O Se Tamaitiiti ma se Soo

O i tatou uma lava ua osia feagaiga o le papatisoga, ua uma ona folafola atu e avatu le talalelei i isi.¹ O nisi taimi, o le fefefe i le teena po o le faatiga atu ai foi, e foliga mai ai o se faasalavei e le mafai ona seu ese. Ae e i ai nisi tagata o le au paia e faigofie lava ona tafieseina lena faasalavei. Ua ou maitauina ma le totoa i latou sa i ai i mea ou te femalagaai ai. E mafai ona ou vaai faalemafaufau i nisi o i latou i le taimi nei.

O le Aso Toonai o le aso faatau i le maketi i vaega eseese o le lalolagi. I nuu i tua i Kana, i Ekuatoa, ma le Atu Filipaina, e le masino tagata e la’u mai fua o a latou faatoaga ma a latou galuega taulima i le taulaga e faatau ai. Latou te talanoa i tagata latou te fetaiai i le ala. Latou te talatalanoa foi ma i latou e i o latou tafatafa a o faatalitali mo se tagata faatau. O le tele lava o talanoaga e uiga i toatuga o le olaga, o le o ese mai le mativa, a o nisi foi taimi e talanoa i tulaga matautia.

O na tagata e i luga o alatetele ma le maketi, e i ai foi ma le Au Paia o Aso e Gata Ai. O le tele lava o a latou talanoaga ma e latou te fetaiai, e foliga tutusa lava ma mea e te faalogo i ai i soo se vaega o le lalolagi. “O fea e te sau ai?” “O sou atalii lena?” “E toafia lau fanau?” Ae e i ai lava se eseesega i le Au Paia o Aso e Gata Ai. E iloagofie lava i o latou mata faapea foi a latou upu. Latou te faalogologo ma le faaeteete ma foliga o se tagata e popole i tali o fesili ma e popole foi i le tagata [o loo talanoa i ai].

A fai si umi o le talanoaga, ona iu lea i mea e matua taua ia i laua uma. La te talanoa i mea ua talitonu e maua ai le fiafia ma mea foi e faanoanoa ai. Ona suia lea o le talanoaga i faamoemoega mo lenei olaga ma le olaga a sau. E talanoa lemu le tagata o le Au Paia o Aso e Gata Ai e i ai le faamoemoe. E le o taimi uma, ae o nisi taimi, o le a fesiligia ai le tagata o le Au Paia, “Pe aisea e ese ai lou toafilemu?” “Pe faapefea ona e iloa nei mea na e fai mai e te iloa?”

Ona oo mai ai lea o se tali filemu. Atonu o le a talanoa e uiga i le Tama Faalelagi ma Lona Alo, o Iesu Keriso, na faaali i le taulealea o Iosefa Samita. E ono talanoa foi e uiga i le galuega alofa a le Faaola toetu e pei ona taua mai i le Tusi a Mamona, i tagata lautele o e na faatuatua ia te Ia ma alolofa ia te Ia e pei foi o i tatou.

Afai e mafai ona e faalogoina se ituaiga talanoaga faapena, e talanoaina ai mea faaleagaga i se maketi po o le aualatele, atonu e te fesili: “E mafai faapefea ona ou faia lena mea? E mafai faapefea ona ou lelei atili i le fetufaaiina atu o lo’u faatuatua ia i latou e le o lagonaina mea ia ou te lagona?” O se fesili mo i tatou taitoatasi o tagata o le au paia. O loo i ai foi lena fesili i mafaufau o epikopo uma ma peresitene o paranesi i le Ekalesia, o i latou ia ua taitaia nei le galuega faafaifeautalai i o latou tagata. O loo maua le tali i le fatu o le seleselega o le a oo mai.

