O Upu ia Ola Ai

Ua tumu le lalolagi i upu. O le tele [o upu], iivale, e tautuua’i, e tele foi e faauigalua. A tuufaatasi, o se leo, o se faanenefu, tatou te le ano i ai, ma e tatou te le faalogo foi pe manatu mamafa i ai. O nisi foi taimi, tatou te faalogo ai i upu taua, e pei o upu o lenei konafesi, o upu ia e tatau ona ola ai.

Sa ta’ua e Peresitene Thomas S. Monson i le konafesi aoao ia Aperila i le 1988 e faapea:

“Tatou te teu faapelepeleina lenei mafaufauga musuia:

O upu nei ia ola ai.

O le Atua o lo tatou Tama Faalelagi. O i tatou o Ana fanau agaga faapelepele. O le iloaina o lo tatou sootaga ma le Atua, e fesoasoani tatou te malamalama atili ai i le mea na tatou o mai ai, ma pe o a foi tulaga faavavau e mafai ona tatou oo i ai. O le iloa o Ia, e atili ai ona tatou iloa le auala e faalatalata atu ai ia te Ia, ma le ala e tatau ona tatou ola ai ina ia fiafia ai o Ia. O lo tatou nonofo ai i le lalolagi mo se taimi e le tumau, o se vaega lea o se fuafuaga faalelagi o le fiafia, lea na Ia mamanuina, ina ia tatou ola ai i le faatuatua, ina ia maua ai aafiaga faalesoifuaga nei, ma ia tatou agavaa ai e ala i le usiusitai ma le mana o le Togiola, tatou te toe foi atu i Lona afioaga e faavavau.

O lo o outou soifua ma tatou ola i se lalolagi ua iloga i le tele o eseesega: o atunuu eseese, o aganuu, o lanu, ma gagana. I se tasi itu, pe a, e tatau lava ona talitonu se tagata o le tulaga lenei na faamoemoe le Atua e i ai. Ua aoaoina i tatou e le talalelei, e ui lava i nei eseesega, o i tatou uma lava o fanau a le Tama Faalelagi e tasi. O tagata soifua o se aiga e tasi, ma o le mea lea, o i tatou uma lava o uso ma tuafafine.

O le avea ai la ma tuatama ma tuateine, e tatau ona tatou malamalama o le alofa o lo tatou Tama Faalelagi i Lana fanau, e pei lava o soo se tama o le olaga nei. O le faaaloalo, agalelei, lima foai, ma le loto faamagalo, o elemene uma na o le amio e tatau ai mo tagata o le aiga. Sei mafaufau la i le le fiafia o se Tama alofa pe a silasila mai i Lana fanau o soona fai e le tasi le isi.

E puupuu lava le olaga. “E pei o se puao, e aliali mai i se ituaso itiiti, ona mou ai lea” (Iakopo 4:14). I le taimi taua tatou te i ai i le olaga nei, e tele mea e ao ina faia. O nisi o nei mea e sili atu le taua nai lo isi, ma e tatau lava ona tatou faia ni faaiuga atamai. O nisi foi mea e iloagofie lava e sese. O nisi mea e lelei. Ae o nisi foi mea e taua tele pe afai tatou te mananao ina ia tusa ma mea o lo o finagalo ai lo tatou Tama, ma manuia i lo tatou olaga faata’ita’i na faamoemoe i ai.

O faanaunauga o le Tama, e matua maualuluga atu i le na ona afua ai o se ala e ola ai pe tatou te faalolololo ai i matagofie ma fiafiaga o lenei lalolagi, e ui ina ua uma ona faamautinoa mai e le Alii ia i tatou: “E fiafia le Atua ina ua ia tuuina atu nei mea uma i tagata; aua ua faia ia mea ia faaaogaina i le faautauta, ma le tatau ai, ae le soona fai” (MFF 59:20).

O lo tatou galueaiina lelei o lo tatou olaga, a o mataitu atu i faamoemoega moni o le olaga, e faamanuiaina ai i tatou e le gata i le olaga nei ae faapea foi i le olaga a sau. O le usiusitai i poloaiga, ma tausia feagaiga paia ma “galulue ma le naunautai i mea lelei” (MFF 58:27) e mafai ai ona tatou aai ma feinu i le olioli o le faamoemoega, o lo tatou ola ai lea i lenei lalolagi (tagai 2 Nifae 2:25).

