manauen me foforun ekingaw. Ua tingor ngeni kemi ami oupwe pesei sufen fan iten meinisin noun Kot kewe. semirit.”¹ Ussun ew Mwichefen mi marino won unusen fonufan, aponueta ei kokko seni nouch soufos a ew wesewesen auchea ren koutan an ewe Chon Amanau ewe muu non fonu meinisin won fonufan.

Ewe kapas annimen Jises Kraist a osukuna pwe kich meinisin noun ekkewe sam me in non nang non pekin ngun ekkewe ra ennetin tongei kich²me sia nom fengen ussun famini me mwen mesen Kot me mwen sia uputiw won ei fonufan. Ewe kapas allim a pwan osukuna pwe kich meinisin sia foruta non ununun me ussun Kot. ³ Ina minne, sia nonnopok me mwen I,⁴pun I “a fen foruta seni ew cha meinisin fonuen mwan [me fefin].”⁵Ina minne, mi wor nonnomuch, pisekin, me tufichich seni nang, pun mi wor “emon Kot me Semen meinisin, a nap seni meinisin, me non meinisin, me non [kich] meinisin.”⁶

Kich chon tapweno mwirin Kraist, sia kokoto ach sipwe anapano ach nuku non, me tong fan iten, pwich- me fefinach kewe non pekin ngun ren ach ochufengeni netipach non tipeeu me tong, inamo ika mi wor ach sokofesen, ina minne anapano ach tufichin pesei osufonoch ren ewe pung an meinisin noun Kot at me nengin.⁷

Esap ina wesewesen ewe nonnomun manau minne ekkewe aramasen Nifai ra nonnom non ren arapakan ruu ngorou ier mwirin an Kraist a iamwirir?

“Iwe ennetin ese tongeni wor ew aramas mi kon pwapwa me seni ir me nein ekkewe aramas meinisin ekkewe ra fen for me ren poun Kot. …

“Ese pwan wor Chon Leiman, are och sokofesenin nikinikin aramas; nge ra chok ew, ekkewe noun Kraist, me chon muuni ewe muun Kot.

Iwe ifa watten feiochur!”⁸

Preseten Nelson a sopweno ne awewei ewe auchean achowano pung me osufonoch ren nouch aramas nupwen a apasa; “Ewe Chon Fori kich meinisin a kokori emon me emon kich ach sipwe poutano manauen ekingaw ngeni ese nifinifin mwichen noun Kot semirit. Emon me neich ion a wor an ekingaw ngeni pwan ekkoch aramas a auchea an epwe aier! … A murinno emon me emon kich sipwe fori met sia tongeni non ach angangoch ne tumunu ewe pung me sufon ngeni noun Kot at me nengin.”⁹ Non ennetin, ren ach sipwe asamonu aramas a namot epwe wor akkom sufonun ach sokkofesen.¹⁰

Ekieki ussun ewe riri mi pin a ochufengeni kich ngeni Kot ussun Noun semirit, ei emwen an soufos a kawor seni Preseten Nelson ese wor tipemwaramwaran ew nongonongun tetten ngeni forutan aanen wewe nap seni forata etipen ekingaw me keimu fesen neich.¹¹ Nge, usun Paul a fonou ngeni ekkewe chon Ephesus, sipwe esinna ena ren ach sipwe tour ngeni ei popun, epwe auchea an emon me meinisin repwe achocho ne foffor ren tipetekison, tipepos, me songo-mang ngeni emon me emon.¹²

Mi wor ew tutunapen emon sou emwenin ewe namanamen Jew ewe a pwapwaiti ne katon ewe totan akkar fiti ruemon chienan. I a eisinir, “If ussun ami sinei nupwen a wesino ewe pwin me ew minefon ran a poputa?”

Emon me neir a ponueni, “Nupwen kopwe tongeni nenong non eotiw me tongeni esinna sokofesenin emon siip seni emon sike.”

Ewe pwan emon a ponueni, “Nupwen kopwe tongeni nenong non enan aropeinen me esinna sokofesenin efoch iran olive seni efoch iran fig.”

Mwirin ra kunu ngeni ewe rabbi mi tipachem me eisini i ewe chok pwan kapas eis. Mwirin nakatamen ekiek, a ponueni, “Nupwen ka tongeni nenong non eotiw me kuna mesen emon fefin ika mesen emon mwan me tongeni apasa, ‘Neminewe i fefinei; atewe i pwi.’”¹³

Chiechiei achengicheng, Ua tongeni affata kemi pwe saramen ew minafon ran a sarameno non manauach nupwen sia kuna me anisi pwan emon aramas ren osufonu me asamonu me ussun ennetin pwipwi me momongeang non Kraist.

