Mwareiti ewe Mwan

Pwii me fefinei achengicheng, Ua men kinisou ai nonnom remi non ei soran. Ua iotek pwe ewe Samon epwe efeiochu ei.

Mesei kei ese usun me akom. Ua no me churi ewe tokterin mass, me ua apasa, “use tongeni kuna ewe skrin.”

Me a apasa, “Ewer, mesom kewe a minen nom. Rese tongeni repwe chiwen siwin.”

Nge upwe achocho ngeni met upwe tongeni fori.

Ua mochen upwe aporousa ngeni kemi met ua kan ekieki. Ngang uwa mefi ai soun ekieki ewe Soufos Joseph Smith non kewe fittu maram a no. Uwa momot me anchangei usun watten wisan non an epwe ne emon soufos ren, tapin fansoun mi unus.

Ua ekieki usun ach feioch kich memper non Ewe Mwichefenin Jises Kraist ren Aramas mi Pin non Fansoun Soponon pwe Joseph Smith, emon at a mochen sinei met a namot epwe fori ren omusomusen an tipis, a pochokun an epwe feino nein ewe ira nukun imwan we non Palmyra, New York, me ikewe a fotopuku ne iotek, me—non pusin an kapas—akaewin an iotek nouomong (nengeni Joseph Smith—History 1:14).

Non ena fansoun, Joseph a fotopukutiw non ewe neni sia eita ngeni Nein Ira mi Monomon, nang a suk. Ruemon chon nang, a saram seni akaren neanowas, ra pwa ngeni i. Emon me neir a kapas ngeni i me apasa, “[Joseph] iei i nei At mi Achengicheng. Ausening ngeni I! (Joseph Smith—History 1:17). Ewe poputan ewe Niwinsefaniton ewe Unusochun ewe Kapas Allimen Jises Kraist

Pokiten Jises, ach Chon Amanau me Chon Angasano, a kapas ngeni ewe at Joseph me suki ei kiniinin fansoun sia nonom non, sia kon, “Praise to the man who communed with Jehovah!” (“Praise to the Man,” Hymns, no. 27). Kinisou ngeni ewe Samon ren Joseph Smith me an pochokun ne ngeni nein ewe ira non 1820, nukun imwan we non Palmyra, New York.

Ua fokkun ekieki usun ekkei amwararen mettoch sia sinei me ekkei mettoch meinisin a wor rech. Achengicheng pwi me fefinei, ai pwarata ngeni kemi non ei soran iei usun ach kei feioch sia sinei pwe meinisin sia sinei pokiten Joseph Smith, ewe soufosun non ewe saingonon kinikinin fansoun.

Sia weweiti usun auchean ei manau, ika kich ion.

Sia sinei ion Kot; sia sinei ion ewe Chon Amanau, pokiten Joseph Smith, ewe a feino ngeni nein ewe ira ne atin we, an fokkun kuta omusomusen an tipis.

Ua ekieki pwe iei och amwararen mettoch a auchea meinisin aramas non ei fonufan —repwe sinei pwe Samach won Nang me ewe Samon Jises Kraist a Pwarireta non ei Fansoun Soponon me afen mwarita an epwe eniwinato unusen ewe kapas allimen Jises Kraist ese much.

Mi wor rech ewe Puken Mormon. Met ren ei amwararen me umoumochun niffang ewe Puken Mormon ngeni memporun ewe Mwichefen. Eu pwan pwarata, pwan eu kapasen pwarata pwe Jises i ewe Kraist. A wor rech pokiten Jospeh a tupwon an epwe eniwinato ekkewe seleich, ra emwen seni nang ne chiakuni seni ewe niffang me manamanen Kot me ngeni unusen fonufan ewe puk.

Nge ai kapas iei nesosor amen mecheres, a anonon, me a ureno ren tong ngeni ewe Soufos Joseph Smith me ekkena meinisin, pwi me fefinei, ekkewe ra tipeew ngeni me ekkewe ra tipeew me ne anuonun.

Ua mochen upwe apasa ai kinisou ngeni inan we. Ua me kan ekieki usun amwararar nupwen Joseph a feito seni met a fis me nein ewe Ira mi Monomon me a aporousa ngeni Inan we met a fis, Lucy Mack Smith a nuku i.

Ua men kinisou ren Saman me pwin kewe, me fefinan kewe me an famini, ekkewe ra tipeew ngeni non ei amwararen angang ewe Samon a ewisa ngeni an epwe emon soufos epwe eniwinato ewe unusen kapas allimen Jises Kraist ese much sefan won ei fonufan.

Nge iei ai pwarata nesorei ngang ua sinei pwe Jises Kraist i ewe Chon Amanau me Chon Angasano ewe fonufan. Ua pwan sinei pwe Samach won Nang me ewe Samon Jises Kraist ra pwato me kapas ngeni Joseph me amonata i an epwe emon soufos.

Ua mwar, me ua sinei pwe pwan chommong neimi, oua sinei usun ach feioch ren ach sinei met sinei usun auchean manauach, pwata sia nonom ikei, met sipwe fori me aponueta non manauach. Sia nom non kinikinin ach sotuni ne amonata manauach, ekis me ekis, ach sipwe ekis murino, ekis achocho ngeni, achocho ne amoneta ngeni ena fansoun, ewe fansoun epwe feito, nupwen sipwe niwinsefan ngeni fan mesen Samach won Nang me ewe Samon Jises Kraist.

Ena a ekis arapakan ngeni ei. Ekis ngeni ua 95. Nei kewe rakan ereni ei ua fokkun chinap seni akomwan, nge mi och. Ua fori ukukun ai tongeni.

Nge non 50-ier, pwi me fefinei, ua tufichin angang ngeni fonufan non wisei we emon General Authority ren ewe Mwichefen. Eu feioch amen amwarar. Ua ekieki pwe a chipu epwe unusen kinikinin fonufan. Ua churi memperun ewe Mwichefen non unusen fonufan.

O, ua men tongei kemi. Met ren ei amwararen metoch mi fis—ne nenenong non sangunumi, nonom reom, me mefi om na tong ngeni ewe Samon me ewe Niwinsefaniton kapas allimen Jises Kraist.

Samach won Nang epwe nengenfichi kich iei me efeiochu meinisin mine mi feito ngeni ewe mwich. Me Ngunun ewe Samon epwe nonom non netipach, me mut ngeni ach tongei ewe kapas allimen Jises Kraist—ach Achengicheng Chon Amanau, ewe Samon Jises Kraist—epwe napono nupwen sia achoho ne angang ngeni I me aponueta An kewe annuk me achocho ngeni sipwe usun I ren ach fiti ei mwichenap. Ekis meinisin ia ka nonnom ia non ei fonufan, Kot epwe efeiochuk. Ewe Ngunun ewe Samon epwe nonom rech. Sipwe mefi ewe manamanen nang nupwe sia pin fengen non ei kinikinin mwich.

Ua isetiw ai pwarata me kapasen pwarata pwe ua sinei pwe Jises i ewe Kraist. I ach Chon Amanau, Chon Angasono. I chienach. Non iten Jises Kraist mi pin, amen.