Faaipoipoga e Faavavau

I ni nai tausaga ua mavae, sa ma o ai ma lo’u toalua i se taumafataga o se faaipoipoga sa faia i fafo i se togalaau. O le aso lava lena i le taeao, sa matou i ai i le malumalu, i le mea sa faaipoipo ai ni talavou se toalua ma te iloa, mo le olaga nei ma le faavavau atoa. Sa matua alofa le tasi i le isi. O le auala na feiloai ai i la’ua e toetoe lava o se vavega. Sa tele loimata na maligi. Sa ma tutu i le laina e faafeiloai ai le au valaaulia, i le faaiuga o se aso manaia atoatoa. O luma atu o maua sa i ai se uo mafana a le aiga. Ina ua latalata mai o ia i le ulugalii, sa tu, ma sa ia lagiina mai mo i la’ua i se leo ato manino ia upu faamomoiloto mai le tusi a Ruta, “O le mea e te alu i ai, ou te alu ai foi; o le mea e te nofo ai, ou te nofo ai: e fai lou nuu mo’u nuu, e fai lou Atua mo’u Atua: o le mea e te oti ai, ou te oti ai.” (Ruta 1:1:16–17).

Sa matua ootia o maua loto ma sa ma mautinoaina lo laua fiafia i le lumanai—o se vaega o lea manatu, ona o loo i ai foi nei upu o loo tautau i puipui o lo ma’ua fale ma lo’u toalua mo le tele o tausaga.

O le mea e faanoanoa ai ona ua faaitiitia le taua o nei upu matagofie. Ua tele naua faaipoipoga i aso nei ua faaiu ina tetea. Ua tele lava ina manumalo le manatu faapito, o le agasala, ma le mea e fiafia i ai le tagata ia, nai lo feagaiga ma tautinoga.

O le faaipoipoga e faavavau o se mataupu faavae sa faatuina a o le i faavaeina le lalolagi, ma sa faavae i lenei fogaeleele a o lei oo mai le oti i le tagata. O Atamu ma Eva sa tuuina atu le tasi i le isi e le Atua i le Faatoaga o Etena a o lei oo mai le Pau. O loo faapea mai le mau: “O le aso na faia ai e le Atua le tagata, na ia faia o ia ua faatusa i le Atua; o le Tane ma le fafine; na ia faamanuia foi ia te i laua” (Kenese 5:1–2; faamamafa faaopoopo)

E tutusa lava le aoao mai e perofeta o le elemene aupito atoatoa ma o le laualuga foi lea o le fuafuaga sili a le Atua mo le faamanuiaga o Lana fanau, o le faaipoipoga lea e faavavau. Sa ta’ua e Peresitene Ezra Taft Benson, “O le faamaoni i feagaiga o le faaipoipoga e aumaia ai le olioli e sili ona atoatoa i lenei olaga, ma taui mamalu i le olaga a sau.” (The Teachings of Ezra Taft Benson, [1988], 533–34). Sa faamatalaina e Peresitene Howard W. Hunter le faaipoipoga faaselesitila “o le sauniga faatumutumu lea o le talalelei,” ma sa ia faamanino mai e ui o le faia o se faaipoipoga faaselesitila atonu e “alu ai se taimi umi [mo nisi], atonu e oo lava i talaatu o lenei olaga faaletino,” ae e le taofia lava mai soo se tagata agavaa (Teachings of Howard W. Hunter, ed. Clyde J. Williams [1997], 132, 140). Ua faaigoaina e Peresitene Gordon B. Hinckley le faaipoipoga e faavavau “o se mea ofoofogia” (tagai “O le Mea Ua Tuufaatasia e le Atua,” Liahona, Iulai, 1991, 80) ma o se “meaalofa e sili atu ona taua nai lo isi meaalofa uma” (“O Le Faaipoipoga e Tumau,” Liahona, Iulai 1974, 30).