Non fansoun An ewe angang won fonufan, Jises a unusen aweweochu ei nongonong nupwen I “a fein fetan me fori met mi murinno”¹⁴ ngeni meinisin aramas, a korireto ren I me angei An umoumoch inamo ika ir chon ian, ifa nonnomur, ika sokkun ar oruni. I a iamwir, echikara, me a fokkun tumunoch ngeni osupwangen meinisin, akkaewin ekkewe non ena fansoun ir mi nom non tettenin mi sokono, rese auchea ika ir mi ketiweu. I ese amam mo emon nge a etenekir fiti pungoch me tong, pun A ekieki pwe ir pwin me fefinan noun ewe chok pwan Sam at me nengin.¹⁵

Ew me nein ekkewe amwararen mettoch a fis nupwen ewe Chon Amanau a sai ngeni Galilee, popun an a feinno won ewe an minne a fein ngeni Samaria .¹⁶ Iwe Jiese a finata an epwe mot ren an Jacob ewe ito an epwe asoso. Nupwen a nom ikana, emon fis Sameria a pwereto an epwe anonou an ewe picher ren konik. Non An sinenap, Jises a kapas ngeni, a apasa, “Kose mochen upwe unumi ekis konik.”¹⁷

Ewe fefin a ingeno pwe emon re Jew a tingorei emon fin Samaria an epwe anisi me pwarano an mairu, a apasa, “Ifa ussun emon re Jew a tingorei ei epwe ka, nge ngang emon fis Sameria? chon Jews ese wor nefiner me chon Samaria.”¹⁸

Nge Jises a poutano ewe nakatamen orunien chiechiengaw nefinen chon Samaria me chon Jews, fiti tong a iamwiri ei fefin ne anisi an epwe weweiti ika ennetin I ion—pwe i ewe Messiah, ewe epwe tongeni apasa mettoch meinisin me ewe an waroto neminewe a awitiwiti.¹⁹ Ewe mwirimwirin ena iamwir non tong a efisata an ewe fefin epwe sanong non ewe teninim ne aporousa ngeni ekkewe aramas met a fen fis, a apasa, “esap iei i ewe Kraist?”²⁰

A wor ai anononun tong ren ekkewe mi kuna turunufas, ese wor auchear, ika riaffou meren aramas ese wor ar memef me ekiek pokiten non fetanin manauei, ua fen kuna metekin ekkewe aramas mi murinno ra riaffouni ren an ekkoch opungur ika osurono pokiten ra kapas, nenengeni, ika nonomur mi sokono. Ua pwan ennetin mefi netipengaw non netipei ren ekkana ekiekir mi chok nom non rochopwak, ar kuna mi chok koukuno, me netiper mi forea ren ewe nuku pwe ekkewe mi sokko ir mi kis senir. Ar nenengeni ekkoch mi oukuk ennetin a epeti ar tufichin kuna ika ir ion nge emon noun Kot semirit.

Usun a fen wor osuni me mwan seni ekkewe soufos, sia non non ekkewe ran mi efeiengaw me mwen ewe Oruwen Wareto an ewe Chon Amanau.²¹ Ewe fonufan non unusan a keimufesen ren pochokunen ekkewe kinikin, ra fis seni sokofesenin aramas, politic, me nonnomun aramas me pekin mwoni. Ekkena kinikin fan ekkoch ra ekesiwini anen an aramas ekiek me foffor non nefiner ngeni nour aramas. Ren ei popun, ese amairu ach kuna aramas ar anapanapa ewe napanapen ekiek, fofor, me porous ussun ekkoch oruni, sokkun aramas, me nonnomur pwe ir mi sokkono, ra aea ekiek mi foruta me akkom, mi mwan, me fan chommong mi turunufas, minne a forata memmefin koput, tipekoum, osufonungaw, me pwan mo ekingaw ngenir. Ena sokkun nikinik a wor warer non namanam tekia, osufonungaw, tipekoum, me songen nus, nikinikin mochenin ewe inis,²² minne ra unusen osokurun napanaapen Jises Kraist. Ei mwokutukut mi ngaw ren ekkana ra achocho ngeni ar repwe winiti Noun ennetin chon kuno.²³ Non ennetin, pwi me fefinei, ese wor neni ren ekingawen ekiek ika foffor non ewe nenien Souneng.