Sa ou suesue totoa ma le agaga tatalo i nisi o ni molimau ofoofogia ma le faamaoni a le Faaola ma Lana Ekalesia. O tala i o latou soifua e musuia. Sa tofia se tasi alii lotomaulalo e avea ma peresitene o se paranesi laitiiti lava. Sa matua toalaiti tagata o le au paia, ma sa na le iloa pe faapefea ona faagaoioi le paranesi. Sa ia savali atu i le togavao ma tatalo ai. Sa ia fesili atu i le Atua pe o le a se mea e tatau ona ia faia. Sa oo mai le tali. Sa amata e ia ma nai tagata o le au paia ona latou valaaulia a latou uo latou te tapuai faatasi. E atoa le tausaga, ua faitau selau tagata ua ui ifo i le vai o le papatisoga, ma ua avea ma tagatanuu o le Ekalesia a le Alii.

Ou te iloaina se tagata e toetoe lava o vaiaso uma e alu ai sana malaga i lana galuega. Soo se aso lava e mafai ona i ai ni faifeautalai i se vaega o le lalolagi e aoaoina se tagata na la fetaui. E i ai foi se isi tagata e foliga mai e le faavaivai lava pe toafia tagata e tatau ona ia talanoa i ai [e uiga i le talalelei] a o lei manao se tasi e aoaoina e faifeautalai. Na te le popole lava pe faafia ona teena ana taumafaiga, ae na o le fiafia lava o i latou ua suia olaga.

E leai se mamanu tupito o mea latou te faia. E leai foi se auala masani. O nisi tagata o le au paia e tauaveina i taimi uma se Tusi a Mamona e foai atu. O isi e faatuina se sini i le filifilia lea o se aso e saili ai se tagata mo faifeautalai e aoaoina. O se isi tagata e i ai ni fesili e tosina mai ai isi tagata ia mafaufau i mataupu e aupito sili ona taua i le olaga o se tagata. E tofu tatalo nei uso o le au paia ia iloa pe o le a le mea e fai. E foliga mai e tofu foi i latou ma tali eseese, e fetaui lelei lava ia i latou ma tagata latou te feiloai.

Ae i se isi itu e tutusa uma lava i latou. O le mafuaaga lenei: e tutusa le latou vaai i le faamoemoega o le olaga. E mafai ona latou faia mea ua musuia ai i latou e fai ona o lena malamalamaaga ia i latou. Ina ia faia le mea e tatau ona tatou faia, e tatau ona avea i tatou e faapei o i latou i ni auala e le itiiti ifo i le lua. Muamua, latou te lagona o i latou o fanau faapelepele a se Tama Faalelagi alofa. Ona o lena tulaga, o lea e faigofie ai ona latou liliu atu ia te Ia i le tatalo. Latou te faamoemoe foi ia latou maua Lana taitaiga patino. Latou te usiusitai i le agamalu ma le lotomaualalo, o ni fanau a se matua atoatoa. E latalata atu o Ia ia te i latou.

Lona lua, o i latou o soo loto faafetai o le Iesu Keriso toetu. Ua latou iloaina lava e moni le Togiola ma e taua mo tagata uma. Ua latou lagona le faamamaina e ala i le papatisoga e i latou ua i ai le pule, ma le mauaina o le Agaga Paia mo i latou lava. Ona o le filemu la ua latou iloa, ua pei ai i latou o atalii o Mosaea, “… o lo latou manao, ia talaiina atu le olataga i tagata uma lava, aua ua le mafafai i latou ona tuu le agaga o se tagata e toatasi ia fano; ioe, o le manatu lava e tigaina se agaga e toatasi i le puapuaga e le iu, ua tetemu ai i latou ma gatete lava.”²

O i latou e faigofie ona tautala ma tautala soo foi i le talalelei toefuataiina, latou te faatauaina lona uiga ia i latou. Latou te mafaufau soo foi i lena faamanuiaga tele. O le manatua o le meaalofa ua latou mauaina, latou te naunau ai foi ina ia maua e isi. Latou te lagonaina le alofa o le Faaola. Ia i latou, o upu nei ua fai ma mea moni ia i latou i itula, ma aso taitasi:

“E leai se fefe i le alofa; a o le alofa atoatoa e faateaeseina ai le fefe; aua o le mea tiga le fefe; o le ua fefe, e le faaatoatoaina o ia i le alofa.