Peitai, e ui lava i le mamalu ma le viia o le meaalofa, ae e le avefuaina. Tasi o le mea, e i ai ona tuutuuga, ma talu ai ona ua tuuina mai, e mafai foi ona toe aveesea pe afai tatou te le tausisia tuutuuga o le feagaiga o loo aumai faatasi ai. O le vaega e 131 o le Mataupu Faavae ma Feagaiga o loo ta’u mai ai e faapea: “i le mamalu selesitila, e i ai lagi po o tikeri e tolu; Ma ina ia ulu atu i lenei faatulagaga aupito i maualuga, e tatau i se alii (ma o lona uiga e faapena foi i se tamaitai) ona ulu atu i lenei faatulagaga o le perisitua [o lona uiga o le feagaiga fou e faavavau o le faaipoipoga]” (MFF 131:1–2).

O le feagaiga o se folafolaga paia. Tatou te folafola atu e faia ni mea ae noatia foi e le Atua lava Ia e faia isi mea. O i latou e tausia le feagaiga o le faaipoipoga, ua folafola mai e le Atua le atoaga o Lona mamalu, o le ola e faavavau, ma le fanauina o fanau e faavavau, o le faaeaga i le malo selesitila ma le atoaga o le olioli. Ua tatou iloa uma na mea, ae o nisi taimi tatou te le manatu tele i mea e tatau ona tatou faia ina ia maua ai nei faamanuiaga. E foliga o loo manino le faapea mai o tusitusiga paia, a itiiti e tolu matafaioi o se vaega o lenei feagaiga.

Muamua, o se faaipoipoga faavavau, e faavavau. O le faavavau o lona uiga o le faaauau ona ola ma faaleleia atili. O lona uiga, o le a taumafai ma le faamaoni le tane ma le ava ina ia atoatoa. O lona uiga o le sootaga faafaaipoipoga e le tatau ona lafoaia e aunoa ma le mafaufau i ai, pe a tulai mai se muai faailoga o le le femaliliea’∏; pe oo mai foi taimi faigata. E faaalia ai le tuputupu ae malosi o le alofa a o gasolo aso, ma e faaauau i talaatu o le tuugamau. O lona uiga, o le a faamanuiaina le soa i le mafutaga a le isi e faavavau, ma e sili ai ona foia faafitauli ma eseesega aua e le faapea o le a o ese. O le faavavau e faaalia ai le salamo, loto faamagalo, faapalepale, onosai, faamoemoe, agalelei, alofa ma le lotomaualalo. O nei mea uma e aofia ai i soo se mea lava e faavavau, ma e moni e tatau ona tatou aoao ma ola ai pe afai tatou te faamoemoe ia maua se faaipoipoga e faavavau.

Lona lua, o se faaipoipoga e faavavau e faauuina e le Atua. O lona uiga, o tagata o loo aofia i le feagaiga o le faaipoipoga, ua malilie e valaaulia le Atua i la laua faaipoipoga, e tatalo faatasi, ia tausia poloaiga, ia tausisia manaoga ma lagona i totonu o tuaoi ua uma ona aoao mai e perofeta. O lona uiga, ia avea o ni soa e aia tutusa lelei, ma ia faamaoni ma atoatoa i fafo atu atu o le aiga e pei foi ona i ai i totonu o le aiga. O se vaega lena o le uiga o le faauuina e le Atua.

Lona tolu, o le faaipoipoga e faavavau o se ituaiga o faiga faapaaga ma le Atua. Na te folafolaina mai se uluola pea lava o le olaga o i latou ua faamauina faatasi i le malumalu. O loo i ai le noataga faatasi ma le Foafoa, sa faaalia i le poloaiga na tuuina atu ia Atamu ma Eva ina ia fanafanau ma uluuluola ia tumu ai le lalolagi. O loo i ai se matafaioi e aoao fanau i le talalelei aua o i latou foi o Ana fanau. O le mea lea e fai ai a tatou afiafi faaleaiga ma suesuega o tusitusiga paia, o talanoaga i le talalelei, ma auauna atu i isi. E foliga mai e i ai se matafaioi e lagolago ai isi i valaauga ma tofiga e tuuina atu i tagata taitoatasi e faatino. E mafai faapefea ona tatou fai mai ia tasi i tatou ma le Atua pe a le mafai ona lagolagoina e le tasi le isi, pe a tofia le fafine e auauna i le Peraimeri pe tofia foi le tane i le au epikopo?

