Kacivi na Veiliutaki Vou, Kacivaki ni Lawatu

Na kaburaki ni koniferedi raraba vei ira e dua na iwiliwili levu duadua ni lewe ni Lotu, e a kacivaka kina o Peresitedi Gordon B. Hinckley na veisau ni lawatu, ka ra tokona talega kina na lewe ni Lotu e dua na mataveiliutaki raraba vou ni Gone Yalewa, e so na Vakaitutu Raraba, kei na so na lewe ni Mataveiliutaki ni Vitusagavulu vou kei na mataveilutaki raraba ni Wilivola ni Sigatabu.

Na i ka 172 ni Koniferedi Raraba ni Veimama ni Yabaki e se qai imatai ni koniferedi raraba me kaburaki yani ki na so na tiki ni vanua vaka Esia, Ositerelia, Tokalau kei Iurope, kei na Ceva ni Pasifika. E sivia ni 5,000 na valenilotu era sa vakaiyayataki me ciqoma na kakaburaki ni Lotu, ka kauta yani kivei ira e sivia ni 90 na pasede na lewe ni Lotu me ra sarava na koniferedi raraba ni kaburaki mai na setilaiti. Me kena ikuri, era a kaburaki bulabula ena Initaneti na veisoqoni yadudua.

Ena koniferedi ni Okotova 2002, e a mai tokoni kina e dua tale na Mataveiliutaki Raraba vou ni Gone Yalewa. E a mai kacivi kina o Sisita Susan W. Tanner me veiqaravi vaka peresitedi raraba vou ni isoqosoqo ni Gone Yalewa. E a kacivi o Sisita Julie B. Beck me imatai ni Daunivakasala, ka kacivi o Sisita Elaine S. Dalton me ikarua ni daunivakasala.

Eratou sa vagalalataki mai ena mataveiliutaki raraba ni Gone Yalewa o Sisita Margaret D. Nadauld kei rau nona daunivakasala, o Sisita Carol B. Thomas kei Sisita Sharon G. Larsen.

Eratou a kacivi ki na iKarua ni Kuoramu ni Vitusagavulu e lima tale na Vakaitutu Raraba vou: Elder Craig C. Christensen, Elder James M. Dunn, Elder Daryl H. Garn, Elder D. Rex Gerratt, kei Elder Spencer V. Jones.

Eratou sa vagalalataki mai na iKarua ni Kuoramu ni Vitusagavulu o Elder Richard D. Allred, Elder Athos M. Amorim, Elder L. Edward Brown, Elder Earl M. Monson, kei Elder Jerald L. Taylor.

Era a vakacegui talega e 21 na lewe ni Vitusagavulu ni iWasewase. Mai vei ira na vagalalataki oqori, e 11 era a veiqaravi e Amerika kei ira na kena vo era a veiqaravi mai Argentina, Ositerelia, Bolivia, Brazil, Igiladi, Jamani, Japani, Korea, Peru, kei Uruquwei.

E a tokoni o Elder Dieter F. Uchtdorf me lewe ni Mataveiliutaki ni Vitusagavulu, ka tokoni ko Elder Val R. Christensen me ikarua ni daunivakasala ena mataveiliutaki raraba ni Wilivola ni Sigatabu. O Elder Ben B. Banks e sa okati me Vakaitutu Raraba vakacegu ka sa vakacegui mai na Mataveiliutaki ni Vitusagavulu, o Elder Richard J. Maynes e sa vagalalataki mai na ikarua ni daunivakasala ena mataveiliutaki raraba ni Wilivola ni Sigatabu me laki qarava tale e so na ilesilesi.

Ena soqoni ni matabete, e a kacivaka kina o Peresitedi Hinckley e vuqa na veisau ni lawatu ka vakabibitaka na lawatu e taurivaki tiko ena gauna oqo kei na kena ivalavala. Ni sa kila tu na bibi ni itavi era colata tu na veiliutaki ni matabete, e sa kacivaka kina ko Peresitedi Hinckley me tekivu mai na Noveba 1, 2002, me sa na taurivaki kina ena loma ni rua na yabaki na ivolatara ni valetabu ka sa sega ni dua ga na yabaki, me vakalailaitaki kina na gauna era vakayagataka na iliuliu ena veivakatarogi.

E kacivaka talega na soqo ni nodra talaci na daukaulotu me sa yalani ga ki na vosa ena soqoni ni sakaramede mai vua na daukaulotu ka me kua ni vakaitavi na matavuvale ena vosa se na kena tuvai na soqoni. E vakadreti ira talega na lewenilotu o Peresitedi Hinckley ni sega ni tokona na Lotu na kena dau vakayacori na soqo ni nodra talaci kei na nodra kidavaki lesu mai na daukaulotu.

E kerei ira talega na iliuliu o Peresitedi Hinckley me ra rokova na nodra gagadre na lewe ni Lotu me ra vakayacora na lotu ni matavuvale o ya ena kena vakagalalataki na yakavi ni Moniti mai na itavi qaravi vata ni koronivuli se soqo tale e so. E vosa talega o koya ena nona sega ni tokona na dinau, na bula tawasavasava, kei na nodra vakatotogani na lalai.