“O i tatou, ua tatou alolofa ia te ia, aua na ia muai alofa mai ia te i tatou.”³

A oo lava foi ina lagona lena alofa, o nisi taimi e lagona ai e le soo moni le popole. Sa manino lava le tala a le Aposetolo o Ioane e uiga i lena mea: o le a mou atu le fefe pe a faaatoatoaina i tatou i le alofa. E mafai ona tatou tatalo mo lena mea foaifua mai o le alofa atoatoa. E mafai ona tatou tatalo ma le mautinoa e mafai ona tatou lagonaina le alofa o le Faaola mo i tatou ma i latou uma tatou te feiloai. O le tele o Lona alofa mo i tatou ma i latou, na Ia totogiina ai le tau o a tatou agasala. O le isi itu o le talitonu lea i lena mea. I se isi foi itu, e sili atu ona taua le liua o o tatou loto ina ia lagonaina ai i taimi uma. O le poloaiga e tatalo ina ia lagonaina ai le alofa o le Faaola, o se folafolaga. Faafofoga foi:

“O lenei, o’u uso pele, afai e leai se alofa ia te outou, e le aoga lava outou, aua e le uma le alofa. O le mea lea ia outou uumau ai le alofa, ua silisili i mea uma, aua e faaleaogaina mea uma—

“A o le alofa moni, o le alofa mama lea o Keriso, e tumau ia e faavavau; o i latou uma foi ua maua ua i ai lea alofa i le aso gataaga, e lelei ia te i latou.

“O le mea lea, o’u uso pele e, ia outou tatalo atu ai i le Tama ma le malosi uma o le loto, ina ia faatumuina outou i lenei alofa ua foaiina mai ia te i latou uma o e ua fai ma soo faamaoni o lona Alo o Iesu Keriso, ina ia avea outou ma atalii o le Atua, ina ia foliga i tatou ia te ia pe a faaalia mai o ia, aua tatou te iloa atu ia te ia e pei lava ona i ai nei o ia, ina ia ia te i tatou lenei faamoemoe; ina ia faamamaina i tatou, e pei ona mama o ia.”⁴

E faatuatuaina e le Alii Ona soo moni. Na te auina atu tagata ua saunia i Ana auauna ua saunia. Ua e silafia, e pei foi ona ou iloa, le feiloai atu i tagata e te talitonu ai lava e le o se feiloaiga na faafuasei ona fai.

E i ai sa’u uo e tatalo o ia i aso uma ina ia la feiloai ma se tagata ua saunia e talia le talalelei. E alu ma ave se kopi o le Tusi a Mamona. I se po a o lumanai se tasi o ana malaga talu ai nei, sa tonu ai ia te ia o le a le avea se kopi ae alu ma ave le kata faasolo [faaletalaiga]. Ae malama ae le taeao, ae oo mai se musumusuga: “Alu ma ave se Tusi a Mamona.” Sa ia tuuina se kopi i lana ato.

Sa nofo i ona tafatafa i le vaalele se fafine na te iloaina ma sa ia tau mafaufau, “Pe o ia ea lea?” Sa la toe malaga faatasi foi ma le fafine lava lea ina ua toe foi lana faigamalaga. Ia, sa ia mafaufau, “Pe faapefea ona ou amata talanoa atu i ai i le talalelei?”

Ae tei ua fai atu lea tamaitai, “E totogi sefuluai i le tou Ekalesia, a ea?” Sa ia fai atu i ai ioe. Sa fai atu le tamaitai sa tatau foi ona ia totogiina le sefuluai i le latou ekalesia, ae na te lei faia. Ona ia toe faapea mai lea, “O le a ea le tala e uiga i le Tusi a Mamona?” Sa faamatala i ai e la’u uo o se tusi paia, o se isi molimau lea ia Iesu Keriso, na faaliliuina e le Perofeta o Iosefa Samita. Sa foliga mai ua fia faalogologo le tamaitai. O lea na tago ifo ai lea alii i lana ato ma faapea atu, “Sa uunaia lava au ou te sau ma aumai le tusi lea. Ou te manatu o se tusi mo oe.”