O lona uiga o le feagaiga o le faaipoipoga a itiiti e aofia ai mea e tolu ae atonu e i ai lava ma nisi. Ailoga ou te sese, pe a ou faapea atu ia i latou o e sauaina i upu pe faaoolima foi i a latou ava po o tane; po o i latou foi e faamaasiasia pe vaai maualalo pe pule ma le amioletonu i se faaipoipoga e le tausia feagaiga. E faapena foi ia i latou e faatamala i poloaiga, po o i latou e le lagolagoina o latou taitai. E oo foi ia i latou e teena valaauga, tuulafoai i tuaoi, pe na ona auai foi i aga a le lalolagi, e lamatia foi. Afai tatou te le o tausisia la tatou vaega o le feagaiga, e leai so tatou folafolaga.

E sili i lo na mea uma, ou te manatu o le faaipoipoga e faavavau e le mafai ona ausia e aunoa ma se tautinoga ina ia lelei. O le tele lava o mea ua ou iloa e uiga i le faaipoipoga e faavavau, sa ou aoaoina mai la’u soa. Ua toeitiiti atoa le 47 tausaga talu ona ma faaipoipo. Mai lava i le amataga, sa ia iloaina le ituaiga faaipoipoga sa ia manao ai.

Sa ma amata mai o ni tamaiti matitiva e aooga i le kolisi, ae o lana faalepo mo le ma faaipoipoga sa faaalia i se faataitaiga o se seti siliva o tui, naifi, ma sipuni. E pei ona masani ai i aso nei, ina ua ma faaipoipo sa alu o ia i se faleoloa e lesitala ai ia mea e manao e faameaalofa mai ai tagata valaaulia. Na te le i tusia ai ni ulo ma ni falai ma masini sa ma manaomia ma faamoemoe ia maua, ae na ia filifilia se isi faiga. Sa talosagaina e ia ni seti siliva o tui, naifi, ma sipuni. Sa ia filifilia se mamanu ma le aofaiga o ipu mafolafola siliva, ma naifi, tui ma sipuni i le lisi o meaalofa na lesitala ai i le faleoloa ae leai ma se isi lava mea. Leai ni solo, leai ni faapa’u falaoa, leai se televise—ae na o naifi, tui, ma sipuni.

Na oo mai le taimi o le faaipoipoga ma ua maea foi. Sa o mai o ma matua ma uo ma ni meaalofa. Sa ma malaga mo se ma tafaoga puupuu ma sa tonu ai sei talai a ma meaalofa pe a ma foi mai. Ina ua talai a ma meaalofa, sa ma tete’i. E leai lava ma se tui po o se naifi siliva i nei meaalofa uma. Sa ma talasua ai ma faagasolo pea lo ma olaga.

Na fananau mai le ma fanau e toalua a o ma aooga faaloia. Sa leai se matou tupe e teu. Ae ina ua galue faavaitaimi lo’u toalua o se fesoasoani i faiga palota, pe foai ane foi e se tasi ni nai tala i lo’u toalua mo sona aso fanau, ona ia teu guguina lea, ma a oo ina ua lava sana tupe, ona alu lea i le taulaga e faatau mai ai se tui po o se sipuni. E fai si tele o tausaga o tau faaputuputu nai naifi, o tui, ma sipuni siliva. Ina ua oo ina lava nai tui ma naifi ma sipuni e faaaoga e ni tagata se toafa, sa amata loa ona ma valaaulia a maua uo matou te talisua.

