Faatuatuaga, Aiga, Mea Moni, ma Fua

O nisi mea moni e ono aofia ai:

• Muamua, o le “Mamona” o se igoa tauvalaau O Le Ekalesia a Iesu Keriso o le Au Paia o Aso e Gata Ai. E masani ona taua tagata o le ekalesia o “Mamona,” “Au Paia o Aso e Gata Ai,” po o le “AAG.” O le upu “Au Paia” o lona uiga o le “tagata o le ekalesia.”

• Lua, o le Ekalesia na toefuataiina i le 1830 i Niu Ioka i matu ma o Iosefa Samita o lona uluai perofeta ma le peresitene. O aso nei, o lona laumua o loo i le Aai o Sate Leki ma o le perofeta o loo i ai nei o Peresitene Gordon B. Hinckley.

• Tolu, o le taimi nei ua silia i le 13 miliona tagata o le ekalesia i atunuu ma teritori e 176. Pe tusa ma le 6 miliona o nei tagata o loo i le Iunaite Setete, ua avea ai i matou ma tapuaiga Kerisiano e lona fa le toatele i totonu o Amerika. I le avea ai ma se tasi o faatuatuaga Kerisiano ua vave lona faatoateleina i le lalolagi, matou te faamaeaina se falesa fou i aso faigaluega uma lava. E totogi e tagata o le ekalesia se sefuluai, o le 10% o a latou tupe maua, ua mafai ai ona faatino lenei polokalama ma isi polokalama.

• Fa, o aulotu i le lotoifale e taitaiina e tagata volenitia o le ekalesia, ma e le totogia. O alii ma tamaitai e galulue uma i tofiga faaleautaitai e tofia i ai.

• Ma le lona lima, o Mamona o loo tulaga lelei i faiga faaupufai ma malo. (I le Iunaite Setete, mo se faataitaiga, e 16 tagata o le ekalesia o loo i le Konakeresi, mai vaega faaupufai uma e lua.) O loo tautua foi tagata o le ekalesia i tulaga maualuluga ma faatuatuaina i le lalolagi atoa i malo, pisinisi, faafomai, tulafono, aoaoga, ala o faasalalauga, taaloga, ma faafiafiaga.

O le isi mea, e tatau ona iloa e tagata se mea e uiga i lo tatou faatuatuaga i le avea ai o ni tagata Kerisiano faamaoni e i ai ni tulaga faatauaina mausali. Faatasi ai ma Mataupu Faavae o le Faatuatua, e tatau ona tatou faamamafa atu e faapea:

• Matou te talitonu i le faavavau o le agaga, ma o le Atua o le Tama o o tatou agaga, ma e mafai ona tatou toe foi atu ia te Ia pe a mavae le oti.

• Matou te talitonu o Iesu Keriso o lo tatou Faaola patino, ma matou te taumafai e faataitai o matou olaga ia te Ia ma Ana aoaoga. Matou te faamanatuina le taulaga togiola a Keriso i a matou sauniga lotu i Aso Sa, e talitutusa lava ma le komunio a isi ekalesia. Matou te taliaina e pei o isi uso Kerisiano uma o e talitonu ia Iesu Keriso o le Alo o le Atua ma le Faaola o tagata uma. E toatele tagata Kerisiano e le malamalama e tele ni manatu matou te tutusa ai ma i latou. Na aoao mai Iosefa Samita o Iesu Keriso o le totonugalemu lea o lo matou talitonuga, ma o isi mea uma e ala mai ia te faaopoopo atu i ai (tagai i le Elders’ Journal, July, 1838, 44). O le igoa o le Ekalesia O Le Ekalesia a Iesu Keriso o le Au Paia o Aso e Gata Ai.

• Matou te talitonu o le ekalesia na i ai muamua lea sa faatuina e Iesu na aveesea ma ua toefuatai mai i o tatou taimi. O le perisitua, o le pule e tuuina mai i alii e galulue ai i le suafa o le Atua, faatasi ai ma aposetolo ma perofeta e taitaiina i tatou, ua toefuataiina mai ma ua i ai sauniga uma e manaomia mo le faaolataga.

• Matou te talitonu i ai ma e matou te faaaogaina Tusi Paia, le Feagaiga Tuai ma le Feagaiga Fou.

• Ma e matou te talitonu i le Tusi a Mamona ma isi tusi o tusitusiga paia e lagolagoina ma faamaonia le Tusi Paia ma molimau i le galuega ma le paia o Keriso faapea ma faaaliga faifai pea a le Atua i tagata. E moni, o le Tusi a Mamona o se “Tasi Molimau ia Iesu Keriso.”