Ua tuuina mai e le Alii ia i tatou lenei faamautinoaga faaopoopo: “Ia iloa lenei mea o le faia galuega o le amiotonu, o le a maua ai lona taui, o le filemu lea i lenei lalolagi, ma le olaga faavavau i le lalolagi a sau” (MFF 59:23).

O le mea la lea, o la tatou misiona i le lalolagi nei, e le tele se faiã ma galuega o tatou faigaluega ai i lenei olaga. Peitai, e matua faiã lelei lava ma mea uma tatou te faia e sauniuni ai mo lo tatou taunuuga faale-tino ola pea.

Ou te molimau atu o le ola faaleatua, tatou te toe oo atu ai i le Tama, o le na tuuina mai le ola ia te i tatou iinei, ma o loo toe faatali mai foi mo i tatou i le ola e faavavau.

O le tele o fanau a le Atua o loo ola i ni olaga e pei e le oo mai le aso a taeao, se aso o se iloiloga. Ua na o mea lava e fiafia i ai ua latou faatutumu ai o latou olaga, ia maua oa ma fiafia. O lea tulaga na fai mai ai Nifae, “E moni, e toatele o e faapea mai: Ina aai ia ma inu, ma ia olioli aua o a taeao e oti ai i tatou, e manuia foi i tatou” (2 Nifae 28:7). E toatele i latou ua faateleina lo latou sese i le faia o se faaiuga faapea: “A e ui i lea, ia tatou matatau i le Atua—na te tauamiotonuina le faiga o agasala laiti; ioe, ia tala pepelo laitiiti, ia faaaimamago foi i tagata ona o a latou upu, ia eli foi le lua ina ia pau ai le lua te tuaoi; e le afaina lava nei mea. Ia tatou faia foi nei mea uma, aua o a taeao e oti ai i tatou; afai foi e agasala i tatou, e sasa foi le Atua ia te i tatou i ni nai ta itiiti, a o le iuga e faaolaina i tatou i le malo o le Atua” (2 Nifae 28:8).

Ona o lea ituaiga mafaufauga sese, ua tumu ai le lalolagi i faatosinaga malolosi ma le inosia. Ua tatou vaaia alii talavou ua mumusu e faaipoipo; o tamaitai talavou ua latou faamatuu atu ma le faavalevalea lo latou mamalu [faatamaitai] ona o sootaga faatuinanau; o ulugalii ua mumusu moni lava e fai ni fanau pe ua faia se faaiuga ia na o se “tamaitiiti faapaleina” leaga e faalavelave ai se “aiga” i ni fuafuaga mo tafaoga, o malologa, po o se manuia tetele tau tupe.

Ae ui i lea, e faitau miliona uso ma tuafafine faamaoni i le lalolagi atoa, o loo taumafai i aso taitasi e “tou te ola i upu uma e oo atu mai le fofoga o le Atua” (MFF 84:44). Latou te fuafua ma ola e tusa ai ma le upu ua faaalia a le Tama Faalelagi. Latou te galulue malosi, suesue malosi, ma tatalo malosi foi. Latou te iloa ona gauai atu ma le loto, latou te iloa foi ituaiga mea e fiafia ai. Latou te faalogo i le upu ma usitai foi i le upu. Latou te iloa le uiga o faamanuiaga atoa foi ma faamanuiaga e maua mai le ola ai i le tulafono o le taulaga. E fesoasoani nei tagata faamaoni ma faaalia le faaaloalo i isi. Latou te alolofa ma tausia fanau laiti ma tagata matutua. O amio lelei ma aga faatausala maualuluga o o latou uiga faaalia na, latou te taulamua i faataitaiga lelei i o latou aiga, o tuaoi, ma nuu. E alofa le Atua ma faamanuia ia te i latou. O Ana afioga o upu ia latou te ola ai, o upu “e moni ma e le i’uvale” (MFF 64:31).

O upu ia ola ai. E masani lava ona faigofie ma e tuusao foi. E fesoasoani tatou te manatua ai. Tatou te tausisia ai le ala sa’o. E toe taitai atu ai i tatou i lo tatou Tama Faalelagi ma Lona malologa.

Talosia ia tatou manatua:

I le suafa o Iesu Keriso, amene.