Ren atin me nenginin ewe pwon mi pin, sia tongeni aninis ne awesano ei sokkun nikinik ren ach nengeni ekkewe sokofesen mi wor nefinach usun ewe Chon Amanau a nene ngenikich²⁴ me anongonong won met mi wor rech mi nonno fengen—pusin nonnomuch me nefinach seni nang. Soposoponon, sia tongeni achocho ngeni ach sipwe kuna pusin inisich a pwa me non ekkewe tan, epinukunuk, noninen, me metekin chon oruch. Kich meinisin chiechi ne sai ussun noun Kot semirit, nonnopok non nonnomuch ese unusoch me non ach tufich ne marita. Sia kokkoto ach sipwe fetanepok, ren kinamwe, fiti netipach repwe masou ren tong ngeni Kot me meinisin aramas—are, ussun Abraham Lincoln a maketiw “esap wor mochenin efeiengaw ngeni emon; fiti tong ennet ren meinisin.”²⁵

Ouwa fen pin ekipwichi ifa ussun ewe nongonongen sufon ren auchean aramas me nonnopokur mi pwano seni oukukochun napanapen ach ufouf non ewe imwen ewe Samon? Sia chufengen meinisin ne feitto ngeni ewe tempel non ew popun me ur ren ewe mochen ach sipwe nimenimoch mwen Mesan mi pin. Ufouf mi pwech, meinisin kich sia ketiw meren ewe Samon won Winikapan ussun Noun semirit mi achengicheng, mwan me fefin noun Kot mwirimwirin Kraist.²⁶ Sia tufich ne fori ekkewe angangepin mi nonno, fori ekkewe pwon mi pin mi pwan nonno, fori inisich ar repwe nom non manau mi tekia me pin, me angei pwan chok kewe pwon ese much. Chufengen non chok ew popun, sia kuna emon me emon kich ren minefon mas, sia apwapwai ach kewe sokofesen ussun noun Kot semirit.

Ua karan chok aninis ne emweni ekkewe aramas mi auchea me chon angangen kofemen ren ewe sukun ewe Brasilia Brazil Tempel. Ua kouno non ewe nenien siwin pisek fiti ewe kisin presetenin Brazil, me am ouwa porous ussun ewe uf mi pwech ewe meinisin ra ufouf non ewe tempel. Ua awewei ngeni atewe pwe ei ufouf uf mi pwech ren meinisin a esisinata pwe kich meinisin sia nonnopok meren Kot, me non ewe tempel, nikinikich ika kich ion esap kisin presetenin ew fonu ika emon sou emwenin mwichefen nge nikinikich ika kich ion ese much ussun noun Samach won Nang at mi tong.

Sasing

Iguaçú Falls.

Ewe Chonupupu Iguaçú a Puu seni eorun Brazil me a punong non ew neni ewe minne a forata ew kochufengenin ekkewe chonupupu seni asan mi tekia a fateno unusen fonufan pwe itan Iguaçú Falls—ew me nein ekkewe ningeochun me amwararen forien Kot kewe won fonufan, a wewe ngeni ew me nein kewe fisu amwararen fonufan. Ew wesewesen watten nenien konik a putiw non ew chonupunu me mwirin a keimufesen, forata pukuen konik mi puputiw seni neni mi tekia rese nonno fengen. Non kapasen awewe, ei amwararen kochufengenin konik mi puputiw ina ew nisoun an Kot famini won fonufan, pokiten sia aea fengen ewe popun me pisekin pekin ngun, feitto seni mwirimwirich me nefinach me nang. Inamo, emon me emon kich sia mokut non sokofesenin oruni, choni ew kumien aramas fiti sokofesenin ekiek, met mi fisi ngeni emon, me memef. Nge inamo ren ei, sia feinno mwach ussun noun Kot semirit me ussun pwipwi me momongeang non Kraist, nge esap poutuno ach auchean akoko fengen, minne a fori kich ach sipwe ew auchean aramas me ew neni mi auchea.²⁷

Achengicheng pwi me fefenei, amo sipwe anonnopoku netipach me ekiekich ngeni ewe mirit me kapasen pwarata pwe kich meinisin sia nonnopok mwen Kot, o kich meinisin sia unusen efeioch ngeni ewe chok pwan tufich sipwe winiti mwach me wisach ese much. Amo sipwe kon pwapwaiti ewe echiechi non pekin ngun ewe mi wor nefinach me aucheani chommongun sokofesenin ekkewe niffang a wor rech. Ika sia fori, ua pwon ngenikemi pwe sipwe feinno non pusin ach an, ussun ewe konikin ewe Iguaçú Falls, esap poutuno ewe auchean akoko ewe a esina kich pwe ew aramas sokono, “ekkewe semiritin Kraist, me ir chon ewe muun Kot.”²⁸

Ua pwarata ngenikemi pwe nupwen sia sopweno ne feinno non ei an non ei manau, ew minefon ran epwe poputa fiti ew minefon saram ewe epwe asarama manauach me afata ekkewe amwararen tufich sipwe anapano achean, me unusochun feioch seni, ewe sokofesenin aramas a foruta seni Kot nein Noun semirit.²⁹ Sipwe fokkun winiti chon angangen Nepoun ach sipwe anapano sufon me asamon nein Noun meinisin Noun at me nengin. Kot mi manau. Jises ewe Chon Amanauen ewe fonufan. Preseten Nelson i ewe soufosun Kot ikenai. Ua apasata ai kapasen pwarata ren ekkei ennet non ewe it mi pin Jises Kraist, amen