Peresitedi Hinckley, E Vinaka na Bula ni Lotu

Ena ika 176 ni Koniferedi Raraba Vakayabaki, e tukuna ko Peresitedi Gordon B. Hinckley ni rau bulabula vinaka na lotu vata kei koya.

“Au bula vinaka,” e kaya na parofita yabaki 96. “Na noqu bula e rauta vinaka.”

E lavetaka o Peresitedi Hinckley na nodra vosa na nona vuniwai ni nona a bula tale mai na veisele ena Janueri kei na veiqaravi e tarava yani me “cakacakamana.” Ena ivakatekivu ni Noveba sa na yaco kina ko Peresitedi Hinckley me Peresitedi qase taudua ena isitori ni Lotu vakalesui mai. O Peresitedi David O. McKay (1873-1970) e a mate ni yabaki 96 ka dua na drau tolusagavulu karua na siga. Ko Peresitedi Hinckley e a marautaka na nona yabaki 96 ena 23 ni June.

E sivia e 100,000 na tamata era tiko rawa ena soqoni ni koniferedi ena Vale ni Koniferedi e Salt Lake City, ka sivia tale na milioni era sarava e vuravura. Na vosa ni koniferedi e vakadewataki ena 85 na vosa e kena ikuri vou na vosa vaka-Taki.

Ena soqoni ena mataka ni Vakarauwai, ena nona itukutuku ko Peresitedi Hinckley ena toso ni Lotu. “Au rawa ga ni tukuna ni Turaga e vakalougatataka vakalevu na Nona Lotu,” e kaya ko Peresitedi Hinckley. “E noda itavi me da cakava na ka kece eda rawa ni cakava me toso kina na lotu.”

E a qai vakatabui vakaveitarataravi walega oqo na ika 123 kei na ika 124 ni valetabu e Sacramento, California kei Helsinki, Finiladi. E a vakatakila ko Peresitedi Hinckley ni sa taukena tiko oqo na Lotu e 6,066 na setilaite ka ciqomi tiko ena 83 na vanua me vakatautauvatani kei na 300 ena 1982.

E a vakamacalataka talega ko Peresitedi Hinckley ni Valecavu e Salt Lake, na vanua vakarautaki ena Lomanibai ni Valetabu me ra dau vakayagataka na Tabernacle Choir ena nodra kakaburaki vakamacawa ena iVakatagi kei na Vunau e vakavinakataki tiko oqo. Ena dolavi tale na vale oqo ena vulaitubutubu ni 2007, e vakamacalataka. Ena gauna e vakavinakataki tiko kina, era kakaburaki tiko mai na Vale ni Koniferedi na matasere.

Ena soqoni ena yakavi ni Vakarauwai eratou a vagalalataki mai na itavi ni Vakaitutu Raraba ena Lotu e walu na lewe ni iKarua ni Kuoramu ni Vitusagavulu. Ko iratou oqo na vagalalataki ko Elders Ronald T. Halverson, Dale E. Miller, H. Bryan Richards, Donald L. Staheli, David R. Stone, H. Bruce Stucki, Robert J. Whetteh kei Richard H. Winkel.

Kena ikuri ko Erich W. Kopischke yabaki 49, mai Frankfurt, Jamani, e a kacivi ki na Vitusagavulu ni iWasewase. Eratou a vagalalataki talega ena Vakarauwai, e tolu ena Vitusagavulu ni iWasewase: Elders Cesar A. S. Milder, Hyae-Kee Min, kei Masayuki Nakano.

Na yabaki 2006 e vakaraitaka na 150 na yabaki ni kena vakananumi nodra yaco mai na painia ena Bucabuca o Salt Lake ena qiqidreti.

“Na nodra vakabauta e noda isolisoli,” e kaya ko Peresitedi Hinckley baleti ira na painia. “Na nodra vakabauta e taleva vei keda na isau era sauma ena vuku ni tiko vinaka eda rekitaka.” E sogota ena nona kaya: “Ena inaki levu oqo, na tosoi cake ni vakabauta sai koya na ka eda gadreva vakalevu duadua. Ke sega o ya ena tu vakadua na cakacaka. Ni sa tiko oqo ena sega ni dua e tarova na toso [ni Lotu].”