Sa amata e le tamaitai ona faitau i ai. Ina ua la faamavae, sa ia fai atu, “E tatau ona ta toe saga talanoa e uiga i lenei mea.” O le mea sa le i iloa e la’u uo, ae sa silafia e le Atua, o la sa tau vaavaai e lenei tamaitai se lotu. Sa silafia e le Atua sa maitau e lenei tamaitai ia la’u uo, ma tau mafaufau ai pe o le a lava le mea e fiafia ai o ia. Sa silafia foi e le Atua o le a fesili o ia e uiga i le Tusi a Mamona ma sa Ia silafia foi, o le a naunau o ia e aoaoina e faifeautalai. Sa saunia o ia. E faapena foi la’u uo. Ma e ta te mafaia foi.

O le a susulu atu lava i ou foliga ma ou mata lou agavaa ma lou naunautai. O le a e sagisagi fiafia i le Ekalesia a le Alii ma Lana galuega, ma o le a faaalia lava. O le a avea oe ma Ona soo i le 24 itula o le aso i soo se tulaga. E te le tau atiinae malie lou lototoa mo se avanoa patino se tasi e te talanoa ai i se tagata e uiga i le talalelei ona le toe faia ai lea. O le mea moni e faapea, o le toatele o tagata e le fia faalogo i le talalelei toefuataiina, o le a itiiti sona aafiaga i mea e te faia ma mea foi e te tautala ai. O le tautala atu i mea e te talitonu i ai, o le a avea o se vaega o lou ituaiga tagata.

Sa faapena lo’u tama. O ia o se saienitisi. Sa aoao atu o ia i potopotoga o tagata i atunuu eseese o le lalolagi. Sa ou faitauina i se tasi aso se lauga sa ia tuuina atu i se fonotaga tele faasaienitisi. I lena lauga, sa ia ta’ua ai le foafoaga ma se Foafoa a o talanoa e uiga i lana saienisi. Ou te iloa, pe afai sa i ai, i lena faapotopotoga e auai i lona faatuatuaga. O lea sa ou faapea atu ai ia te ia ma le maofa ma le faaneenee, “Papa, sa e tuuina atu lau molimau.” Sa tiloilo mai o ia ia te au ma le ofo ma faapea mai, “E mo’i?”

Na te lei iloaina foi lona lototele. Sa na ona ia fai atu lava i le mea sa ia iloa ma e sa’o. Ina ua ia tuuina atu lana molimau, e oo lava i tagata na teena, sa latou iloaina lava e le i aumaia faapea o se vaega o le fuafuaga, ae ona o le vaega o ia lava. O ia lava le la, tusa lava po o le a.

O le uiga lena o tagata uma e lototoa ma lelei i le folafolaina atu o le talalelei. Latou te vaai ifo ia i latou lava o ni fanau a se Tama i le Lagi o loo soifua, ma alofa. Latou te vaai ifo foi ia i latou lava o ni soo o Iesu Keriso. E le tau faia ni taumafaiga faapitoa mo i latou ina ia tatalo. Latou te faia lava e i latou. E le tau faia foi se taumafaiga faapitoa ia i latou e manatua ai le Faaola. O Lona alofa mo i latou ma lo latou foi alolofa ia te Ia, e tumau pea. O o latou ituaiga tagata na, ma le latou vaaiga ia i latou lava, ma e o loo siomia ai i latou.

Ia e ono foliga mai ia i tatou e manaomia ai se suiga tele lea, ae e mafai ona tatou mautinoa o le a oo mai. O le suiga i tagata taitoatasi o le au paia, o loo tupu i le Ekalesia i atunuu uma. O le taimi sili lenei na muai vaaia e perofeta talu mai le foafoaga. O le a oo atu le talalelei toefuataiina i atunuu uma. O upu nei na auina atu e le Faaola i le Perofeta o Iosefa Samita:

“Ua ou auina atu ai la’u agelu o lele i le taulotoaiga o le lagi, ua i ai le talalelei faavavau, o le ua faaalia i nisi ma ua tuuina atu ai i tagata, le o le a faaalia i nisi e toatele o e nonofo i le lalolagi.

