Ena Yalosavasava

E dina ni levu cake sara na keda iwiliwili vei ira na tacida marama era a tiko mai Nauvoo, ia e tautauvata ga na yalo ni marau ena noda mai soqo vata. Me vakataki keda ga, era veilaveti, veituberi, ka veivakauqeti vakaiira; era veimasulaki vakaiira; era vakatabuya kece na nodra iyau ki na Lotu. E a vakamacalataki keda vakaoqo o Peresitedi Hinckley, “na ivurevure levu ni vakabauta kei na cakacaka vinaka, … na ivakadei ni solibula kei na talairawarawa kei na rawa ka.”¹ Sa dua na ka talei se da mai tiko ena Vale ni Koniferedi se mai na dua na valenilotu mai Mexico, se dua na tabana mai Lithuania, ni da sa veitacini marama e Saioni ka sa tu na noda itavi levu me da cakava. Eda na duavata me da cakava ena veiliutaki ni parofita ni Kalou, eda na vakayacora! Au nuitaka ni ko ni na vakila na noqu lomani kemuni—na loloma vata ka wasei tiko mai vei rau na noqu daunivakasala, ka rau sa mai vakalougatataki au dina vakalevu.

E sega ga ni se rauta keu tukuna niu marautaka vakalevu na nona kacivi au o Peresitedi Hinckley meu veiqaravi vaka-peresitedi raraba ena iSoqosoqo ni Veivukei. Au vakabauta ni ko ni na kila vinaka? Ia au a sauma ena domo ni yaloluluvu, “koi au oqo; mo ni talai au.” Ena gauna e sa qai kila kina e dua na noqu itokani Jiu na ilesilesi au sa kacivi kina, e a raici au mai me vaka beka niu sa lialia ka taroga, “Bonnie, na cava o cakava kina na ka oqori?” (Ena gauna vakaoqo, au dau tarogi au wasoma ena taro vata ga!) Ia e dua walega na vuna au cakava kina; au sa vakayacora oti noqu veiyalayalati kei na Turaga, kau sa kila na veika e gadrevi kina. Kena ikuri, au kila ni o iko kei au e daru na veiqaravi vata; ka niu a lomasoli ena vukuda kece sara.

Ena veisenitiuri sa oti era tucake na marama yalododonu me ra duavata ena inaki va-Karisito. E vuqa vei kemuni ko ni se qai papitaiso walega; ka se makare vinaka tu e lomamuni na nomuni veiyalayalati, ka se lavouvou na nomuni solibula. E veigauna ni’u dau vakananumi kemuni, e dau votu mai vei au o Priscilla Staines mai Wiltshire, e Igiladi. Sa yabaki ruasagavulu o Priscilla, ka lewena na Lotu ena 1843. O koya duadua ga. E a lako vunivuni yani ena bogi me la’ki papitaiso, ena vuku ni nodra veivakacacani na wekana ka ni ratou a sega talega ni taleitaka na nona matavuvale. E a vola: “Keitou a wawa toka me yacova na bogilevu tutu ka keitou sa qai gole yani ki na dua na uciwai lailai ka rauta ni dua na ikava ni maile na kena yawa. Keitou sa kunea kina na wai … e sa ubia tu na ucacevata, erau qai voroka na daukaulotu e dua na qara ka rauta vinaka me vakayacori kina na papitaiso … E sega tale ni dua, na Kalou ga kei ira na Nona agilosi, kei iratou na lewe vica wale na ivakadinadina era tu e bati ni wai, era a rogoca na noqu ivakadinadina; ia ena vakanomodi ni bogilevu tutu o ya e kena irairai ni ra a vakarorogo kece tu na veika bula ka ra vola na keitou itukutuku ena ivola ni Turaga na agilosi dauvola itukutuku.”²

E a tara na yaloqu na nona vosa, “E sega tale ni dua, na Kalou ga kei ira na Nona agilosi … era a rogoca na noqu veiyalayalati” me vakataki Priscilla—veitalia ga na noda yabaki, na noda kilaka ena kosipeli, na dede ni noda mai lewena na Lotu—eda sa marama kece ni veiyalayalati. Oqo e dua na mala ni vosa eda dau rogoca wasoma ena Lotu, ia na cava na kena ibalebale? E vakamacalataki keda vakacava kei na itovo ni noda bula na veiyalayalati?

