Me da Tamata Vinaka Cake Yadua

Sa dua na koniferedi totoka oqo, kemuni na taciqu kei na ganequ. Ni da sa lesu ki na noda veivale kei na noda dui cakacaka e veisiga, sa dodonu vei keda yadua me da sa tamata vinaka cake mai na gauna e se qai dola kina na koniferedi.

Sa totoka na nodra vosa o ira kece sara era sa vosa vei keda. E veivakauqeti na masu. Ka vakasakiti na ivakatagi.

Ia na ka bibi duadua ga, sa i koya na veika sa yaco ki na dui lomada yadua ka vu mai na veika eda sa sotava. O au vakataki au, au sa yalataka e lomaqu me’u na tamata vinaka cake mai na veigauna e liu. Au nuitaka ni’u na dauloloma vakalevu cake tale ki vua e dua e vakaleqai tu keirau na sota. Au nuitaka ni’u na rawa ni veivuke cake vakavinaka vei ira era gadreva tu na veivuke. Au nuitaka ni na ganiti au cake vakavinaka na nomuni veinuitaki. Au nuitaka ni’u na turaga ni vale, tama ka tukanigone vinaka cake. Au nuitaka ni’u na weka ka itokani vinaka cake. Au nuitaka ni’u na Yalododonu Edaidai vinaka cake ka me levu cake na noqu kila na veivakasama talei ni kosipeli lagilagi oqo.

Au sa bolei kemuni yadua kina o ni rogoca tiko na voqa ni domoqu mo ni yacova na veika vakalou e tu vei kemuni. Eda sa kila dina tiko beka na kena ibalebale me da luve ni Kalou, me tu vei keda e dua na ka e vakalou?

Au vakabauta mai vu ni yaloqu ni o ira na Yalododonu Edaidai, ena vosa vakararaba, era tamata vinaka. Kevaka eda bula ena ivakavuvuli ni kosipeli sa dodonu me da tamata vinaka, baleta ni da na dau veikauwaitaki ka dauloloma, dauveinanumi ka dauvosota, dauveivuke ka dodoliga yani vei ira era leqa tu. E rawa ni da tabonaka laivi yani ka vunitaka me kakua ni rairai mai ena noda bula na tikida vakalou, se me da kauta mai ki liu ka me caudre ena veika eda vakayacora.

E tu ena bula taucoko sara na veika me vakavinakataki. Veitalia ga na noda cakacaka, veitalia na ituvaki ni noda bula, e rawa ni da vakavinakataki keda ka cakava me tara na nodra bula ko ira era tiko tikivi keda.

E sega ni gadrevi me da daramaka ena noda liga ni sote na noda lotu. E sega sara talega ni gadrevi me da sakitaka wavoki, se me da nanuma ni da vinaka cake mai vei ira na kena vo. Oqori erau veisaqasaqa kei na Yalo i Karisito ka dodonu me da dau sasagataka tiko. E dau vakaraitaki koya na yalo oqori e lomada kei na yaloda, ena ivalavala malua ka sega ni qaciqacia ni noda bula.

Oi keda kece sara eda sa raici ira ka da dau vinakata me da tautauvata baleta ni ra sa vakabulabulataka e dua na itovo ka, kevaka mada ga e sega ni tukuni, sa tukuna tu na totoka ni kosipeli era sa vakaitovotaki ira kina.

E rawa ni da vosa vakamalua. E rawa ni da sauma na ca ena vinaka. E rawa ni da matadredredre kevaka e rawarawa cake na cudru. E rawa ni da dau lewai keda vinaka ka vakaivakarautaki keda ka kua ni kauwaitaka na veivakacacani e baleti keda.

Me da tamata mamarau. Na ituvatuva ni Kalou e ituvatuva ni marau. Ena rawarawa cake na bula, ena lailai na lomaleqa, ena lailai na veivakatovolei kevaka eda vakabulabulataka na yalo ni mamarau.

Me da cakacaka vakaukauwa vakalevu cake ena vuku ni noda itavi vakaitubutubu. Na vuvale e iwasewase taumada ni itikotiko. Na matavuvale e isoqosoqo taumada ena Lotu. Keimami sa kawaitaka tiko vakalevu na ivakatagedegede ni nodra bula na noda me vaka ni ra turaga se radi ni vale, ka nodra itubutubu na luvedra.

Sa rui levu na veivakadiloi kei na veidusi ka salavata kei na cudru kei na vosa kaukauwa. E vakaitamera na dredre eda dau sotava e veisiga. Era dau lesu mai ki vale na tama ena nodra cakacaka ni ra sa oca ka cudrucudru rawarawa. E levu na marama era cakacaka. Era sotava talega na veika dredre sara ka rawa ni vakavuna na vakacaca ena sega ni sauma rawa na ilavo era rawata. Era biu tu na gone me ra vakasaqara na veika ni nodra marau, ka levu era dau sega soti ni vinaka.

Kemuni na taciqu kei na ganequ, me da cakacakataka na noda itavi vakaitubutubu me vaka ni vakatau kina na veika kece ena bula, baleta ni veika kece ena bula e vakatau kina.

Kevaka eda sa guce ena noda vale, eda sa guce ena noda bula. E sega ni na qaqa e dua na tamata ka sa guce ena nona vale. Au kerei kemuni na turaga, mo ni tu mada vakadua ka vakasamataka se sa vaka tu evei na ivakarau ni nomuni qarava na nomuni itavi vaka: tagane vakawati ka tama, ka vakakina vakailiuliu ni matavuvale. Kerea na veidusimaki, na veivuke, na veituberi, ka qai muria na vakasolokakana ni Yalotabu me liutaki iko ena itavi bibi duadua vei ira kece, ni na tawamudu ka sega ni vakaiyalayala na isau ni nomu veiliutaki.

Me vakalougatataki kemuni na noqu itokani na Kalou. Me tarai kemuni yani ena vanua cava ga o ni tu kina na yalo ni vakacegu kei na loloma. Me tu ena nomuni bula na duavata. Me vaka au sa dau tukuna vei ira na noda itabagone ena vuqa na vanua, dau matau, dau savasava, dau dina, dau yalomatua, dau masu. Mo ni dau tekiduru ena masu vua sa Cecere Sara ka vakavinavinakataka na Nona veivakalougatataki ni sautu. Ka mo ni qai tucake e yavamuni ka lako ki liu ni o ni luvena tagane ka luvena yalewa na Kalou me yaco kina na Nona inaki tawamudu, ena nomuni dui sala yadua, oqori na noqu masu ena noqu laiva vei kemuni na noqu veivakalougatataki kei na noqu iloloma, ena yaca tabu i Jisu Karisito, emeni.