O Le Faai o le Tevolo

Ou uso pele o le perisitua, o le afiafi nei ou te fia tuuina atu ai au faamatalaga ia te outou uma ae patino lava i alii talavou. O lo’u faamoemoe ia aoaoina ma lapataia outou i mea matautia o loo i luma atu, ae ou te fia faailoa atu ai foi ma lo’u alofa mo outou, ma le lagona mautinoa tele o ia te au e uiga ia te outou le tupulaga fai ae.

Sa ou faamisiona i Pasila a o avea au ma se alii talavou. O se aafiaga ofoofogia. O se tasi o nofoaga mataina i le lalolagi i lena atunuu tele o le Afu lea o Iguaçu. I le vaitau o lologa, o tele o le vai e tafe ifo mai luga o le afu o se aofaiga sili lea ona tele i le lalolagi. O minute uma lava, e faitau miliona ia kalone o le vai e tafe ifo i le vanu i lalo. O se tasi vaega o le afu, lea e mamafa i ai le palasi o le vai, e taua o le Faai o le Tevolo.

E i ai ni maa lapopoa e laula tonu a’e lava i luga o le vai a o lei tafe atu le vai i lalo i le Faai o le Tevolo. I tausaga ua mavae, e ave ai e ni tagata alovaa le taupulea ia ni pasese i vaaalo ina ia tutu ai i luga o na maa ma tilotilo ifo i lalo i le Faai o le Tevolo. O le vai i luga a’e e masani lava ona malu ma e tafetafe malie, ma e toafilemu le siosiomaga. E na o le gogolo o le vai i lalo ifo e mua’i lapataia ai i le tulaga matautia lea e na o ni nai futu lava le mamao ese. O se tafe malosi e lei faamoemoeina e mafai ona tafea atu ai se vaaalo i le vai tatafe, ma oo atu ai i luga o augutu, ma tafea atu ai i totonu o le Faai o le Tevolo. E sili atu ona faavalevalea ia ni tagata e o ese ma vaaalo ina ia tutu ai i luga o na maa taufaasese ma le susu lea e faigofie lava ona see ma tafea atu ai i le au tatafe o loo i lalo ifo.

Ua ou iloaina o nisi o outou ua manatu o outou o ni tagata e le fefefe, ua saunia e talia e toetoe lava o soo se luitau. Ae o nisi o nei tafaoga mo le fiafia o le a iu ai ina ave atu ai oe i lalo i le Faai o le Tevolo. E na o le pau le auala saogalemu o le ‘alo’alo mamao ese lea mai tulaga matautia o le Faai o le Tevolo. E pei ona lapatai malosi mai ia Peresitene Siaosi Alapati Samita, “Afai e te sopoia le laina i le itu a le tiapolo i se inisi e tasi, ua maua oe i le malosiaga o le na te faaosooso, ma afai e faamanuiaina o ia, o le a le mafai ona e mafaufau lelei pe faautauta foi aua o le a e le toe mauaina le Agaga o le Alii.”¹

O nisi o outou alii talavou atonu tou te tuuina atu i nisi e faia o outou tulaga faatonuina. Ua outou puipuia outou lava i le faapea atu, “O ai e fai mai e le mafai ona tatou faia le mea lenei, pe le tatau foi ona tatou faia le mea le la?” E tele naua vaega o le sao ma le sese lea e tatau ona fuafua e outou uma taitoatasi po o fea e tatau ona gata mai ai. Ou te uunaia malosi outou afai e i ai soo se fesili i o outou mafaufau po o loto e uiga i le sao po o le sese o lau amio, aua e te faia. E tofu i tatou uma ma le saolotoga o amioga ma le meaalofa o le Agaga Paia lea o le a faamaninoina mai ia i tatou le mea e sao ma le mea e sese, tonu po o le le tonu. O le tiutetauave o perofeta a le Atua le aoao atu o le afioga a le Atua, ae le o le tauina atu i tagata ia iota uma o le amio e tatau ona i ai. Afai tatou te taumafai ma le faaeteete e aloese e le gata i le tiapolo ae o mea foi e foliga mai e tiapoloa, o le a tatou faia mo i tatou lava ae le seiloga e tau faatonuina.²

