Vakalougatataki Noda Matavuvale Ena Noda Veiyalayalati

Kemuni na marama, dua na ka talei ni’u tiko rawa kei kemuni ena yakavi nikua. Ko ni marama vinaka taucoko. Ko ni yalodina, luvena yalododonu na Kalou, ka ko ni tovolea ena veigauna mo ni maroroya na nomuni veiyalayalatai ko ni a cakava vata kei na Tamada Vakalomalagi

Au nuitaka ni ko ni sa taura e dua na gauna mo ni raica na iyaloyalokabi keitou sa digitaka me noda itoko, “Ko i au oqo, mo ni talai au.” Na droini, ka vakatokai Yaco Mai ni Painia, e a cakava ko Sisita Minerva Teichert, e dua na tina, radini vale, ka daudroini kilai levu. Keitou taleitaka na droini oqo. Keitou taleitaka na irairai ni marama ena nona salavata voli kei na nona matavuvale. Vakauasivi na neitou taleitaka na nona kato tuberi. E dina ni da na sega ni kila na veika e tu ena loma ni kato, ia e kauta lesu mai na vakasama ni veimataqali kato tuberi au dau raica e valenilotu. Au a dau tubera e so, vakatalega kina ko ikemuni. Na noqu, ena veigauna e so e dau tawa ga kina na ivolanikalou, ivola ni lesoni, tavaya ni sucu, pepa, kei na peni duiroka.

Kemuni na marama, me vaka ga na noda dau kau kato ki lotu, me sa vaka sara talega o ya na noda kauta voli e dua tale na kato ena veivanua kece eda lako kina—ia ena loma ni kato oqo me tiko kina na noda iyau talei, ni veiyalayalati—baleta ni da marama ni veiyalayalati. Au via wasea na sala me vakaukauwataki kina na matavuvale yalosavasava ena noda veiyalayalati.

E ka bibi vei keda me da kila, ni sega ni na dua walega na sala me ivakamacala ni matavuvale yalosavasava. E so na matavuvale yalosavasava e tiko kina e rua na itubutubu; ia ena so na gauna, baleta ni sa mai yaco na mate se na veisere, e sa na tiko voli ga e dua. E so na matavuvale yalosavasava e lewe levu na luvedra. E so tale na matavuvale, ena gauna oqo, e sega sara ga. E levu sara na lewenilotu era tiko duadua voli ga, ena so na gauna ni nodra bula, ia o Elder Marvin J. Ashton e vakavulici keda, “ni Kalou kei na lewedua sa dua na matavuvale.”¹ Ena so na matavuvale yalosavasava e cakacaka duadua ga o tama ena tautuba ni vale, kei na so tale na gauna, erau na cakacaka ruarua. Ia, e dina ni da na duidui, ia na ka eda na tautauvata kina e so na matavuvale yalosavasava sa ikoya na veiyalayalati, eda maroroya, ka vakamareqeta.

Au nanuma taumada na veiyalayalati e baleta na ivakaro ni kosipeli: me kena ivakaraitaki na ikatini, lako ki lotu, kei na Vosa ni Vuku. Kemuni na marama, ena sega ni ganita meu tukuna vei kemuni ni kevaka eda na maroroya na veiyalayalati, ena vakalougatataki kina noda matavuvale. E sega ni kena ibalebale o ya, ni da na sega ni sotava na dredre; ena gauna mai muri, eda kila ni tiko na veivakalougatataki ena kena maroroi noda yalayala.

E so na veiyalayalati e vakadreti keda ena ivakarau ni noda bula: ivakarau ni veimaliwai kei na ivakatagedegede ni kena vakayagataki na yagoda. E ganita me da vakavulici ira na luveda ena ivakarau ni bula dodonu: yalododonu, vakarokoroko, yalodina, ivosavosa ka ivakarau vinaka. E da vakauti ira yani na luveda kina dua na vuravura e sa lutu sobu sara ga na kena ivalavala, ia me da vakavulici ira ena vosa, e bibi cake sara na ivakaraitaki ena cakavinaka ka rakorako.