O le isi mea e lelei ona iloa e tagata o le auala e avea ai le aiga-ma totonugalemu o la tatou tapuaiga ma o tatou ituaiga olaga. E toe faamanatu atu, o faamatalaga faigofie e fesoasoani tele i se tasi e lei iloaina ae o loo fia iloa i lo tatou faatauaina o le aiga.

• E tuu e tagata Mamona le faamamafa aupito taua i le aiga o se iunite faavae o le Ekalesia ma le lalolagi. E i ai sa tatou tautinoga loloto i le faaipoipoga (ua faamatalaina o se faatasiga i le va o se alii e toatasi ma se tamaitai e toatasi). O autaunonofo, o se faiga ua faatapulaaina i aso o paionia anamua a le Ekalesia, na le toe faaauauina i le 1890, e tusa ua 117 tausaga ua mavae.

• E mafai e aiga ma tagata taitoatasi, e tusa pe auai i lo tatou faatuatuaga pe leai, ona auai i sauniga i le Aso Sa i o tatou falesa. O iinei tatou te tapuai faatasi ai, aoao e le tasi le isi mai tusitusiga paia.

• Ua uunaia aiga o le Au Paia o Aso e Gata Ai e fai afiafi faaleaiga i vaiaso taitasi i afiafi o Aso Gafua. O lenei mea e maua ai se taimi masani ma tuupoina mo matua e aoao atu ai tulaga faatauaina i a latou fanau ma ia maua ni taimi e fiafia faatasi ai. Matou te valaaulia i latou e le auai i la tatou ekalesia e faatino lenei faiga i totonu o o latou lava aiga.

• E i ai polokalama faa-ausilali a le Ekalesia mo tamaitai, autalavou, ma tamaiti e avea o se lagolago i le aiga. O nei polokalama e maua ai tulaga e pei o aoaoga faalelotu, avanoa mo auaunaga faaKerisiano, taaloga, tala faatino, musika ma Sikauti.

• Ma ua i ai foi se taulaiga tele i le aiga lautele, gafa, ma talafaasolopito patino a le aiga, e tuuina atu ai i tagata talavou ma tagata matutua se lagona mausali i tupuaga, faasinomaga, ma le auai [i se aiga]. O sauniga aupito maualuga ma paia o lo matou faatuatuaga e faatatau i o matou aiga, i e o soifua ma e ua maliliu, ma o nisi o nei sauniga e faia i totonu o o matou malumalu.

Ia, e tusa pe ua amata ona malamalama se tagata i ni nai mea moni e uiga ia i tatou ma iloa lelei i tatou e ala i lo tatou faatuatuaga ma le taua o aiga, ae na fetalai le Faaola “tou te iloa ai i latou i o latou fua” (Mataio 7:20; faaopoopo faamamafa). O se ekalesia, po o soo se auala lava o le olaga, e tatau ona faamasinoina i fua po o taunuuga e maua mai ai. O ni nai faataitaiga nei e faavae i faamaumauga a le Iunaite Setete. Ae e tatau ona tutusa i le lalolagi atoa i tagata Mamona toaaga, (o lona uiga o i latou o e auai atu e le aunoa i le lotu ma le malumalu):

• O se tasi o fua o le ola tulu’i. Ua faaalia i suesuega o tagata Mamona toaaga e sili atu ona ola maloloina ma o lea e umi ai ona ola nai lo le averesi o le atunuu. I le 1833 na faaali mai ai e le Alii ia Iosefa Samita le Upu o le Poto o le auala lea e tatau ona ola ai ina ia mafai ona olioli i se olaga umi ma maloloina.

• Lua, o i latou e faaipoipo i le [malumalu] ma o atu i le malumalu e le aunoa, e matua maualalo se pasene o le tete’a nai lo le averesi a le atunuu ma le lalolagi.

• Tolu, tatou te ausia tulaga faaleaoaoga e maualuga atu nai lo le averesi a le atunuu.

• Fa, e silia ma le 70,000 tagata o le ekalesia o loo auauna atu ae faatupe e i latou lava ina ia auauna atu mo le 18 i le 24 masina i taumafaiga o fesoasoaniga alofa, o tofiga a le Ekalesia, ma le galuega faafaifeautalai i le lalolagi atoa.