O le tele o mea e sau mai le tiapolo e taufaasese ma faatosina. E feilafi ma faatosina i vaega faaletino o lo tatou natura. O lana savali e logo lelei ma e faigofie ona faamaoniaina. O lona leo e masani ona malu ma taufaasese. Afai e maatiati ma le manaia semanu e leai se isi e faalogo atu i ai, semanu e leai se isi e faaseseina. O nisi o savali sili ona faatosina a Satani o le: O loo faia lava e tagata uma; afai e le o tiga ai soo se tasi, e leai la se afaina; afai e te lagonaina e leai se leaga o i ai, e leai la se afaina; o mea ua “taliaina” e fai. O Satani o le faafoliga sili lea, o le matai o le taufaasese, o le tufuga o le faia o se mea e le moni ia pei lava e moni, ma o le pepelo silisili ua i ai i le talafaasolopito o le lalolagi. E oo mai o ia i o tatou olaga e pei o se gaoi i le po. O lana togafiti e matuai lelei lava lea e matuai faigata ai lava ona iloaina o ia ma ana auala. O ia o se luko e ofu mai i fulufulu mamoe.

O loo i ai pea lava ia malosiaga faatautee sili e lua i le lalolagi. Na amataina lenei mea a o lei foafoaina le lalolagi. O nei malosiaga faafeagai o malosiaga ia o le lelei ma le leaga. O le va o nei malosiaga e lua o loo fetosoaiina ai i tatou. I ni faaupuga faigofie, o mea e lelei e mai le Atua ae o mea e leaga e mai le tiapolo.³ E le mafai ona e mauaina uma ia itu e lua ma maua ai le fiafia; o nisi ua latou taumafaia, ae o lo latou taunuuga uma lava o le faatoilaloina. Afai e i ai soo se tasi o outou alii talavou e manatu e mafai ona e mauaina ia itu uma, ua na o lou faaseseina o oe lava ia. E le faapena ona faia. E lei faapena lava. O le a le faapena lava.

Au uo talavou pele e, e i ai se isi upumoni maoae e tatau ona aoaoina e outou alii talavou. Soo se mea lava e i ai sona tau. E i ai se tau e totogia mo le faamanuiaina, faataunuuina, ausiaina, ma le olioli. E leai se mea e maua fua. Afai tou te le totogia le tau e moomia mo le faamanuiaina, o le a outou totogia le tau o le faatoilaloina. O sauniuniga, galue, suesue, ma le auauna atu e moomia ina ia ausia ma maua ai le fiafia. O le le usiusitai ma le le lava o sauniuniga e i ai ni ona taunuuga matautia. I le avea ai ma e ua umia le perisitua a lenei Ekalesia, o le vaega o le tau e moomia ona tatou totogia o le ola lea ia ese mai le lalolagi. O i tatou o loo umia ma tausia ia nei mana e faatonutonu ai lea e mafai ma e faasolomuli ai le mana o Satani i le lalolagi. Ou te aioi atu ma lo’u loto atoa ia te outou ina ia fesoasoani mai faamolemole ia i matou e tulei i tua le lalolagi. E tatau ona tatou tutu e tetee atu i le matagi. O nisi taimi e le saafi pe fiafia mai tagata ia i tatou ona faapea ifo lea, “E le sa’o lenei mea.”

Tatou te mananao uma lava e saili po o ai moni lava i tatou ae o le a lo tatou tulaga i le lalolagi. O nisi o outou le au talavou o loo taumafai e saili lou tagata moni e ala lea i le faaeseina o oe mai o outou matua ma aiga ma lo latou faamoemoega. Na faia i tatou uma e le Atua ina ia ese mai le isi i le lalolagi, e pei ona faamaonia mai i DNA ma tulaga lima. E te le tau galue e toe tau sue se isi ou faasinomaga; o lena ua ia te oe.