“O le a talaiina atu foi lenei talalelei i atunuu uma, ma ituaiga, ma gagana, ma nuu.”⁵

Pe o a lava faigata e tulai mai, e mafai lava ona tatou iloa o le a faatuina lava e le Atua tuaoi ina ia faataunuuina ai Ana folafolaga. O Ia, e le na o tagata, o loo i ai le pule aoao o malo, ma mea e tutupu e faatagaina ai Ona faamoemoega ina ia faataunuuina. O atunuu uma ma gagana, ma malo uma, o le a tulai mai ai lava tagata e talia le Ekalesia, o e e galulue ma le mautinoa atoatoa o i latou o fanau a le Atua, o e ua avea ma soo ua faamamaina atoatoa a le Keriso toetu i Lana Ekalesia.

I ni nai tausaga talu ai, sa ou lauga ai i faifeautalai i le nofoaga autu e aoao ai faifeautalai i Iapani. Sa ou folafola atu ia te i latou i lena taimi, o le a oso a’e malama o se aso fou i lena atunuu. Sa ou fai atu i ai, o le a i ai se faatelega tele i tagata o le ekalesia e talanoa fiafia atu ai i tagata latou te fetaiai, e uiga i a latou molimau i le talalelei toefuataiina. O lo’u mafaufau i lena taimi, o le lototele e tautala atu e maua mai lea i le faateleina o le faananau i le Ekalesia i lena atunuu. Ua ou iloa nei, o le a oo mai le vavega, o le suia tele o le loto, i tagata o le ekalesia, ae le o le lalolagi o loo siomia ai i latou.

O i latou faatasi ai ma tagata o le au paia i le salafa o le lalolagi, o le a alolofa, ma faalogologo, ma talanoa, ma molimau atu i le suia o o latou loto. O le a taitaiina i latou i faataitaiga a epikopo ma peresitene o paranesi. O le a tele le seleselega o agaga ma o le a saogalemu i aao o le Alii.⁶

Ina ia avea ma se vaega o lena vavega, e le tatau ona e faatalitali seia e lagona ua e latalata atu i le Tama Faalelagi, pe faatalitali foi sei e mautinoa ua faamamaina atoatoa oe i le Togiola a Iesu Keriso. Tatalo mo le avanoa e feiloai atu ai i tagata ua lagona e mafai ona i ai se mea e sili atu i o latou olaga. Tatalo ina ia e iloa le mea e tatau ona fai e fesoasoani ai ia te i latou. O le a tali mai au tatalo. O le a e fetaiai ma tagata ua saunia e le Alii. O le a e lagonaina ma tautala foi i mea e te le i iloa muamua. O le a oo mai foi le taimi e te lagonaina ai e oe lava ia, lou latalata atili atu i lou Tama Faalelagi, ma o le a e lagonaina foi le faamamaina ma le faamagaloga na folafola mai e le Faaola i Ana molimau faamaoni. Ma o le a e lagonaina foi Lana faamaoniga, ina ua e iloa ua uma ona e faia mea sa Ia poloaiina ai oe, aua e alofa o Ia ia te oe ma talitonuina oe.

Ou te faafetai lava ina ua ou ola ai i lenei taimi. Ou te faafetai ina ua ou iloa o oe ma au, o ni fanau alofagia a se Tama Faalelagi mamalu. Ou te molimau atu o Iesu o le Keriso, o Ia o lo’u Faaola ma lou Faaola, ma o le Faaola o tagata uma o le a e feiloai i ai. Na afifio mai le Tama ma le Alo i le Perofeta o Iosefa Samita. Sa toefuatai mai ki o le perisitua ma ua amataina nei le faapotopotoina tele mulimuli. Ou te iloa e moni lena mea.

I le suafa o Iesu Keriso, amene.