A o lei o mai i latou, e fai muamua lava si a ma’ua talanoaga i le umukuka. O fea mea e faaaoga e aai ai, pe o siliva maoi pe o mea taugofie? O aso na, ou te manao lava e faaaoga le siliva maoi. Aua e faigofie atu. E na ona e tago lava togi i le masini fuluipu pe a uma ona aai, ona mama ai lava lea o ia. O le isi siliva, i se isi itu, e matua tele lava galuega. E nana lava e lo’u toalua i lalo o le moega, ina ia faigata i se tagata talepe fale ona maua. Sa ia tauanauina au e faatau se fasi ie paauli e afifi ai. E tofu lava le tui po o le sipuni po o le naifi ma le taga e tuu ai, ma e le o se galuega faigofie le faasauniuni o mea taitasi. Afai e faaaoga le seti siliva lea, e tatau ona fufulu i lima ma faamago ina ia aua nei iloga ai le to’ato’a ai o ni vai, ma toe teu i taga ina ia aua nei matafi, ma afifi ma toe teu faalelei ina ia aua nei gaoia. Afai e iloa ai sina matafi, ona tuli lea o au e faatau mai se vali siliva ona ma taufai oloeseina lea o le pisia.

E tele tausaga o ma faaopoopoina pea mea o le seti, ma sa ou maitauina ma le maofa lona tausia lelei o le siliva. O lo’u toalua e le o se tagata e itaitagofie. Peitai, ou te manatuaina le aso na tago ai se tasi o le ma fanau i se tui siliva e manao e eli ai tua o le matou fale. O lena taumafaiga na faafetauia i se pulatoa faalii ma le ita, faatasi ai ma se lapataiga ia aua lava nei tofotofo i ai. Ia aua lava!

Sa ou maitauina e le i faaaogaina le seti siliva lea i ni taumafataga se tele sa ia kukaina a le uarota, pe na avatu foi i le tele o taumafataga sa ia saunia ma auina atu i nisi sa mamai ma manaomia le fesoasoani. E lei faaaogaina foi lava i ni tafaoga po o ni tolauapiga. O le mea moni, e lei avea lava i se mea; ma, a o gasolo pea aso, e lei aumaia soo foi i le laulau. O nisi o a maua uo, sa fuaina ma maua ai le tonu e le agavaa latou te faaaogaina, ma latou te le i iloaina lava. Sa ave i ai tui, ma sipuni ma naifi o ni siliva taugofie, matou te talisua.

Na oo mai le taimi ua valaauina ai i maua i se misiona. Sa ou taunuu atu i se tasi aso i le fale, ma sa faatonuina au e totogi se sefe mai le faletupe e teu ai le seti siliva. E lei manao o ia ma te aveina i le misiona. E lei manao foi o ia e tuu. Ae e le manao foi e leiloloa.

E tele tausaga sa ou mafaufau ai e ese lava faiga [a lo’u toalua], ona oo lea i se tasi aso, sa ou iloa ai ua leva ona ia iloaina o lea ua faatoa amata ona ou tau malamalama. Afai e te manao i se mea ina ia tumau e faavavau, e tatau ona ese lava lou taulimaina. E te faamalumalu i ai ma puipui. E te le soona faia lava. E te le tuua foi lava i elemene o le natura. E te le faia o se mea taatele pe o se mea e faatauvaa. Afai ae matafi pe pisia, e te faaiilaina faalelei seia oo ina iila e pei o se mea fou. E oo ina avea ma se mea faapitoa aua na e faia ia faapena, ma sa atili ai ona matagofie ma taua a o gasolo pea tausaga.

E faapena foi le faaipoipoga e faavavau. E ao ona tatou faia faapena. Ou te tatalo ina ia tatou vaai i le faaipoipoga e faavavau o le meaalofa e le mafaatauina, i le suafa o Iesu Keriso, amene.