O nisi o tagata talavou o loo mananao e tetee i mea o loo taofiofia ai. O nisi o outou ua manatu e le o se mea “lelei” le usiusitai i o outou matua, po o le mulimuli foi i fautuaga a lau epikopo po o le peresitene o le korama. Na faasoa mai e Epikopo Richard C. Edgley se mea na oo i ai a o talavou o ia e uiga i aafiaga o le le taupulea ma le le usiusitai:

“A o ou talavou, o le matou fale taavale ma le fale taavale o lo matou tuaoi e na o le lima futu le valavala. O le fale taavale o le tuaoi ua tuai lava ma malepelepe ma o nisi o laupapa ua gaui. E masani ona ou a’e i luga o le matou fale taavale ma oso atu mai le isi fale taavale i le isi ma taalo ai i luga. Na ta’u mai e lo’u tama ia te au, ‘Aluese ma luga o fale taavale,’ ae leai. I se tasi taimi sa ou taalo ai i luga, sa ou oso ai mai le matou fale taavale ma pa’u ifo ai i luga o le taualuga o le fale taavale o lo matou tuaoi, ma maosiosia leaga ai lo’u tua ma o’u vae. Talu ai ona sa ou le usiusitai, sa ou mafaufau faavalea ai ou te le ta’uina atu lava i se tasi e faapea na ou lavea. Sa ou alu atu i le fale ma fufulu uma ia maosiosia ma mafoefoe sa mafai ona ou faia, ae sa le mafai ona au o’u lima i maosiosia sa i lo’u tua e tuu i ai se vailaau pe fufulu foi ia mama. Sa ou tauaveina le avega o le tiga, ma le popole ina ne’i aloua, ma tausalaina ai i nai aso a o tau faapepeina o’u manua.”⁴

E pei ona saunoa mai se tasi, “O se tasi o mea sili i le lalolagi o le avea lea ma se tamaitiiti; e leai se aafiaga e moomia ai, ae moomia ai sina faataitaiga o le avea ma se tama lelei.”⁵

O nisi o outou ua faaseseina i le manatu faapea e mafai ona e maua le fiafia i le faataitaia o fualaau faasaina, ava malosi, tusi ma ata mataga, ma feusuaiga faasolitulafono. Ou te lapataia outou, o ia ituaiga faaosoosoga e pei lava le maseesee ma le matautia o maa o loo i le Faai o le Tevolo, o le a latou taitaiina atu ai oe i le itu a Satani. O le alu ese mai lena ituaiga matautia e faigata, ma o le a tuua ai oe ma nai maosiosia ma nai mafoefoe.

O outou alii talavou o le a outou galueaina lo outou taunuuga e faavavau i se taimi maoae. O le a faaauauina lea i le lumanai le faateleina o sailiga faasaienisi ma mea e gaosia lea o le a matuai faafaigofie ma sologa lelei ai le olaga mo le toatele. E le masalomia o le a faaauauina pea le sailia e le tomai faafomai o togafitiga ma fofo e le o mafai ona maua i le taimi nei. I le faatusatusa atu i ai, o aafiaga faalelalolagi o mea leaga o le a foliga mai o le a faateteleina ma e toatele tagata o le a taliaina le taufaasese ma faatosinaga a Satani. O outou alii talavou o le a moomia ona malolosi i le faaleagaga ma amioga ina ia mafai ai ona tetee atu i faaosoosoga ma mailei a le lalolagi. Atonu o le mafuaaga lea na faapolopoloina ai agaga faapitoa faapenei mo le taimi lenei.

Ou te talitonu foi o feteenaiga mai ia Satani o le a sili atu ona faitogafiti ma sili ona maua gofie i le lumanai. E ui o nisi auala o le a matuai sili atu ona iloga, ae o le a faamatapulepuleina i le mau taufaasese ma le faatogafiti. O le a tatou moomia le tele o le faaleagaga ina ia iloa ai ituaiga mea leaga uma ma le malosi sili e teenaina ai.

E toatele atunuu o loo feagai nei ma tulaga matautia o faiga faatupu faalavelave. O taua ua mafua ai ona oo atu tagata i le faamanua tagata ae ua oo atu ai foi i le faaleagaina o uiga lelei. O i tatou o e sa auauna atu i le militeli i taimi o taua ua oo i ai le aafiaga o le le mautonu i le olaga lea e mafua mai ona o le alu ese mai le fale ma le aiga, o fegalegaleaiga lelei, ma aafiaga o le Ekalesia faatulagaina. Ou te lapataia outou o loo auauna nei i le militeli, po o e foi e mafai ona i ai, mai mailei a nei mea e faalavelaveina ai. E mafai ona aveina atu ai i tatou i augutu o le Faai o le Tevolo.

