Me da iYaya ni Cakacaka e na Liga ni Kalou

E a se qai yabaki 34 walega o Alma Benjamin Larsen na tamai tinaqu¹, ni a yadra mai ka vakila ni sa vaka me sa buwawa na matana. E oti ga vakalailai sa mataboko vakadua. E kaulotu talega o tukaqu ka lewenilotu yalodina. E a dauteitei, e vakawati , ka tolu na luvena, ka sega ni vakasamataka rawa na veika ni bula kevaka me na mataboko. Sa qai mai nodratou na oga ni cakacakataki na iteitei o na marama watina kei iratou na gone ka sa dredre sara na ilavo.

Ena gauna butobuto vakayago oqo e vuqa na tamata era yaco me ra liga ni iyaya ni cakacaka e na liga ni Kalou me ra vukei tuqaku mataboko. E dua na ka veivakayavalati kaukauwa sara a yaco ena nona matavuvale e na 1919. Oqo na yabaki ni nodra bula dravudravua vakailavo o ira e ra vakaitikotiko ena taoni nei Tukaqu. Sa ra sogosogo na ka ra sa lusi na veibisinisi. Sa qai tu e dua na dinau levu ena nona iteitei, ka sa yaco mai vei tukaqu e dua na ivola me sauma e $195 me rawa ni toso tale me dua na yabaki na nona teitei. Na nona sausaumi oqo, sa vaka me sa vidai kina o koya. E voleka ni sa tautauvata kece ga na nodra leqa, ka sa bau dravusa kulukulu ni kunei na ilavo vakaoqo. Kevaka me na volitaka na nona iteitei taucoko–na ose, bulumakau kei na misini–e na sega ni volitaka rawa me yacova na $195. E a kerea e dua na tamata o tukaqu me vakamatea ka volitaka e rua se tolu na nona bulumakau, kei na so tale na iyaya. E a soli dinau o tukaqu vua e so ka nanuma me ra na sauma mai ena mua ni yabaki, ia a sega ni dua vei ira a dinau oqo a sauma rawa. Sa sega sara ga vei ratou na ilavo.

Ena nona volaniveisiga, e toqa kina o tukaqu, “Au na sega ni guilecava vakadua na yakavi batabata oya, ni voleka toka na Kirisimasi ni 1919. Keitou sa kila sara ga ni sa na vesu na iteitei. E a qai solia mai e ligaqu o Glady na luvequ yalewa e dua na ivola ka kaya, ‘Oqo e yaco mai ena meli e nikua.’ Au a kauta sara vei tinana ka taroga se ivola cava oya. E a qai wilika mai o watiqu, ‘Kivei Baraca Larsen, au sa vakasamataki iko tikoga nikua. Au vakasamataka tiko kevaka o leqa tiko vakailavo. Kevaka e vakakina, ia e tiko vei au e $200 me nomu .’ E a saini toka mai kina o ‘Jim Drinkwater’. O Jim e turaga lailai ka vakaleqai tu vakayago ka rairai otioti beka ni tamata e vuravura me na dua na tamata e namaka me tu vua e dua na ilavo vakaoya. Au a gole sara ki nona vale ena bogi oya ka kaya mai, ‘Baraca Larsen, au a ciqoma e dua na itukutuku livaliva mai lomalagi e na mataka ni kua kau sa vakasamataki iko tu ga nikua. Au kila sara ga ni o leqa tiko vakailavo.’ E a qai solia vei au o Baraca Drinkwater e $200 ka vakau sara na $195 oya kina kabani ni vesu iyau ka voli e $5 na ivava kei na nodratou isulu na gone. E a yaco dina mai o Santa Claus e na yabaki oya.”

E a vakaraitaka sara o tukaqu na nona ivakadinadina, “E se bera mada vakadua me biuti au na Turaga e sa tara oti o Koya na yalodra na tamata ka vakakina na yaloi Baraca Drinkwater. Au sa vakadinadinataka ni noqu maroroi kei na taqomaki e yaco duadua ga e na noqu vakamuria na vunau ni Turaga ka tudei ka tokoni ira tiko na vakaitutu ni Lotu oqo.”

E vuqa na gauna au a dau vakananumi Jim Drinkwater ka a vakasamataka sara se yaco vakacava me laki nuitaki koya tu vakaoqo na Turaga. Sa yaco o Jim na tamata lokiloki lailai oya me nuitaki koya na Turaga me na vukea e dua na tamata dauteitei mataboko ka a sa dinau levu tu ka tolu tu na luvena. Au sa vakavukui sara vakalevu ena ka a cakava o Jim Drinkwater vei tukaqu. Au sa kila oqo ni sega ni gadrevi me da lesi sara Vakalotu, se da kerei me da veivuke, se me da tu vinaka sara vakayago me da qai iyaya kina ni cakacaka e na liga ni Kalou. Me qai yaco vakacava me daru iyaya ni cakacaka e na liga ni Kalou? Era sa tukuna tu vei keda na parofita kei na ivolanikalou.

Kena imatai, me da lomani ira ga na luveni Kalou.

E a taroga na iVakabula e dua na loya,

“Vakavuvuli, a cava na ivakaro levu ena ivunau … ?” sa kaya vua ko Jisu: “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega. Ai matai ni vunau oqo ka levu.

A sa tautauvata kei na kena ikarua, Mo lomana na kai nomu me vaka ko lomani iko.” (Maciu 22:36–39).

