Ia Tuuina Atu le Faafetai i Mea Uma

E poloaiina pea lava ia fanau a le Atua ina ia avae le faafetai. E i ai faataitaiga i le Feagaiga Tuai ma le Feagaiga Fou atoa. Na tusia e le Aposetolo o Paulo, “Ia outou faafetai i mea uma lava: aua o le finagalo lea o le Atua ia te outou, ia Keriso Iesu” (1 Tesalonia 5:18). Na aoao mai le perofeta o Alema, “Pe a e ala i le taeao, ia tumu lou loto i le faafetai i le Atua” (Alema 37:37). Ae o faaaliga i ona po nei na faailoa mai ai e le Alii e faapea “o le talia foi mea uma ma le faafetai o le a faamamaluina; o mea foi o lenei lalolagi o le a faaopoopoina atu ia te ia, e ta’isautuaselau, ioe, e sili atu lava” (MFF 78:19).

Ua tele naua mea e ao ona tatou faafetai atu ai. O le mea muamua lava ma le sili, tatou te faafetai atu mo lo tatou Faaola, o Iesu Keriso. I le fuafuaga a le Tama, na Ia foafoaina ai le lalolagi. E ala mai i Ana perofeta, na Ia faaalia ai le ata o le faaolataga ma poloaiga ma sauniga o loo aumaia faatasi ai. Na Ia afio mai i la le tino nei ina ia aoao ma faaali mai ia i tatou le ala. Na ia puapuagatia ma totogi le tau mo a tatou agasala pe afai o le a tatou salamo. Na Ia tuuina atu Lona soifua ma Ia manumalo ai i le oti ma toetu mai le tuugamau ina ia tatou toe ola uma ai. O Ia o le Malamalama ma le Ola o le Lalolagi. E pei ona aoao mai le Tupu o Peniamina, afai tatou te “avatu le faafetai ma le viiga uma a o [tatou] agaga i le Atua, o Le na faia i [tatou], ma na tausia ma faasaoina i [tatou], ma afai tatou te auauna atu ia te ia ma o [tatou] agaga atoa e fai pea [tatou] ma auauna le aoga” (Mosaea 2:20–21).

Tatou te avae le faafetai mo upumoni faaalia lea e faaali mai ai ia i tatou pe sao pe sese ni mea. E pei ona aoao mai le Tusi Paia, ua tuuina mai e le Alii ia i tatou ia aposetolo ma perofeta “ina ia faaatoatoaina ai le au paia” (tagai Efeso 4:11–12). Tatou te faaaogaina le upumoni faaalia latou te tuuina mai ia i tatou, “ina ia le toe tama ninii i tatou o loo felafoaiina e pei o peau, ma feaveaiina i matagi uma lava o mataupu, i le pepelo o tagata, i togafiti leaga ua saunia e faasese ai” (Efeso 4:14). O tagata o e malamalama lelei i soo se mea matautia e tulai mai ma iloiloina soo se manatu fou e ala lea i le faatusatusaina i upumoni ua faaalia mai e le Atua, e le moomia ona “felafoaiina,” ae mafai ona tutumau ma filemu. O loo i ai le Atua i Ona lagi, ma e mautinoa lava Ana folafolaga. “Aua le atuatuvale,” na Ia fetalai mai ai ia i tatou e faatatau i faatafunaga o le a muamua mai a o lei oo i le iuga o le lalolagi, aua “pe a oo mai nei mea uma lava, tou te iloa ai ua faataunuuina folafolaga na faia ia te outou” (MFF 45:35). E maeu se taula mo le agaga i nei taimi faigata!

Tatou te avae le faafetai mo poloaiga. Latou te faasino mai ia i tatou le ala e aloese ai mai mailei, ma o ni valaaulia i le mauaina o faamanuiaga. O poloaiga e faailogaina le ala ma faaali mai ia i tatou le ala e tau atu i le fiafia i lenei olaga ma le ola e faavavau i le lalolagi a sau.