Ena qai vakacava na ivakatagedegede ni noda ivakarau ni veidutaitaki kei na yagoda? Kemuni na marama, e ganita me da ivakaraitaki vinaka vei ira na luveda ena isulusulu, irairai, kei na bula savasava. Ena rua na yabaki sa oti, e a tucake eke ko Peresitedi Hinckley ka vakasalataki keda me da “vakavulici ira na luveda ni ra se gone ka se lalai, ka da kua ni guce.”² Sa matata sara tu ga na sala me da muria, ia na ka eda kila ni ivakarau ni vuravura e sa mai tiko vei keda ka sa tu sara talega vei ira na luveda.

Au a rogoca e dua na tina ni a kaya ni veika ca kece era sa sotava tiko oqo na luvena goneyalewa, me sa digitaka se ivalu cava me sa na valuta. Sa nanuma me kakua ni vosataka na nodratou isulusulu. Ia na ivakarau ni bula rakorako ena ganita me tukuni, baleta ni tara sara tikoga na bibi ni ivakarau ni bula savasava. Oqo e sega ni kena ibalebale ni vinakati me ra vakaisulu na luveda me tekivu mai na domodra ka yaco sara kina nodra qurulasawa, ia sa kena ibalebale me da vukei ira me ra vakaisulu—me vakaraitaki ga ni ra luvena na Kalou. Kemuni na marama, ko ni vuku ka tina dausasaga. Ko ni sega ni gadreva e dua na ivoladusidusi me na vakamacalataka na ka ena gadrevi ena isulusulu. Vakararavi ki na Yalo ni Turaga mo dou na qai kila kina na veika e dodonu me na caka.

E dodonu talega me dauvakadeitaka ni ra sa kila tiko na luveda na lewa ni Turaga baleta na ivalavala ni duavata. Na itagede ni ivalavala ni bula savasava ena sega ni veisau—ira na luveda me ra na kila na iyalayala ni ka e dodonu me caka. Ia, ena levu sara na gauna eda na raici ira na luveda ni ra na kaya me donu na ka era kila ni cala ka vakatotomuria na ivakarau ni vuravura. Ena gadrevi me da na biuta vakatikitiki na madua se nuiqawaqawa ena rawa ni tiko vei keda, ka me rawa ni da na veivosaki kina vakamatata kei ira na luveda. Me ra kila sara ga vakamatailalai, ka sega ni vakararaba, se ivalavala cava ena ganita na veimaliwai ni tagane kei na yalewa ena taudaku ni bula vakawati. Kevaka eda sega ni vakavulici ira ena ivakatagedegede dodonu, era na qai vulica e tuba, ka na qai kauta mai na leqa levu sara.

Na ka vata ga oqori e dina sara ena ka ni veivakarerei levu duadua: na tekinoloji. E ka ni rarawa, ni itatarovi vinaka duadua e caka ena sega ni rawa ni tarova na kena na rawa ni curuma yani na vuvale na veika e vakasisila. Sa vinaka na Initaneti, me sa na yadravi sara ga na kena vakayagataki kei na veika vakaiyaloyalo ena vuvale. Na iyaloyalo vakasisila e sa tu e veivanua kecega ka sa tara sara tikoga na bula ni Yalododonu, me vukica na yalodra mai na ivakarau va-Kalou.

Na veiyalayalati bibi duadua e baleta na matavuvale sa ikoya na veiyalayalati ni vakamau tawamudu. Eda sa kila ni, “vakamau ni dua na tagane kei na dua na yalewa e vakalougatataki mai vua na Kalou kei na matavuvale e uto ni nona ituvatuva na Dauniveibuli me baleta na nodra bula tawamudu na luvena.”³ Na noda matavuvale sa ikoya na noda itavi bibi duadua ka da na vakalougatataki vakalevu sara kina.