Na veiyalayalati—se na iyalayala tudei mai vei keda ki vua na Tamada Vakalomalagi—ena gadrevi sara ena noda itosotoso tawamudu. Ena veikalawa yadua, ena tuberi keda me da vakataki Koya ni sa sureti keda tu me da vakaitavi ena Nona cakacaka. Eda sa yalataka ena noda papitaiso ni da na lomani Koya mai yaloda taucoko, ka lomani ira na wekada me vaka na noda lomani keda. Mai na valetabu eda tosoya tale na noda veiyalayalati meda talairawarawa, kua ni dau nanumi koya vakaikoya, yalodina, dauveidokai, ka dauloloma. Eda yalataka me da solibula ka vakatabuya na iyau kece e tu vei keda. Eda na vukei mai na kaukauwa ni matabete, me da maroroya noda veiyalayalati ka me na kauta tiko mai vei keda na veivakalougatataki, me vuabale kina noda bilo. E vakaevei beka na kena wasoma na nomu dau raitayaloyalotaka na nomu e tara yani na tawamudu ka semati iko yani ki na veika vakalou na nomu veiyalayalati? Na vakayacori ni veiyalayalati e ivakaraitaki ni yalo lomasoli; ia na maroroi ni veiyalayalati e ivakaraitaki ni yalodina.

E rogorogo mamada wale ni volai tu, se vakaevei? Io na kena vakayacori ko ya na vanua eda na vakadinadinataka kina se ko cei dina koi keda. Ia ena gauna kece eda dodoliga kina ena loloma, vosota, na yalololoma, kei nalomasoli eda sa rokova tiko kina na noda veiyalayalati ena noda tukuna, “Koi au oqo; mo ni talai au.” E dau tukuni lo ga na vosa oqo vua na Tamada Vakalomalagi, ka sega ni salavata kei na ivakatagi.

Na gauna cava sa bau vakalougatataka kina na nomu bula na nona veiyalayalati e duatani tale, se kauta mai na yalo vakacegu, se vakabulabulataka na yalomu? Ni keirau se kaulotu voli mai Igiladi kei na watiqu, keirau raici ira e vuqa na daukaulotu tagane kei na tacida yalewa ni tara sara ga nodra bula mai na nodra veiyalayalati na marama bula kilikili. Au vakavinavinaka vakalevu vei ira na tina, na tacida marama, o ira noda nei, na qasenivuli—me vaka e vuqa vei kemuni—mai na rokovi ni nomuni veiyalayalati e sa kauta yani na veivakalougatataki ki na nodra bula na tani ena sala ko ni veivakavulici kina vei ira era na kaulotu mai muri.

E sega ni sureti keda walega na veiyalayalati me da kitaka na ka e sega ni da dau cakava vakataki keda ka me da tubu cake kina, ia e sa tuberi ira tale tikoga na tani me ra kitaka vakakina. E a kaya ko Jisu, “Ia na ka kecega dou sa kitaka. Mo dou kitaka talega; io mo dou kitaka na ka kecega dou sa raica ni’u sa kitaka,”³ Na nona muria na nona veiyalayalati sa vakayaloqaqataki keda me da muria talega na noda.

Ena vukei keda na veiyalayalati mai na leqa vakacala ka. Kena ivakaraitaki, ni da muria nona veidusimaki na parofita, eda sa maroroya tiko kina e dua na veiyalayalati. Sa vakasalataki keda o koya me da levea na dinau, vakaduria e dua na ivurevure ni kakana, ka yaco me da bula rawati keda. Na noda bula mai na loma ni noda rawa ka, ena vakalougatataki keda ka sivia yani na talairawarawa oqori. E vakavulica vei keda na yalo vakavinavinaka, me da yalani keda, kua na loma kocokoco; e kauta mai na yalovakacegu mai na icolacola vakailavo, ka taqomaki keda mai na domoni ni iyau. Ni da qarauna me tawa tiko na waiwai ni noda cina, e kena ibalebale ni na sega ni vakataotaki keda na veika wale ga me da solia noda bula ka kaya “Koi au oqo; mo ni talai au.”