• Ma le lona lima, tatou te tuuina atu se faamamafa malosi i le ola faalagolago o le tagata ia te ia lava, ma se mataupu faavae malosi o le galue. Tatou te uunaia le matuai aofia ai i mea e fai i o tatou nuu ma afioaga ma le tuuina atu o le auaunaga i isi. O loo faaauau pea ona foai atu e le Ekalesia se aofaiga tele o tupe, mea e faaaoga, ma le tautua i faamoemoega o fesoasoani alofa i le lalolagi atoa e aofia ai le tele o itula e galulue ai, e foai atu e tagata o le ekalesia e fesoasoani ai e faamama ma fesoasoani i se faalavelave.

Uso e ma tuafafine, i le lalolagi pisi i aso nei, ua ou iloa ai o le toatele o tagata o le a le faitau pe taulai atu i ni nai mea moni taua se tele i se taimi e tasi. Po o le a lava le mea e te filifilia e faaaoga e ta’u atu ai i au uo ma aumea e uiga i le Ekalesia, ia tusi i lalo, siaki mo le sa’o atoatoa, ma ia faafaigofie ma faapuupuu.

O le faatupulaia o le lauiloa o le Ekalesia ma le faateleina o fesili mai isi ua tuuina mai ai ia i tatou ni avanoa se tele e fausia ai sootaga, faia ni uo, ma ta’u atu faamatalaga sa’o. Ae e mafai foi ona tuuina mai ai se avanoa sili atu o le lē malamalama ma o nisi foi taimi o le faailoga tagata pe afai tatou te faatagaina isi e faamatala po o ai i tatou ma o a foi o tatou talitonuga nai lo le faailoa atu e i tatou lava.

O le mea masani lava, e leai se faafitauli ia i latou e fegalegaleai patino ma o tatou tagata o le ekalesia. Ae e miliona ma miliona i latou e le masani i se tagata o le tatou faatuatuaga. Ma ou te faamoemoe o i latou o e itiiti lava se mea latou te iloa e uiga i le Ekalesia o le a saili e aoao atili e uiga ia i tatou. Ou te faamoemoe o le a latou faamasani i tagata o la tatou ekalesia nai lo le faamasinoina o i tatou i faamatalaga sese e tuuina atu e i latou e le silafia ma i nisi tulaga mai ia i latou o e o le a taitaiseseina pe faatiga ma le loto i ai.

O outou o tagata o le ekalesia e mafai ona fesoasoani ia tupu lenei mea e ala i le aapa atu ma faasoa atu i isi ia faamatalaga autu o loo maua i le Mataupu Faavae o le Faatuatua, faatasi ai ma mea e pei o mea moni, faatuatuaga, aiga, ma fua o le talalelei.

E tatau foi ona tatou manatua o nisi taimi o le auala sili e tali atu ai i le fia iloa o tagata o le ala lea o loo tatou ola ai, o le auala o loo tatou faasusulu atu ai le olioli o le talalelei i o tatou olaga, o le auala tatou te taulimaina isi, ma le auala o loo tatou mulimuli ai ma le faamaoni i aoaoga a Keriso.

Mo i latou o e mananao e aoao atili nai lo na o ni nai aoaoga faavae ua ou talanoaina, e mafai ona valaaulia faifeautalai e aoaoina i latou i aoaoga faavae mai le mataupu e 3 i le Talai La’u Talalelei. Ua silafia e faifeautalai ona tali le tele o a latou fesili ma taitai atu i latou i le liuaina ma le papatisoga.

O le taimi lenei mo i tatou uma e aapa atu ma ta’u atu i isi pe o ai i tatou. Ia saunia ni nai mea moni faigofie e pei o vaega na ou faasoaina atu ia te outou i le asō, ma fesoasoani ia i latou o e masalosalo ia iloa sina mea itiiti e uiga i le Ekalesia ma ia mananao ai e iloa atili e uiga i le Toefuataiga o le talalelei.

Uso e ma tuafafine, aua lava nei faatuai i le tuuina atu o lau molimau faatasi ma le faamaoni o lou loto ma le alofa. E le mafai ona faafitia le mana o le molimau patino ma e tele taimi e faaosofia ai i isi le fia iloa atili. Ou te iloa e moni lenei mea ma ou te tuuina atu ai ia te outou la’u molimau maua’i ou te iloa O Le Ekalesia a Iesu Keriso o le Au Paia o Aso e Gata Ai e moni, ma ou te tuuina atu ai lenei molimau ia te outou i le suafa o Iesu Keriso, amene.