O le tele o gaoioiga o le a e auai atu i ai e faia lea faavaega lea e le mafai ai pea ona e filifilia lau lava vaega. Ae e mafai ona e filifilia ou faatulagaga. I totonu o le militeli o le a e auai atu ai i se iunite lea e maua mai se vaega o lona malosiaga mai le lotogatasi o ona tagata. E moomia ona e faamaoni i tagata o lau iunite aua o le tagata o loo oulua sosoo atonu na te faasaoina lou ola taeao! Ae le faapea la o le a e tuuina ai i lalo ou faatulagaga. I soo se faalapotopotoga lava e moomia lava ona i ai se tasi po o nisi foi e tulai ma faapea atu, “E le o sao le mea o loo tatou faia.“ E moomia ai le lototele faamaoni e faia ai lenei mea!

Na faasalalauina talu ai nei e le Ekalesia se lomiga a tagata o le vaegaau o le “O Mataupu o le Talalelei” mo tagata o le Ekalesia o loo auauna atu i le militeli i soo se vaega o le lalolagi. E ui e na o le faaPeretania o loo maua ai nei, ae o le a faaliliuina i isi gagana. O lenei puna’oa matagofie o loo aofia ai faatonuga mo gaoioiga a le Ekalesia ma le laeiina o le ofusa i le militeli, o faauuga ma faamanuiaga o le perisitua, autu o le talalelei, ma nai viiga filifilia. Sa matou mauaina foi se puna’oa faapea na tuuina mai ia i matou o e sa auauna atu i le militeli i le Taua Lona II o le Lalolagi. Sa ou iloaina lona taua tele.

O loo i ai pea se faiga o loo faaauauina pea o le vaimamaina. E faamanatu mai ai ia i tatou le faataoto i le saito ma le titania. Na fetalai ai le Alii i lena faataoto e faapea, “Ua faatusaina le malo o le lagi i le tagata na luluina le saito lelei i lona fanua,” a o moe o ia, na alu ane le fili ma lulu le titania i totonu o le saito, ina ua tatupu a’e le saito, sa faapena foi i le titania. Sa le malamalama ia auauna a le matai pe na faapefea ona oo atu le titania i le fanua ma sa latou fesili atu ai pe tatau ona latou o atu ma vele ese le titania. Sa tali atu le pule o le fanua e aua, ina ne’i o latou liai ma le saito pe a latou vele ese le titania. O lea na ia fautua atu ai ina ia tuu ia, ia tupu lua pea seia oo i le seleselega lea o le a fusifusia ai le saito ma tuueseeseina mai le titania.

Sa fesili atu le au soo o Iesu i le Faaola mo se faamatalaina o le faataoto ma sa tali le Faaola, “O le lulu saito, o le Atalii lea o le tagata;

“O le fanua o le lalolagi lea; o le saito lelei o tagata ia o le malo; o le titania, o le fanau ia a le ua leaga;

“O le ua ita mai na na luluina ia mea, o le tiapolo lea; … o e selesele, o agelu ia.

“O lea e pei ona faaputuina ai o le titania, ma susunuina i le afi; e faapea foi ona faia i le gataaga o lenei lalolagi.”⁷

O lenei faataoto ua faamautuina ai le saunoaga a Alema lea ou te toe fia tauina atu, “E mai le Atua mea lelei uma, a e mai le tiapolo mea leaga uma.”⁸

Uso e, o loo tatou ola i se vaitaimi luitauina, ma o se taimi tatou te tutu mausali ai ma le malosi i le ausiaina o o tatou tiute faaleaiga ma le faaleperisitua. E le tatau ona fesouaina i tatou “e pei o peau o le sami ua sousou i le matagi ma felafolafoaiina.”⁹ E tatau ona tatou agai i luma i se agaga o le faatuatua, ma aua le fefe i soo se mea sei vagana ai le latalata tele atu i le Faai o le Tevolo. O le a faamalosia ma faasaoina i tatou pe afai o le a tatou mulimuli i le fautuaga ma le taitaiga a Peresitene Gordon B. Hinckley, o le o loo taitai. E i ai sa’u molimau faapitoa o ia o lo tatou perofeta, tagatavaai, ma le tali faaaliga. O ia o le fofoga tulei o le Atua i le lalolagi i aso nei. Ou te tatalo ina ia i ai faamanuiaga a le Alii ia i tatou uma, i le suafa o Iesu Keriso, amene.