Ni vakavoutaki na noda veiyalayalati ena laveta ka vakabulabulataka na yaloda. Ena vei Sigatabu, ni da vakayagataka na sakaramede, a cava beka e tara na yaloda ni da rogoca na vosa oqo “ka daunanumi koya”?⁴ Eda na toso cake beka ena macawa ka tarava me da raica na veika e bibi cake? Io, eda na sotava na veika dredre; io, ena dredre ni vakayacori na veisau. Ia o sa bau vakasamataka li, se ra a bula vakacava na tacida marama ni ra sa vakatalai tani mai Nauvoo, e vuqa era a taubaletaka sara ga na balavu ni gaunisala o ya? Ni ra sa wawale mai, sa qai tosoi ira tu ga yani ki liu na nodra veiyalayalati! A cava tale ena rawa ni rawata vei keda na veika lelevu vakayalo vakaoqori?

E taqomaki keda talega na veiyalayalati me da kua ni a biliraki ki liu ki muri, ka kuitaki yani ena cagi kecega ni ivunau, ni vuku vakatamata, kei na ivadi qaseqase.”⁵ Na marama ni veiyalayalati me da tudei ni sa okati na ca me vinaka ka sa okati na vinaka me ca. Se mai koronivuli, se ena yasa ni wai batabata, se sara iyaloyalo ena teliviseni mai vei ira ka ra tukuna ni ra “kenadau me ra walia na leqa” me da nanuma ni noda veiyalayalati ena vukei keda me kua ni da lako vakatani.

Na veiyalayalati ena rawa ni taqomaki keda ka vakarautaki keda vakayalo kei ira talega na noda daulomani me da vakaliuca ga na veika e dodonu me vakaliuci taumada. Kena ivakaraitaki, ena bula ni matavuvale, me da kua ni vakalaiva na duidui ni vakasama kei na veika wale. Sa seavu tiko yani na talei ni bula vakagone; sa lewe lailai sara era se sotava tiko na bula talei oqori ni vakaitikotiko ena iteitei. E taleva tale vei keda o Peresitedi Hinckley: “Na noda leqa, e voleka ni o koya kece sara, e tubu mai na nodra vuvale na tamata. Kevaka e dodonu me tiko na veisau—e dodonu me na tekivu taumada mai vale. Mai kea sara ga me vulici mai kina na dina, me bulataki mai kina na buladodonu, ka tokoni mai kina na bula-lewai koya, ka vakabulabulataki kina na loloma.”⁶

Kemuni na veitacini marama, sa gadreva na Turaga na marama era na tuberi ira na lalai me ra cakacaka ka vuli ka veiqaravi ka vakabauta. Se ra luveda dina, se luvena e dua tale, e dodonu me da na tucake ka kaya: Koi au oqo; mo ni talai au meu qarauni ira nomuni lalai, meu na vakamareqeti ira, meu tuberi ira ka taqomaki ira mai na ca, ka lomani ira.

Ena so na gauna eda na bolei me da muria na noda veiyalayalati, veitalia ke sega ni dua na vuna levu sara. Au a vakarorogo tiko vua e dua na marama dawai ni a tukuna na veika e a sotava ena nona “lako mai vua na Turaga ena yalona taucoko.” E a sega ni mani yaco sara na nona bula me vaka na veika e a gadreva. E matau beka vei iko na kena irogorogo ko ya? Ena itabagauna vakayalo oqo ni vakasaqaqara e kilai tani ena veiveisau ni cakacaka, na icolacola vovou vakailavo, kei na idre ni vuku vakavuravura. Ia rogoca oqo na ka e qai cakava. E a qai raica ena gauna sa duavata kina kei ira na tacina marama ena tabanalevu, ni o ira talega era vakasaqara tiko na vakacegu e kauta mai na kosipeli. Sa qai kerea e dua na veivakalougatataki vakamatabete. E a qarava sara ena yalodina na nona ilesilesi. E a vulica ka tovolea sara me solia taucoko na nona loloma, kei na yalodina vei Jisu. Sa qai masulaka. “Au a tagi vua na Turaga,” e a kaya, “ka’u tukuna vua niu na cakava na ka kecega ena vakarota vei au.” E a vakayacora kece oqori dina ni a sotava na dredre. Ia kila na cava e a qai yaco? Sega, e a sega ni yaco yani ena nona katuba na nona itokani tawamudu. Ia e a yaco yani ki yalona na vakacegu, ka sa vinaka cake mai na nona bula.