E kaya o Joseph F. Smith, “Na loloma, se cakavinaka, sai ivakavuvuli cecere ni bula oqo. Kevaka sa rawa me da vukea e dua sa malumalumu, kevaka me da vukea e dua e yalolailai ka rarawa, kevaka me da tubera ka tara cake na ivakatagedegede ni bula raraba, sa qai noda itavi dina, sa itavi bibi sara ni noda lotu me da cakava.” (Conference Report, Apr. 1917, 4). Ni da lomani ira na luveni Kalou, sa noda madigi oqori me da vukea na nodra lesu ki na Nona itikotiko.

Na nodratou cakacaka ni kaulotu na luvei Mosaia e vukea na noda kila na sala me da iyaya ni cakacaka e na liga ni Kalou “A ratou sa lako tiko ena lekutu ka bogi vuqa, …” (Alama 17:9). Me tiko na yalo ni veilakoyaki. E a yalodratou na luvei Mosaia me ratou lakotani yani ka cakava na veika dredre. Ke a sega beka ni yaloi Amoni me lako yani ki vanua tani, ka ra tu kina na tamata itovo rerevaki, yalokaukauwa, ka vakatani, ke a sega beka ni kunei Lamonai vata kei tamana, ka vuqa sara na Leimani era na sega ni kilai Jisu Karisito. Sa sureti keda tu na Kalou me da lako yani, ka kaulotu, mo lesi, sureta e dua ki lotu, se vukea e dua e vakaleqai.

Ena nodratou saga me vukei iratou na veitacini na Leimani, e ratou sa kila kina na luvei Mosaia na bibi ni lolo kei na masu: “… Ia e ratou sa daulolo ka masuta na Turaga me tala mai na nona Yalotabu me lako vata kei iratou, ka me tiko ga kei iratou ka vukei iratou me ratou iyaya ni cakacaka ni Kalou, ia me ratou vakavulici iratou na wekadratou, ko ira na Leimani, me ra kila na ivakavuvuli dina …” (Alama 17:9). E da vinakata li me da iyaya ni cakacaka e na liga ni Kalou? Kevaka sa vakakina, sa qai vuki na noda gagadre me noda masu ka iusutu ni noda lolo.

Ni sa mataboko o tukaqu, a qai masu ka lolovaka vua na Turaga ni kevaka me sa bula mataboko me na soli ga vua na vakacegu. E kaya ni loma ga ni dua na auwa, “sa vakararamataki mai na noqu vakasama ka takali yani na butobuto a tiko vei au”. Sa yaco me rai tale, sega ena matana vakayago, ia na matana vakayalo. Oti oya, sa kacivi sara o Alma Benjamin Larsen me peteriaki, ka yabaki 32 na nona veiqaravi kina. Me vakataki iratou ga na luvei Mosaia, a lolo ka masu o tukaqu, ka yaco rawa me vakalougatataka e udolu na luveni Kalou.

Me da vakataki rau o Jim Drinkwater kei tukaqu, me da dau vakarogoca na domo ni veivakauqeti ni Yalo Tabu, baleta kevaka e da gadreva me da iyaya ni cakacaka e na liga ni Kalou sa rawa me da ciqoma na ivakatakila. E a tukuna na parofita Alama Lailai, na ivakatakila a yaco vua. “Ia au sa kila na veika sa vakarota vei au na Turaga, kau sa vakavinavinaka kina … raica, au sa kalougata ni sa lesi au na Kalou meu vunauci ira na tamata me ra veivutuni, kau sa reki vakalevu kina.” (Alama 29:9) E a vakatakilai vei Alama na veika me vakayacora.

Au dau kauta voli e dua na ivolalailai, kau dau vola kina na veivakauqeti kei na vakasama e solia mai na yalotabu. E sega ni ituvaki vinaka, ka sa dau kadresu tu ka gadrevi me vakavinakataki ena veigauna. Au dau vola na veivakasama e dau yaco mai vei au ka saga meu vakayacora. Au sa raica rawa, niu dau vakayacora na veika au a vola tu, sa yaco me isau ni nona masu e dua na tamata. E so talega na gauna au sega ni vakayacora na veika au a vola tu, kau qai kila e muri ni a dodonu meu veivuke vua e dua, ia e a sega. Ni da ciqoma na veivakauqeti me da vukei ira na luve ni Kalou, kevaka eda vola na vakasama kei na veivakauqeti eda ciqoma ka vakayacora sara, e na nuitaki keda vakalevu cake na Kalou ka yaco mai na madigi me da iyaya ni cakacaka e na liga ni Kalou.

Oqo na vosa nei Peresitedi Faust, “Sa rawa mo ni iyaya ni cakacaka e na liga ni Kalou me vukei kina na cakacaka cecere oqo… . Sa rawa mo ni vakayacora e dua na ka vua e dua tale ka sega ni dua tale e sa sucu me na vakayacora rawa.” (“iYaya ni Cakacaka ena Liga ni Kalou,” Liaona Nov. 2005, 114). Sa dau taleitaka na Kalou o ira era vukei ira na Luvena. Au sa sureti keda kece sara me da vakamuria na nodra ivakasala na parofita ka yaco me da iyaya ni cakacaka e na liga ni Kalou ka yaco me da Nona iyau talei, baleta ni da sa vukei ira na Luvena.

E na yaca i Jisu Karisito, emeni