Yaca ni Vidio: Ko i Au Oqo; Mo ni Talai Au

Ena dua na drau onosagavulu na yabaki sa oti, ena dua na delana ka rai baleta vinaka tu na siti o Nauvoo, e Illinois, era a vakadavora kina na Yalododonu Edaidai na vatu ni tutu ni vale i Jiova. Ia ni oti ga vakalailai e dua na yabaki mai na veivakauqeti ni Turaga e a tauyavutaka vei ira na marama na iSoqosoqo ni Veivukei o Josefa Simici—e cakacaka yaga, e a kaya, me vakataucokotaka na isoqosoqo Lotu. Na isoqosoqo ni marama o ya e yaga sara ena kena tara ka vakacavari na valetabu lagilagi ka veivakurabuitaki oqo. Na noda ivotavota vakayalo me vaka ni da sa luvena yalewa na Kalou ka cakava na veiyalayalati ena isoqosoqo ni veivakauqeti vakalou oqo, e a tekivutaki ena Siti Totoka oqo. Na valetabu e Nauvoo e sa ivakatakilakila ni ka eda sa vakayacora, na ka e rawa ni da vakayacora, kei na ka e sa vakarautaka tu na Tamada Vakalomalagi vei ira na luvena yalewa yalodina.

Na imatai ni soqoni ni iSoqosoqo ni Veivukei era a tiko rawa kina e lewe 20 na marama. E so era tiko ena loma ni yabaki 17 ki na 19, e so era se qai curuvou, e so era susu gonelalai, e so era sega ni vakawati. E tautauvata sara ga vakalevu kei na iSoqosoqo ni Veivukei edaidai! E a tubu sara vakatotolo na isoqosoqo, ka ra okati kina na marama duikaikai ki na vei itutu ena isoqosoqo; ka ra bibi sara ko ira vakayadudua na marama oqo—ka sa vakatalega kina nikua. O ira na marama oqori era sotava tu na veidredre: na nodra mate na gonelalai, na lailai ni kakana, na nodra vakanadakui mai vei ira na wekadra, vakacacani, lailai ni vakabauta. Ia me baleta na veiyalayalati e a caka vua na Turaga ena gauna ni saumaki, era veirogorogoci vakaiira, era veisusugi vakaiira, era veidusimaki vakaiira. Era veiwaseitaka na kakana kei na isulu kei na veika era dau vakila vakaiira. Me vaka na nona vakasamataka lesu na gone o Nancy Tracy na veivakalougatataki ka a ciqoma: “Ko kila na domo ni iVakatawa Vinaka, kei na Nona lako mai me vakasoqoni ira na Nona sipi, ko a kila rawa na Nona itukutuku ka ciqoma ena reki kei na mamarau.”¹ Na nodra yalodina na marama kei na nodra saumaki ki na kosipeli e a vakaraitaki ena nodra ivalavala ni lomasoli, dauloloma, kei na duavata vakaveitacini.

