Na Veisorovaki ena Vakadeitaka na Nomu Vakacegu kei na Marau

O Tamada mai Lomalagi e vinakata me da rawata na vakacegu kei na bula marau ena bula oqo. Na noda Turaga, ko Jisu Karisito kei ira na Nona parofita era sa vakavuvulitaka na sala me rawa kina na vakacegu kei na marau o ya, ena vuravura sara mada ga sa toso cake tikoga na kena dredre, kei na kena sa tubu cake tikoga kina na veitemaki veivagarogaroi levu.

Au na vakaraitaka na sala sega ni dodonu me kune kina na vakacegu kei na marau, oti, sa qai sala dodonu, ena kena vakayagataki e dua na vakasama ni kaba bari ni vatu. Era tu eso era dau segata me ra kabata na bari ni vatu dredre ena dua na iwalewale ka vakatokai na “solo” (lako duadua). Era kaba duadua, sega na kena iyaya, na itokani, se itataqomaki dei. Era vakararavi ga ena nodra maqosa kei na nodra rawa ka. Era vakayacora ni taleitaka na lomadra me ra cakava na veika rerevaki ka ra biuta kina na nodra bula e bati ni barinisavu. E vakayacori e dina ga ni rawa ni ra lutu ena dua na gauna ka ra mavoa vakaca sara se kau tani sara na nodra bula. Era vakataki ira na lewe vuqa ka ra dau sotava na bolebole kei na veitemaki ni bula era sega ni kauwaitaka na veitaqomaki ena kena muri na ivakaro ni Kalou, ka dusimaki mai na Yalo Tabu. Ena vuravura dredre ni gauna oqo era na voroka vakaidina na veilawa bibi eso, ka dau mosimosi ka veivakarusai na kena revurevu. Kakua ni dau “lako duadua” ena bula. Ena rawa ni o lutu ki na ivalavala ca.

E dua na ivakarau vinaka ni kaba bari ni vatu. Ni rau kabata e lewe rua e dua na vanua dredre, ena cobara o koya e liu na ikelekele ena lalaga ni bari ni vatu me ya vica na fiti na kena veiyawaki. Ena semati tiko na nona dali ki na ikelekele ena dua na iqaso kaukamea. Ena dei koto na nona taqomaki mai vua na nona itokani ka vakatokai na ikarua, ena dabe koto ena dua na vanua me conaki vinaka kina. E taqomaki o koya e liu ni vesuka vinaka koto na dali na ikarua, me lewa vinaka toka na nona sorova na dali. Ena sala oqori e vakadeitaki toka na nona taqomaki o koya e liu ni kaba tiko. Kevaka ena mani butu cala, ena tarovi vakavinaka na lutu mai na ikelekele. O koya na ikarua e sega walega ni taqomaki koya e liu, ia ena veivakayaloqaqataki ena vosa kei na ivakatakilakila ni rau veiraici toka. Na nodrau sasaga me dua na gauna talei ena nodrau vorata e dua na gauna dredre. Erau vakayagataka na iwalewale eso kei na iyaya sa vakatovolei ka vakadinadinataki. Na iyaya oqori, e okati kina e dua na idreke, e dua na dali nuitaki, na veimataqali ikelekele me na cobari ena lalaga ni vatu, e dua na taga joke me vakavinakataka cake na tautauri, kei na ivava digitaki me vakayagataka na iliuliu me kukuva kina na bari ni lalaga ni vatu.

Oi rau na veitokani, erau sa vulica na lawa kei na iwalewale ni kaba bari ni vatu. Erau sa dusimaki mai vei ira na kenadau ni kaba bari ni vatu ka vakatovotovotaka me matau vei rau na kena iwalewale kei na ivakavakayagataki ni iyaya. Erau sa tuvalaka na sala me rau muria ka lewa na sala me rau na cakacaka vata kina. Ni sa yawa toka na vanua e lakova o koya e liu, ka raica e dua na vanua vinaka, me qai taura ko koya na dali ka muri yani na ikarua ena “maliwa” se na balavu ni dali sa dodo tu. Ni yacovi koya yani e liu, me qai tokaruataki na iwalewale oqori. Me taura na dali e dua, ka kaba na kena ikarua ka cobara ena veiyavica na fiti na ikelekele me itataqomaki kevaka e mani dua na vakacalaka ena lutu. Ni sa vaka me rerevaki na kaba bari ni vatu, na ivakarau ni qaqarauni oqo ena vakadeitaki kina na gauna vinaka ka veilaveti, ka rawati ena kena muri na ivakavuvuli dodonu.