I le valu masina ua tuanai i Filipaina, sa ou faalogo ai i le tele o molimau i faamanuiaga o le talalelei. I le saunoa ai i le faapaiaga o le falesa a lana uarota, sa faailoa atu ai e se epikopo Filipaina lona loto faafetai mo le savali o le talalelei lea na oo mai i lona olaga i le 10 tausaga talu ai. Na ia faamatalaina le auala na laveaiina ai o ia e le talalelei mai se olaga e tumu i le manatu faapito, faaloloto, ma faiga faataumaoi ma avea ai o ia o se tane ma se tama lelei. Na ia molimau i faamanuiaga na oo mai ia te ia mai le totogiina o lana sefuluai.

I le saunoa ai i se fonotaga a le au taitai, na saunoa ai se fesoasoani i le au peresitene o le siteki, o se loia ma o se taitai o le nuu: “E mafai ona ou faailoa atu i le lalolagi atoa e aunoa ma le masalosalo e faapea o le mea silisili ua tupu i lo’u olaga o le avea lea ma se tagata O Le Ekalesia a Iesu Keriso o le Au Paia o Aso e Gata Ai. Ua … matuai tele ai lava se suiga i lo’u olaga ma lo’u aiga e ui lava ou te lagonaina e tele nisi o mea e tatau ona ou aoaoina ma faaaogaina i lo’u olaga. E moni lava o le Ekalesia o se galuega taua ma le ofoofogia.”

E te le tau malaga atu i Filipaina ina ia e maua ai ni molimau faapena. E matuai iloga lava i soo se mea o loo taliaina ma ola ai i le savali o le talalelei. Ae ma te matuai faafetai lava ma Sister Oaks mo le avanoa ua ma nonofo ma auauna atu ai i Filipaina, lea ua matou feiloai atu ai i le fia afe o tagata lelei i se vaega ese o le lalolagi ma malamalama ai i le talalelei i se isi malamalama fou.

I atunuu o loo tau atiae ai le talalelei tatou te aoaoina ai le taua o le faavaeina o le Ekalesia—ae le na o le aoao atu ma le papatisoina, ae o le faatumauina o tagata fou e ala i le alolofa, e ala i le valaauina ma le faauuina, ma le tausia i le afioga lelei a le Atua. Ua matou aoaoina le taua o le luitauina o tagata o le Ekalesia ina ia lafoaiese ia tu ma aganuu lea e feteenai ma poloaiga ma feagaiga o le talalelei ma ia ola ina ia “le toe tagata ese po o e ua aumau i latou ma a latou fanau, a ua nuu faatasi ma le au paia, o le aiga foi o le Atua; … o loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:19–20).

O tagata latou te faia lenei mea e avea ma vaega o le aganuu i le lalolagi atoa o le talalelei o poloaiga ma feagaiga ma sauniga ma faamanuiaga. O tagata faapena latou te iloaina “se faaliliuina tele” i o latou loto, “ua le toe i ai so [latou] manatu e fai amio leaga, ae fia fai pea lava le amio lelei” (Mosaea 5:2). O foliga o le Atua “e vaaia i o [latou] mata” (Alema 5:19). O soo faapea o Keriso o loo maua i soo se atunuu ua faavaeina ai le talalelei ma le Ekalesia. E toatele i latou faapena i Filipaina, ma o loo matou galulue ina ia uunaiina ia toatele i latou. Matou te faia lenei mea i le atiina ae lea mai vaega o loo matuai malolosi ai lava tagata, e taulai atu la matou aoaoga i vaega o loo lava ai ni vaega toatele o tagata tautino e tuuina atu le faauo, o aoaoga, o faataitaiga, ma fesoasoaniga moomia i tagata fou o e faatoa papatisoina ma o loo tauivi ina ia aoaoina po o a mea o loo faamoemoeina mai tagata o le Ekalesia ma ua amata ona aoao i faamanuiaga e maua e tagata o le Ekalesia.