Kemuni na taciqu, eda maroroya noda veiyalayalati ni da wasea na yalomatua ni noda bula me vakayaloqaqataki kina e dua tale, ni da veisiko ka veituberi ena yalololoma dina, ni da vukea e dua na gone marama me kila ni na veivuke ena iSoqosoqo ni Veivukei na nona itovo ni bula. Eda rawa ni cakava o ya!

Ni sa sokota mai na Atalanitika o Priscilla, na noda lewenilotu vou ni 1843 mai Peretania, erau a veitokani sara kei na dua na marama ka sa itaba vata kei tinana. E a vakila talega na marama tuakana na katakata ni yalayala e a vakayacora. Ni sa kele yani na waqa mai Nauvoo, e a tu voli ena yasai Priscilla. Erau a duavata, ena yaloqaqa kei na vakabauta me rau tomani ira na Yalododonu ni Kalou.⁷

Na dina vakayalo me maroroi na noda veiyalayalati e vu mai na noda vulica e veigauna na ivolanikalou, masumasu, veiqaravi, kei na solibula. Na veikalawa rawarawa vakaoqori, e susuga e yaloda me rawa ni da na tukuna, “Ni talai au yani meu laki vukea e dua na marama kei na luvena sucuvou; talai au me’u la’ki vakavulica e dua na gonevuli ka sasaga kaukauwa sara tiko; talai au me’u la’ki lomana e dua ka sega ni lewe ni lotu. Talai au ki na vanua o ni gadrevi au kina, ena gauna ko ni gadrevi au kina.”

Sa kacivi keda na Turaga me da cakava na ka kece eda rawata ena yalosavasava.”⁸ Ia na yalosavasava e vua ni kena dau bulataki na veiyalayalati. Au dau taleitaka na qaqa ni sere ni lotu oqo kei na ivakarau ni yalo e solia vei au:

“Soli mai vei au, Yalo sa cecere, Me’u na dauvosota, Ni’u rarawa tu, Vakabauti Jisu, Sa karoni au, Ka mai marautaka, Masu tikoga.”⁹

Na yalosavasava e vakavurea mai na vosa, “Koi au oqo; mo ni talai au.” Ena gauna e a vakayacora kina o Priscilla Staines na nona veiyalayalati ena bogilevu ena waicevata, e sa kalawa yani ki liu ena dua na bula vou, e a batabata sara na isulu, ia e a katakata na yalo ena reki: “E a sega tale na rai vuki” e a tukuna o koya. “Au … sa vakadeitaka meu sa na sasagataka na bula tawamudu, ena vakabauta na Kalou.”¹⁰

Peresitedi Hinckley, au duavata kei ira na iSoqosoqo ni Veivukei e veiyasai vuravura, au sa yalataka vei kemuni ni keimami tucake ena duavata me vaka na marama ni veiyalayalati ka vakarorogo ki na domomuni. Ena vuqa na veimataqali vosa, ni rogoca na domodra na marama yadua ena iSoqosoqo ni Veivukei ena neimami kaya, “Koi au oqo; mo ni talai au”

Me yaco na noda dui ivakadinadina yadua o koya ka semati keda vua na Tamada Vakalomalagi me tuberi keda, taqomaki keda, vakasavasavataki keda, ka laivi keda me da kitaka vakakina vei ira kece na Luvena, au sa masulaka ena yacai Jisu Karisito, emeni.