Na itoko ni koniferedi oqo na “Ko i Au oqo; mo ni talai au.” E vosa ni yalayala vua na Turaga, ka ivakadinadina ni noda tu vakarau meda veiqaravi. Kevaka me da maroroya na noda veiyalayalati, ena levu sara na kena veivakalougatataki. E vola o Peresitedi Boyd K. Packer:

“E sega ni ka me sega ni dau yaco vei ira na itubutubu vakayalo me ra vakayalia e dua na luvedra, ena dua na gauna, kina dua na ka e sega ni rawa me ra tarova. E mositi ira na luvedra dauvakadrecike. Era kidrowataka se cava era sega ni rawa ka kina ni ra sa tovolea vakaukauwa me ra cakava na ka e dodonu.

“Sa noqu ivakadinadina ni veirawai ni ivalavala ca oqori ena qai vakamalumalumutaki ena dua na siga.

“Keitou na sega ni vakawalena na bibi ni vakamau ena valetabu, na isema ni cakacaka vakalotu ni veivauci, kei na ivakarau ni bula dodonu ena gadrevi kina. Ni ra maroroya na itubutubu na nodra veiyalayalati ka ra vakayacora ena icabocabo ni isoro ni valetabu, era na semati tawamudu vei ira na luvedra.”⁴

Kemuni na marama, na yalayala o ya e solia vei au na vakanuinui. Me da sa lako yani ena dei ni yalo, noda kato tuberi rairai vinaka e ligada, ia meda biuta laivi mai na kato na veika e sega na kena yaga. Kevaka me sivia sara na iusana eda na berabera. Kemuni na marama, me da sa kauta laivi na, “vakacava kevaka” kei na “kevaka walega” ka qai “vakataqara na [noda icolacola] vua na Turaga.”⁵ Au gadreva meu cakava vata na ka oqo kei kemuni. Me da sa cakava mada ga na ka vinaka duadua ena veisiga ka qai laiva vua na Turaga na kena vo me vukei keda kina. O ya e dua na yalayala e sa yalataka oti tu vei keda.

Kena itinitini, meu na tukuna mada vei kemuni e dua na marama au se bera ni sotava vakadua, ia au sa dau lomani koya sara vakalevu baleta ni dina ena nona veiyalayalati. Na buqu vakarua, ko Charlotte Gailey Clark, e a dua vei ira na iotioti ni 295 na tamata era a ciqoma na nodra veiyalayalati ena Valetabu e Nauvoo, ni se bera na ilakolako levu kina ra. Na valetabu sa sogo me tekivu mai na gauna era sa vakasaurarataki kina na yalododonu me ra lako laivi, ia o ira kece era sa bula dodonu tu era se bera na ciqoma kece na nodra edaumeni. Na buqu vakarua kei na watina erau na liutaki ira na nodrau matavuvale kina ra, ka vinakata na nona veiyalayalati me tiko vua ni bera ni biubiu yani. Au sa dau vakananumi koya sara vakalevu ena vica na vula sa oti oqo. Ena dua na siga, au na vinakata me’u tukuna vua, “Buqu, vinaka na nomu maroroya tiko na nomu veiyalayalati. Au sa kalougata vakalevu niu makubumu. Na nomu vakabauta e sa vakalougatataki au kei na noqu matavuvale—ka na vakalougatataki ira nodatou kawa.” Kemuni na marama, o ira na luveda kei ira na makubuda, era na tukuna talega vei keda ena dua na siga na vosa vata ga o ya. Ena dua na siga era na qai vakavinavinakataka vei keda na noda maroroya tiko na noda “kato” ni veiyalayalati ka vakayagataka me ra vakalougatataki kina na noda matavuvale.

Me qai vakalougatataki keda na Tamada Vakalomalagi me da maroroya na noda veiyalayalati me rawa ni na dei kina na noda matavuvale ka kalougata baleta na noda bulataka dodonu, ena yaca i Jisu Karisito, emeni.