O faaaliga, tatou te faafetai tele i ai, o loo faaali mai ai e tatau ona tatou faafetai atu foi mo faigata aua e liliu atu ai o tatou loto i le Atua ma tuuina mai ai avanoa tatou te alualu ai i luma ma avea ma tagata o loo finagalo i ai le Atua. Na aoaoina e le Alii le perofeta o Moronae, “Ou te tuuina atu i tagata le vaivai, ina ia latou faamaulalo ai,” ona folafola mai lea e faapea “afai latou te faamaulalo … ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27). I le totonugalemu o sauaga na puapuagatia ai le Au Paia o Aso e Gata Ai i Misuri, na tuuina atu ai foi e le Alii se aoaoga ma se folafolaga faapea: “E moni ou te fai atu ia te outou au uo e, ‘aua le fefefe, ia faamafanafanaina o outou loto; ioe, ia olioli e faavavau, ma ave a’e le faafetai i mea uma lava; … o mea uma foi na puapuagatia ai outou o le a galulue faatasi mo lo outou lelei” (MFF 98:1, 3). Ma ia Iosefa Samita i puapuaga i le Falepuipui o Liperate, na fetalai atu ai le Alii, “Ia e iloa ai, lo’u atalii e, e tuuina atu ia te oe le poto masani ona o ia mea uma, ma avea mou lelei” (MFF 122:7). Na malamalama lelei ia Polika Iaga. Na ia saunoa, “E aunoa ma se tulaga se tasi o le olaga [po o] se itula se tasi o se malamalamaaga o se tasi e le o faamanuiaina ai i latou uma o loo latou suesueina, ma faamoemoe ina ia faaleleia atili ai lo latou malamalamaaga ua latou mauaina” (Aoaoga a Peresitene o le Ekalesia: Polika Iaga, [1997] i. 179).

E pei ona fai mai se tasi, e i ai se eseesega tele i le va o le malamalama o le 20 tausaga ma le malamalama e 1 le tausaga ae faa 20 ona fai. Afai tatou te malamalama i aoaoga ma folafolaga a le Alii, o le a tatou aoao ma alualu i luma mai o tatou faigata.

O le tele o aoaoga musuia a o tatou perofeta o aso nei o loo tuufaatasia i totonu O Aoaoga a Peresitene o le Ekalesia, o a tatou mataupu e aoaoina i le Perisitua Mekisateko ma le Aualofa. O mataupu autu ma mataupu faavae e faavavau o loo aofia ai i nei tusi o punavai ia o le atamai ma le taitaiga faalelagi. O faiaoga atamamai i totonu o uarota ma paranesi o le a le suitulagaina i a latou lava mataupu ma malamalama, ae taulai atu i aoaoga musuia ma le latou faatinoga o tulaga o loo i ai nei faapea ma luitau.

Mo se faataitaiga, i le tusi o loo i ai nei tatou te faitau ai i upu nei a Peresitene Ioane Teila i le mataupu o le loto faafetai mo puapuaga: “E tele mea ua tatou aoaoina e ala i puapuaga. Tatou te ta’ua o puapuaga. Ou te faaigoaina o se aoga e maua ai le poto masani… . Na o le pau la’u vaaiga i nei mea, o tofotofoga mo le faamoemoe e faamamaina atoatoa ai le Au Paia a le Atua ina ia mafai ai, e faapei ona ta’u mai e tusitusiga paia, ona avea ma se ario ua faafitu ona faamamaina i le afi” (Aoaoga a Peresitene o le Ekalesia: Ioane Teila [2001], i. 217). O paionia e pei o Peresitene Ioane Teila, o le na molimauina le fasiotia o le perofeta ma malamalama i sauaga faigata ma le faaumiumi ma le matautia ona o lo latou faatuatua, na viia le Atua ma faafetai atu ia te Ia. O o latou luitau ma le lototetele ma gaoioiga musuia sa latou aveina ina ia faafetaiaia ai, sa latou alualu ai i luma i le faatuatua ma le faaleagaga. O lo latou faigata na avea ai i latou ma tagata na finagalo i ai le Atua ina ia latou oo i ai, ma latou faataatia ai le faavae o le galuega sili lea ua faamanuiaina ai o tatou olaga i aso nei.

