“E Mafai ona Ou Tatalo i le Tama Faalelagi i Soo se Taimi, i Soo se Nofoaga“

O’u uso e ma tuagane laiti, e mafai ona outou mafaufau i le taimi mulimuli na outou maua ai ni tali i a outou tatalo? Pe o le taimi ea na leiloa ai sau mea? Pe o le taimi ea na e fefe ai? Pe atonu o se taimi na e ma’i ai pe ma’i ai foi se tagata e te alofa i ai. Sa ou tatalo foi i taimi faapena.

O fea sa e i ai i le taimi mulimuli na e tatalo ai? E tele nofoaga sa ou tatalo ai. Sa ou tatalo i le matafaga, o mauga, o le lotu, ma le malae taalo. Sa ou tatalo i lo’u fale, i totonu o le vaalele, ma le falemai. Ou te iloa e mafai ona ou tatalo i le Tama Faalelagi i soo se taimi, ma soo se nofoaga. Ou te iloa e faafofoga mai o Ia ia te au.

Se’i ou faamatalaina atu se tala i ni tamaiti se toalua—o se tamaitiiti e tusa ma le ono tausaga le matua ma se teineitiiti faatoa atoa lona fitu. Sa alu le latou tietiega ma lo la’ua tama i le Sipi tuai a lo la tama matua. E tasi ma le afa itula talu ona o, ae amata loa ona ese le pa’o o le Sipi. Sa pe a’o afe atu i se pamu kesi i le taulaga na sosoo ai. “E mafai ona matou faia,” o le tala lea a le tama faigaluega i le pamu, ma sa ia faasino i latou e savavali i le taulaga i se faleoloa e faatau ai totoga o taavale. Ina ua taunuu i latou i le faleoloa, sa tele mea sa matamata i ai tamaiti, ma sa la le iloa ai le taimi na o ai lo la’ua tama i tua ma le alii pule. Na pau lava le mea sa la iloa, o le le mafai lea ona la vaai atu ia te ia. Sa la autilo i fafo ma vaaia ai se tagata o savali atu i le auala ma sona pulou e pei o le pulou o lo la’ua tama. —Faatoa afe o ia i le pioga, o lea na la taufetuli atu loa i ai ma tauvalaau, “Papa! Papa!”

E oo ifo i le taimi na la iloa ai e le o lo la tama, a ua se i la’ua. Sa le mafai ona la maua le faleoloa, sa la le iloaina po o fea la ua i ai, ma la te le iloaina foi se tagata i lena aai. Sa manao le teineitiiti e alu i le tasi ala; ae manatu le tama e tatau ona alu i le isi itu. E mafai faapefea ona la mauaina lo la’ua tama, a le o lena foi, o le Sipi? Fai mai le teineitiiti, “E tatau ona ta tatalo.” Sa lagona e le tamaitiiti le matamuli e tatalo i nofoaga faitele, ae ina ua mae’a le la tatalo, sa amata ona la savavali i le itu e tasi. Sa la mauaina le pamu kesi, ma tolotolo ai loa i totonu o le Sipi ma faatalitali ai. E le’i leva—sa foliga mai o se taimi umi tele mo i la’ua—ae sau lo la’ua tama. Sa tatalo foi o ia ina ia vave ona ia mauaina [lana fanau].

I totonu o tusitusiga paia, e tele tala e uiga i tali o tatalo—tou te manatuaina na tala? Sa ta’u atu ia Nifae le auala e fau ai se vaa ma le nofoaga e maua ai meaai. Sa tatalo Tanielu ia puipuia o ia mai leona; Sa tatalo Enosa i le aso atoa ma le po ina ia faamagaloina ana agasala; Sa tatalo Hana ina ia maua sana pepe. O le tala e sili ona ou fiafia i ai o tala e uiga i le tatalo, o le tala i se tama talavou sa manao na te iloaina se mea. Sa fia iloa e ia po o le fea Ekalesia e tatau ona auai. Sa saili foi e ana uo ma lona aiga ni lotu e auai. Sa ia le iloaina pe o le fea lotu e sa’o. Sa na o le 14 tausaga o lona matua.

I se tasi aso, sa faitauina ai e Iosefa Samita le Tusi Paia, ma o le mea lea sa ia faitauina, “Ae afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua; ona foaiina mai ai lea ia te ia.” Oka, e ese le mamana o lena mau ia te ia! E le’i tatalo leotele lava o ia muamua, ae sa manaomia e ia se tali ma sa talitonu o ia i le mau. Ma lona lotomaualalo, sa alu atu ai o ia i se togavao e latalata ane i lona fale, ma sa ia tootuli ma amata loa ona tatalo. O se tatalo matua taua tele lenei ma o le ala lea na faamata’uina ai lenei tamaitiiti talavou faifaatoaga e mana o le pogisa, peitai sa tagi atu o ia i le Atua mo se fesoasoani. A o tatalo o ia sa oo ifo se malamalama ae mou atu le pogisa. Sa vaaia e le tamaitiiti ni tagata se toalua o tutu mai i le malamalama. Sa fai mai le tasi o i la’ua ia te ia, ma tusi atu lona lima i le isi, “O lo’u Atalii pele lenei, faalogo ia te Ia!” (Talafaasolopito—Iosefa Samita 2:17). O le Atua le Tama ma Lona Alo o Iesu Keriso.

Pe a ou mafaufau i lena tala, ou te mafaufau ai foi i la’u fanau. Sa faamisiona i latou uma i fafo atu o le Iunaite Setete. Sa tatau ona aoao e i latou taitoatasi se gagana fou. O se tasi o mea sa latou aoaoina e fetufaai atu i a latou gagana fou, o le tala lea i le tatalo a Iosefa Samita. Aisea na latou aoaoina ai lena tala? Aua foi o tagata sa latou aoaoina, e tatau ona latou iloa sa filifilia e le Tama Faalelagi ma Iesu ia Iosefa Samita e fai ma perofeta na te toefuataiina tasi le talalelei ma le Ekalesia a Iesu Keriso i le lalolagi. Ma e tatau foi ona iloa e tagata, e faapei ona maua e Iosefa Samita o le tali i lana tatalo, e mafai foi e i latou ona tatalo i le Tama Faalelagi ma maua tali o a latou tatalo. O le a tali mai foi o Ia i a outou tatalo. Ou te iloa e mafai ona tatou tatalo i le Tama Faalelagi i soo se taimi, i soo se nofoaga, ma ou te matua faafetai lava ona o le mafai ona tatou faia.

O la’u molimau lenei e faitau i tamatamailima o le isi o’u lima:

1. Ou te iloa o le Atua o lo tatou Tama i le Lagi ma e alofa o Ia ia te i tatou.

2. O Iesu Keriso o Lona Alo, o lo tatou Faaola ma le Togiola.

3. O Iosefa Samita o se perofeta a le Atua. Sa ia faaliliuina le Tusi a Mamona e ala i le mea foaifua ma le mana o le Atua.

4. O Le Ekalesia a Iesu Keriso o le Au Paia o Aso e Gata Ai o le Ekalesia lea a le Alii i luga o le fogaeleele i aso nei.

5. O le perofeta soifua, o Peresitene Gordon B. Hinckley.

I le suafa o Iesu Keriso, amene.