Pe a Uma Mea Uma Tatou Te Mafaia
O i tatou, o tagata o le Ekalesia a Iesu Keriso, ua filifili e aua ne’i avea ma ni alii ma ni tamaitai masani.
Ua ou faalogo e leai lava se tasi ua maliu i le tuuina atu o se lauga i se konafesi aoao. Ae afai e tupu lena mea i le aso, ou te faatoese atu ma le faamaoni.
A o ou tautua i le auaunaga moomia i le militeli i Atenitina, sa ou faitau ai i se tusi ou te le o manatua lona tusitala. Na ia tusia: “Ua ou filifili ia aua ne’i avea au ma se tagata e pei ona masani ai; o la’u aia tatau le avea ma se tagata maoae mai mea masani, pe a ou mafaia.”
Ina ia avea ma se tagata maoae mai tulaga masani o lona uiga ia faamanuiaina, tulaga ese, ma maoae.
O loo tumau pea ona tusitusia lena fasi fuaitau i lo’u mafaufau ma lo’u loto. O o’u lagona sa i ai ma o loo i ai e faapea, o i tatou o tagata o le Ekalesia a Iesu Keriso, ua filifili e aua ne’i avea ma ni alii ma ni tamaitai masani. O upu faaiu “pe afai ou te mafaia” sa ou manatu ai ua le lava le na ona faatinoina o le papatisoga ma le faamauga, ae ia faataunuu ma le mamalu le tautinoga na tatou osia ma le Alii i lena aso e le galo.
Sa aoaoina e Liae lona atalii o Iakopo, i le faapea atu: “O lea ua saoloto ai tagata i la le tino, ma ua foaiina mai ia te i latou mea uma e tatau i tagata. Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo, aua na te saili ina ia malaia tagata uma e pei o ia lava” (2 Nifae 2:27).
E le masalomia, o loo tatou sailia le saolotoga ma le ola faavavau. Tatou te gatete i le manatu ina ne’i o tatou oti ae ua faapagotaina i tatou e le tiapolo.
Na manino le aoaoina o i tatou e Nifae i le mea e ao ona tatou faia. Na ia fai mai: “Aua ua matou iloa e faaolaina i tatou i le alofa tunoa pe a uma ona faia mea uma tatou te mafaia” (2 Nifae 25:23).
Ou te talitonu o le mea muamua e ao ona teu i o tatou mafaufau i le faia o “mea uma tatou te mafaia” o le salamo lea mai a tatou agasala. O le a tatou le mafaia lava ona taunuu atu i lo tatou malosiaga faalelagi pe afai tatou te tutumau pea i a tatou agasala.
O loo i ai pea ni mea taua ou te manatuaina i le aso o lo’u papatisoga ina ua valu o’u tausaga. Sa faia lea i le Paranesi a Liniers, o le uluai falesa lea o le Ekalesia na fausia i Amerika i Saute. A o matou toe foi atu i le fale ma lo’u aiga ina ua maea lo’u papatisoga, sa amata ona taalo pi’i mai lo’u uso matua ia te au, e pei ona ia masani ai. Sa ou inaina atu ia te ia, “Aua e te toe pa’i mai! e le mafai ona ou agasala!” Ina ua tuanai atu aso, sa ou iloaina e le mafai ona tumau ai le le agasala i le olaga atoa.
E faigata ona tauave mafatiaga e oo mai ia i tatou, ae o le puapuaga moni lava i le olaga o le mafatia lea i taunuuga o o tatou vaivaiga ma agasala lea tatou te faia ia i tatou lava.
E na o le tasi lava le auala e aveesea mai ai i tatou mai lenei mafatiaga. O le salamo faamaoni lea. Na ou aoaoina afai e mafai ona ou tuuina atu i le Alii se loto momomo ma se agaga salamo, ma lagonaina le faanoanoa faaleatua mo a’u agasala, i le faamaualaloina lea o au lava ia, e ala i le salamo mai o’u sese, e mafai e Lana taulaga togiola ofoofogia, ona faamamaina na agasala ma lē toe manatuaina ai.
Na tusia e le tusi solo Atenitina lauiloa o José Hernández, i lana tusi lauiloa o le Martín Fierro:
E tele mea e leiloa mai le tagata
O nisi taimi e toe maua mai ai,
Ae o lo’u tiute o le tau atu ia te outou,
Ma e lelei ona tou manatua,
A leiloa le maasiasi
E le toe maua mai.
(La Vuelta de Martín Fierro, part 2 of Martin Fierro, [1879] canto 32, bilingual ed., trans. C. E. Ward [1967], 493)
Afai tatou te le iloaina le faanoanoa faaleatua lea e mafua mai a tatou agasala po o ni uiga amioletonu, o le a le mafai ona tumau i tatou i le auala o ni tagata maoae.