Ena bula, na ikelekele sai koya na lawa ni Kalou ka na veitaqomaki ena bolebole taucoko o na sotava. Na dali kei na iqaso ka vesuka na dali ki na ikelekele sai koya na talairawarawa ki na ivakaro. Ni ko vulica na ivakaro eso oqo, dau vakatovotovotaka ka biuta e dua na ituvatuva mo levea na veika rerevaki, o na rawata e dua na ivurevure tudei ni veitaqomaki mai na veitemaki nei Setani. Ko na rawata na kaukauwa me na vakaukauwataki iko mai na ivalavala ca. Kevaka ena mani dua na butu cala ena sega ni dua na leqa bibi ena vuku ni veitauri toka ena dali se na veivuke ena nomu veivutuni.

Me “liu” ena nomu bula na iVakabula. E kaya, “Koi Au … na Uluvatu ni Lomalagi …; ia ko koya sa curu ena matamata ka muri au tikoga ena sega sara ni lako sese.”¹ Ena liutaki iko na Dauveivueti mo lako sivita na veibolebole dredre duadua ni bula. Na nona lawa sa ikelekele dei ni veitaqomaki ka na vakaseyavutaka na rere ka vakadeitaka na qaqa ena vuravura rerevaki oqo. Na bula oqori ena solia vakaidina vei iko na sautu kei na marau.

Na marau dina ka tudei, vata kei na kena kaukauwa, na yaloqaqa, kei na kena rawa ni vakadruka na dredre duadua, e sala vata kaya, ena yaco mai ni ko sa conaka na nomu bula vei Jisu Karisito. Na talairawarawa ki na Nona ivakavuvuli e kauta mai na tubu ena ilakolako ni bula. Oqori e rawa ena sasaga. Ena sega ni vakadeitaki me basika na vuana ena dua ga na bogi, e koto na veivakadeitaki, ni na basika na vuana ena Nona gauna na Turaga, ena kune na vakacegu, ka nomu na marau.

Na veika dredre o sotava, na gauna ni tubu e yaco vei iko, era nakiti me iyaloyalo sega ni tudei ka yaco tiko ena dua na buturara ni bula sautu kei na marau. Na rarawa, mosi ni yalo, kei na cudru, era veika ni bula. Au na sega ni vakalailaitaka na kena dredre eso na veika oqo. Kevaka ena bibi sara na lesoni mo vulica, ena rawa ni yaco tiko na veivakatovolei ena loma ni dua na gauna, ia me kakua ni vakatarai me sa vakanamata ga kina vakatabakidua na veika kece o vakayacora. Na nomu bula e rawa ni vakasakiti na kena totoka. Na nomu kila kei na nomu bulataka na lawa ni Kalou ena lagilagi kina na inaki ni nomu bula ni ko kabata ka rawa na dredre ni bula. Na mataqali rai vakaoqori ena biu tikoga kina ena kena itutu dina na dredre—na ikabakaba vatu ki na tubu kei na rawa ka.

E kauwaitaka na Turaga na nomu tubu kei na marau. Ena vakatotolotaki cake na nomu tubu ena nomu vakatarai Koya me liutaki iko ena veika kece ni tubu o sotava, se o na taleitaka se sega. Vakabauta na Turaga. Kerea me liutaki iko na Yalotabu mo kila na Lomana. Tu vakarau mo ciqoma. Ena qai ganiti iko na marau levu duadua ena ilakolako kei na rawa ka ena bula oqo.

Na sautu kei na marau era vua talei ni dua na buladodonu. Era na rawa walega ena Veisorovaki nei Jisu Karisito. Au na vakamacalataka.

Eda na cala kece ena noda bula. Ena voroki kina na lawa tawamudu. Na lewa dodonu sai koya na tiki ni nona ituvatuva ni marau na Tamada mai Lomalagi ka na maroroi kina na ivakarau. E vaka na idre ni vuravura vua na dau kaba bari ni vatu, ena tikoga. Ena itokani kevaka e rokovi na lawa tawamudu. Ena veivakamavoataki kevaka e cakitaki. E vakadeitaka na lewa dodonu ni ko na rawata na veivakalougatataki sa noda ena noda talairawarawa ki na lawa ni Kalou. Na lewa dodonu talega e gadrevi kina me vakamamautaki na lawa kece sara e voroki. Ni da talairawarawa ki na lawa ni Kalou ko na vakalougatataki, ia e sega ni dua tale na ikuri ni kena isau e rawa ni maroroi tu me vakamamautaki kina na lawa sa voroki. Kevaka e sega ni wali, sa na rawa ni vakavuna me rarawa na bula ka tarova na nomu lesu tale vua na Kalou na lawa e voroki. Na nona bula, nona ivakavuvuli, ka vakauasivi na Veisorovaki ga i Jisu Karisito e rawa ni vagalalataki keda mai na ituvaki ca oqo.