E pei o paionia, e tatau foi ona tatou faafetai atu i le Atua mo o tatou faigata, ma tatalo mo le taitaiga ina ia faatoilaloina ai. O lena uiga ma lo tatou faatuatua ma le usiusitai, o le a aoga ai ia folafolaga ua tuuina mai e le Atua ia i tatou. O se vaega uma lava o le fuafuaga.

Ou te fiafia tele i le pese ma le ata o le Fiddler on the Roof. O lena tala na usuina ai e se tama Iutaia le pese “If I Were a Rich Man.” E manatua pea lana tatalo lea na faaiuina i lana fesili aioi lenei:

Ioe, Tevye, e afaina ai. Ia tatou faafetai atu mo ituaiga tagata e i ai i tatou ma tulaga ua tuuina mai e le Atua mo la tatou faigamalaga i la le olaga nei.

I aso anamua na aoao atu ai e le perofeta o Liae lenei upu moni i lona atalii o Iakopo:

“Na tigaina foi oe i puapuaga ma le faanoanoa tele ina o e tama itiiti ona o le faalevao o ou uso.

“A e ui i lea, Iakopo e, o lo’u atalii muamua na fanau i le vao, ua e iloa le silisiliese o le Atua, na te faapaiaina ou puapuaga e fai mou manuia” (2 Nifae 2:1–2).

E fiafia tele lo’u tina i lena mau ma sa ola ai i lona mataupu faavae. O le mafatiaga sili i lona olaga o le maliu lea o lana tane, lo’u tama, ae faatoa 11 tausaga o le faaipoipoga. O lea na suia ai lona olaga ma oo atu ai faigata silisili a o ia taumafai atu na o ia e sailia se tupe e tausi ai o ia ma lana fanau laiti e toatolu. Ae ui i lea, sa masani ona ou faalogo ia te ia o fai mai o le Alii na te faapaiaina ona puapuaga e fai mona manuia, ona o le maliu o lana tane ua uunaia ai o ia e atiina ae ana taleni ma auauna atu ma atiina ae se mea na semanu ona le mafaia e aunoa ma lena faalavelave. O lo matou tina o se sauai faaleagaga, e matuai malosi ma agavaa atoatoa i moomooga alofa na tusia e lana fanau e toatolu i le maa o lona tuugamau: “O Lona Faatuatua na Faamalosia Uma Ai.”

O faamanuiaga e mafua mai i faigata e faalauteleina atu i isi. Ou te iloa o se faamanuiaga le tausiaina e se tina ua maliu lana tane o lana fanau sa vave ona aoao ina ia iloa ona galulue ma le malolosi. Ou te iloa o le tele o tupe ma le tele o le taimi avanoa e sili atu ona faigata nai lo le tau leai o ni tupe ae galulue malolosi. Ou te iloa foi o faigata e mafai ona malolosi ai tagata ma e atiina ae le faatuatua i se tulaga e le mafai ona tatou iloaina atu i luma.

Pe a tatou faafetai atu i mea uma, tatou te vaaia lava ia faigata ma mea matautia i tua atu o faamoemoega o le olaga. Na auina mai i tatou iinei ina ia tofotofoina. E tatau ona i ai le faafeagai i mea uma. E tatau ona tatou aoao ma alualu i luma e ala i lena faafeagai, e ala i le faafetaiaia o o tatou luitau faapea ma le aoaoina atu o isi ina ia faia foi faapea. Ua tuuina mai e lo matou uso pele o Elder Neal A. Maxwell, se faataitaiga mamalu o lenei mea ia i tatou. O lona lototele, o lona uiga usiusitai i le taliaina o lona mafatiaga i le kanesa, ma lona faamaoni i le faauauaina o lana auaunaga ua tuuina atu ai le faamafanafanaga i le fiaafe ma aoaoina atu ai ia mataupu faavae o le faavavau i le faitau miliona. O lana faataitaiga ua faaalia mai ai o le a le gata e faapaiaina e le Alii o tatou puapuaga mo lo tatou manuia, ae o le a Ia faaaogaina foi e faamanuia ai olaga o le toatele o isi.