E tautauvata sara ga vakalevu kei keda o ira na noda iSoqosoqo ni Veivukei ena gauna e liu! Ena so na gauna o ira na gone se qase, vulagi se curuvou, era dau galili, guilecavi, se sega ni rawarawa me ra vorata na veika dredre era dau sotava. Ia e na nodra vakasinaiti tu ena vakabauta o ira na marama oqo era dau kalawa yani ki liu, duavata ena vakayacora na nodra itavi ena kena tara na vale i Jiova. O ira vakayadudua, era solia na nodra iloloma: solia na isulu kunekune dredre, cula isulu, veivakani vei ira na matai, solia na nodra iyau vakamareqeti mai vei ira nodra qase me veivuke vakailavo ena kena tara na valetabu, era vakarautaka na icili, veiqaravi vei ira na tauvimate kei ira era sa qase, era cula sara talega na ilati ni valetabu. Na ilavo lailai e toka vei ira, ka rawa ni bau voli kina na kakana se isulu, e a qai voli kina na ivako ni valetabu kei na iloilo ni veikatubaleka. E a kaya e dua na marama ena nona lomasoli: “Au a tekivutaka ena vakasama vinaka me’u gole ki na valenivolavola ka dau ciqomi kina na isolisoli me baleta na tara ni valetabu ka la’ki solia kina na noqu isolisoli. E dua na veivakatovolei e yaco vakasauri mai vei au … ni ilavo [oqo] ena rawa ni saumi kina na veika au gadreva tu ena gauna o ya. Oti au sa qai vorata. Au qai kaya, ‘Kevaka me dua walega na madrai lailai ena veisiga ni dua na macawa, au na solia na ilavo qo ki na tobu ni ilavo me baleta na tara ni valetabu.’”² O ira na noda lewe ni iSoqosoqo ni Veivukei ena gauna e liu era a vakasamataka ni dua na gauna donu “me ra biuta kina na [nodra] ilavo lailai sara me vukei ira na Turaga ena kena tara na vale i Jiova.”³ Era a kaya ena yalodina, “Turaga, ko i au oqo; mo ni talai au!”

Mai na ivakatekivu, na inaki ni iSoqosoqo ni Veivukei sa ikoya me ra vakabulai na yalo, ka vakasaqarai ira na dravudravua kei ira era gadreva tu na veivuke, ka solia na vakacegu vei ira na tamata era colata tu na icolacola bibi, veivakaukauwataki vakaikeda. Ena nodra cakacaka o ira na marama ena gauna e liu me ra veivuke ena kena tara na valetabu oti me ra qai ciqoma na nodra dui edaumeni, era kunea kina na vakacegu kei na veiuqeti ka gadrevi ena dredre ni ilakolako sa tu mai liu. E tautauvata vakatalega kina vei keda nikua. Mai Nauvoo na Turaga e gadreva na marama vakayadudua—veitalia se yabaki ni bula cava, kila vakavuli, ivurevure vakailavo, vosa vakacava, kila vakacakacaka—me da veivuke ena taraicake ni Nona matanitu.

E sega na kena duidui edaidai! Eda gadrevi kece sara ena iSoqosoqo ni Veivukei. E a kerea na noda parofita bula meda toso ki liu ka vakayacora na noda itavi ena veivakabulai. E dina, eda sa veiyalayalati me da vakayacora vakakina. E a tautaunaka taumada na Parofita o Josefa Simici me ra “vakacegui na dravudravua,” “me vakabulai na yalodra na tamata,”⁴ e tautauvata talega vei keda. Oi keda, talega, e dodonu meda vakataqara na ligada ena vatuvatu ni tabana e dua na wekada, vakamamadataka e dua na icolacola, wasea na noda ivakadinadina kei na veivakabauti vei Jisu Karisito. Au taleitaka na nona rai e dua na marama ena gauna makawa, o Zina Young, me baleta na veitokani ni marama ena iSoqosoqo ni Veivukei: “E sa dua na veivakalougatataki na noda mai sota vata… . Na Yalo ni Kalou sa tiko sara ga eke ni da veivosaki tiko, e tautauvata sara ga ni sa sinai na waiwai mai na dua na saqa ki na dua tale na saqa.”⁵

Kemuni na taciqu, sa ikoya ga qo na vanua me tekivutaki kina na noda ivotavota ni vakabauta. Ena noda raica na kena vakalesui tale mai na vale i Jiova, e dodonu meda nanuma tiko ni o Jisu Karisito e a lumuti keda, ena itabagauna oqo, meda veivuke ena kena taracake na Nona matanitu. Meda vakanamata Vua, doka na Nona matabete, ka bulataka na noda veiyalayalati. Veitalia se vakacava na keda ituvaki kei na vanua cava ga eda bula kina, e rawa vei keda—ka dodonu vei keda meda kalawa yani ki liu me vaka ni da luvena yalewa na Kalou ka tutaka tikoga na kena vakatetei, “Turaga, ko i au oqo; mo ni talai au.”