Na gagadre ni lewa dodonu me baleta na lawa voroki ena vakamamautaki ena loloma cecere, rawati ena kena tomani tiko na veivutuni kei na talairawarawa. Na veivutuni kei na talairawarawa vakaoqo sa yaga vakalevu sara me baleta na kena taucoko na cakamana ni Veisorovaki ena nomu bula. E rawa ni vakasavasavataka na Dauveivueti na nomuni dui itavi yadua ena lewadodonu ka solia na veivosoti ena sala ni loloma ni nomu veivutuni. Ena Veisorovaki sa rawa kina ni o bula ena dua na vuravura ka na veivakadeitaki kina na lewa dodonu ni ko na rawata na veika o taukena ena nomu talairawarawa. Ena Nona loloma cecere sa rawa kina ni o sotava na isau ni lawa voroki.

Na Veisorovaki e ivalavala sega ni nanumi koya ka vakaitamera na kena yaga tawamudu, ka rawata duadua na Luve ni Kalou.² E sereka mai kina na iVakabula na ivesu nei mate. Ena dodonu kina na noda na laki lewai vua na Dauveivueti. Ena tarova na tawamudu ena lewa nei Setani. E dolava na matamata ki na bula vakacerecerei vei ira kece ena ganiti ira na veivosoti ena veivutuni kei na talairawarawa.

Ni vakananumi na cecere ni Veisorovaki e vakavurea na qoroqoro, na vakavinavinaka cecekia, kei na yalomalumalumu titobu. Na vakanananu oqori ena solia vei iko na veivakauqeti kaukauwa me maroroi na Nona ivakaro ka veivutunitaka tikoga na cala me baleta na vakacegu kei na marau cecere cake.

Au vakabauta ni veitalia na kaukauwa ni nomu segata, o na sega ni rawa ni kila kece sara ena nomu vakasama vakatamata na kena yaga tawamudu na Veisorovaki ka na sega talega ni rawa ni da kila vakavinaka sara na sala a vakayacori kina. Eda na rawa ga ni kila e dua na ivakarau lailai ena veika a sotava kina na iVakabula ena mosi, na yaluma, kei na veika rarawa se na kena dredre vei Tamada Vakalomalagi me raica na Luvena na dredre sega ni vakatauvatani rawa ena Nona Veisorovaki. O koya, au nanuma kina ni dodonu, mo vulica e vu ni yalomu na Veisorovaki mo kila vakavinaka sara. E rawa ni o vulica na veika e gadrevi me da bulataka kina na Nona ivakaro, me da marautaka na vakacegu kei na bula marau ena bula oqo. Ena rawa ni ganiti iko vata kei ira na lewe ni matavuvale talairawarawa, me da bula vata kei Koya vata kei Tamada mai Lomalagai me tawamudu.

E vakavulici Jekope na luvena ko Liai: “Ni sa sega ni rawa vua na tamata … me tiko ena mata ni Kalou, ia sa rawa duadua ga ena vuku ni nona yalovinaka kei na nona loloma kei na nona lomasoli na Mesaia Yalosavasava.”³

E tu vei Jisu Karisito na yalovinaka ka sega ni rawa ni tu tale vua e dua. E Kalou ko Koya, ko Jiova, ni bera ni sucu mai Peceliema. A sega walega ni solia vua na Tamana Daulomani na yagona vakayalo ia ko Jisu na Luvena e Duabau Ga ena yago. A bulataka na noda Turaga e dua na bula e taucoko, ka sega na kena ivalavala ca, o koya sa galala kina mai na gagadre ni lewa dodonu. Na Nona loloma cecere sa sauma na noda idinau ki na lewa dodonu ena gauna eda veivutuni kina ka talairawarawa Vua. Me vaka ni da na sega ga ni rawata ena noda solia na noda igu kece me da talairawarawa ki na Nona ivakavuvuli, na Nona loloma soli wale ga eda na “vakabulai kina, ni da sa cakava na veika kece eda rawata.”⁴

Au vakadinadinataka ni ena veivakararawataki sega ni raitayaloyalotaki rawa kei na mosi ena isau e sega ni cakacakataki rawa, sa rawata kina na iVakabula na Nona dodonu me noda Dauveivueti, noda Dautataro, ka iCavacava ni Lewa. Au kila ni bula tiko. Biuti koya tikoga me liu ena nomu bula. Na ikelekele tudei ni Nona lawa ena vakadeitaka na veitaqomaki ni ko sotava na bolebole ena yaco mai. O na sega ni lutu ki na ivalavala ca bibi. Ena nomu na bula vakacegu kei na marau ka vakaisalataki ena bula vakacerecerei ena Matanitu Vakasilesitieli. Ena yaca i Jisu Karisito, emeni.