O le isi mataupu faavae taua ia manatua i le “faia o mea uma tatou te mafai” o le vaai ma atiina ae ni avanoa lea e tuuina mai e le olaga i totonu o le talalelei, ma ia iloaina o le Alii na tuuina mai mea uma ua ia i tatou. E nafa o Ia ma mea lelei uma lava i o tatou olaga.
O le isi mea e tatau ona avea ma o tatou tiutetauave tumau i le faia “o mea uma tatou te mafaia” o le faasoa atu lea o le talalelei o le fiafia i tagata uma.
I se taimi ua mavae sa ou mauaina ai se tusi mai ia Uso Rafael Pérez Cisneros o Galicia, Sepania, o loo faamatala mai ai e uiga i lona liua. O se vaega o lenei tusi e faapea:
“Sa augapiu so’u iloa i le faamoemoega o le olaga ae po o le a foi le uiga moni o le aiga. Ina ua ou faatagaina faifeautalai e o mai i lo’u fale sa ou fai atu ia i laua, ‘Tuu mai ia te au le lua savali, ae ou te lapatai atu faapea e leai ma se mea na te suia o’u talitonuga faalelotu.’ O le feiloaiga muamua lea sa matuai faalogo ma le totoa i ai la’u fanau ma lo’u toalua. Sa ou lagona le faaesea o au mai le vaega. Sa ou lagona le fefe, ma sa ou alu atu i lo’u potumoe e aunoa ma se mafaufau i ai. Sa ou tapunia le faitotoa ma amata ona ou tatalo atu mai le taele o lo’u agaga e pei lava ou te le’i tatalo muamua. ‘Le Tama e, afai e moni o nei taulelea o ni Ou soo ma ua o mai e fesoasoani ia i matou, faamolemole ia faailoa mai ia te au.’ O le taimi lava lena na ou tagi ai e pei o se tamaitiiti. Sa matuai maligi o’u loimata, ma sa ou lagona le fiafia ou te le’i lagonaina muamua. Sa apoina a’u e se kalave sa tumu i le olioli ma le fiafia lea na tuia ai lo’u agaga. Sa ou malamalama sa tali mai le Atua i la’u tatalo.
“Sa papatisoina uma lo’u aiga, ma sa matou maua le faamanuiaga o le faamauina faatasi i le Malumalu o Swiss, ma avea ai au ma se tagata ua sili atu ona fiafia i le lalolagi.”
Ou te manatu o lenei tala e tatau ona uunaia ai i tatou ina ia fai “mea uma tatou te mafaia ona fai” ina ia faasoa atu ai faamanuiaga o le olioli lea e maua mai le ola ai i le talalelei o le fiafia.
O le manatu mulimuli ou te fia faasoaina atu e faapea e tatau ona tatou faia “mea uma tatou te mafaia ona fai” seia oo i le mutaaga o lo tatou olaga faataitai. E aunoa ma le tau fesiligia, o loo i ai o tatou faataitaiga ola e pei o Peresitene Gordon B. Hinckley ma le toatele o isi alii ma tamaitai o e o loo faaauau pea ona auauna atu ma le faamaoni i le matutua e manatu isi ua le toe talafeagai.
A o avea au ma se peresitene o le Misiona a Sepania Bilbao, sa ou lagona le faagaeetia i le lelei o tagata ma faifeautalai sa matou feiloai, o e sa tuleiina i luma ma le malosi ma le alofa le galuega, e pei foi o le toatele o isi tagata faamaoni o le Ekalesia i isi vaega o le lalolagi. Ia te outou uma na, ou te faailoa atu lo’u faaaloalo faamaoni ma a’u saafiafiga.
Ua fetalai le Alii e faapea e fiafia o Ia e “faamamalu i e auauna mai ia te a’u i le amiotonu ma le upu moni e oo i le iuga.
“E sili lava lo latou taui, e faavavau foi lo latou mamalu” (MFF 76:5–6).
Ia tumau pea i o tatou loto ma mafaufau ia upu a Nifae:
“Lo’u agaga e, ala mai ia! Aua le toe vaivai i le agasala… .
“… E fiafia lo’u agaga ia te oe, lo’u Atua, le papa foi o lo’u olataga” (2 Nifae 4:28, 30).
Ou te tatalo ma le lotomaulalo ina ia faamanuia i tatou e le Alii e fai “mea uma tatou te mafaia” i lenei “ala masani” ua tatou filifilia, lea ou te molimau atu e moni i le suafa o Iesu Keriso, amene.