Na aoao atu e Iesu lenei lesona ina ua feiloai o Ia ma Ona soo ma se tagata na fanau mai o tauaso. “Po o ai ea na agasala, po o ia nei, po o ona matua, ina ua fanau mai o ia o tauaso?” sa fesili atu ai le au soo. “E lei agasala lenei tagata po o ona matua,” na tali atu ai Iesu. Na fanau mai o ia o tauaso “ina ia faaalia ai o galuega a le Atua ia te ia” (Ioane 9:2–3).

Afai tatou te vaai atu i le olaga i se vaaiga faaleagaga, e mafai ona tatou iloaina atu ia faataitaiga o galuega a le Atua o loo faalauteleina mai e ala i faigata e oo i Ana fanau. E masani ona ou asiasi atu i le Maa Faamanatu o le Taua a Amerika i Manila. Ia te au, o se nofoaga paia lena. O le nofoaga o loo lagomau ai le silia ma le 17,000 fitafita, o seila ma tagata o le fuavaalele o e na maliliu i fetauaiga i le Pasefika i le Taua Lona II o le Lalolagi. O loo faamanatuina ai foi i le Maa Faamanatu ia le silia ma le 36,000 isi tagata o le vaegaau o e na maliliu ae lei mafai ona maua o latou tino. A o ou savalivali ai i papuipui matagofie lea o loo tusia ai o latou igoa ma setete e malaga mai ai, sa ou vaaia ai le toatele ou te matea o ni Au Paia o Aso e Gata Ai faamaoni.

I le toe mafaufau atu i e na maliliu i taimi o le taua, o le toatele o tagata agavaa ma le lelei o le Ekalesia ma le tele o mafatiaga na oo i e pele ia i latou ona o lenei mea, sa ou manatunatu ai i le faaaliga maoae na vaaia e Peresitene Iosefa F. Samita o loo tusia i le vaega e 138 o le Mataupu Faavae ma Feagaiga. Na ia vaaia ai le “manomano” o agaga amiotonu, “o e sa faamaoni i le molimau ia Iesu a o latou i ai i la le tino” (f. 12). Sa faatulagaina i latou ma tofiaina e avea ma avefeau, “ua faaofuina i le mana ma le pule, ma tofia i latou … ma avatu le malamalama o le talalelei ia i latou sa i ai i le pogisa, … ma sa faapea ona talaiina ai le talalelei i e ua oti” (f. 30). I le manatunatu atu i lenei faaaliga ma le manatuaina o le fia miliona o e na maliliu i le taua, ou te olioli ai i le fuafuaga a le Alii lea na liliuina ai ia faigata o le oti o le toatele o tagata amiotonu ma avea ma faamanuiaga o avefeau amiotonu e talai atu le talalelei i le toatele o o latou uso a fitafita na maliliu.

Afai tatou te malamalama i lenei mataupu faavae, e faapea ua ofoina mai e le Atua ia i tatou ia avanoa mo faamanuiaga ma faamanuiaina i tatou e ala i o tatou lava faigata faapea ma faigata o isi, ua tatou malamalama foi i le mafuaaga na Ia poloaiina soo ai i tatou ina ia “faafetai atu i le Alii lou Atua i mea uma” (MFF 59:7).

Ou te tatalo ina ia faamanuiaina i tatou i le malamalama ma le upu moni ma le faamoemoega o mataupu autu ma poloaiga na ou faamatalaina atu ma o le a lava lo tatou faamaoni ma le malolosi e faafetai atu ai i mea uma lava. Ou te molimau atu o Iesu Keriso, o lo tatou Faaola ma le Togiola ma le Foafoa, o le tatou te faafetai atu i ai, i le suafa o Iesu Keriso, amene.