Tuleiga

Ou uso pele pe o fea lava o e i ai, iinei i le Maota Autu mo Konafesi po o se fale o le Ekalesia i se mea mamao o le atuvasa, o se mea ofoofogia le mafai ona matou lauga atu i lenei Maota Autu mo Konafesi, ma mafai ona outou faafofoga mai i mea o matou tautala atu ai i se nofoaga e pei o le mamao o Cape Town, i Aferika i Saute.

Ua ou filifili i le po nei e tautala atu i le mataupu o le ita. Ua ou iloa e fai lava si fou o lea mea, ae ua ou manatu ua talafeagai lelei.

Fai mai se faataoto o le Feagaiga Tuai: “E sili ona lelei o le ua gesegese i le ita i le ua malosi; e sili foi le ua pule i lona loto i le na te aea le aai” (Faataoto 16:32).

Tatou te feagai ma faafitauli pe a tatou feita. O le faalii a o aveina le taavale lea e aafia ai i luga o le alatele, o se ata inosia lea o le ita. Ou te manatu o le toatele o o tatou uso i o tatou toese ua i ai iina ona sa latou faia se mea ina o feitai. I lo latou ita, sa latou palalauvale ai, sa le mafai ai ona taofiofia i latou lava, ma tutupu ai mea matautia, e oo lava i le fasioti tagata. Sa i ai taimi o le faatiga ma sosoo ai ma tausaga o le faanoanoa.

O le tala lenei e uiga ia Charles W. Penrose. O ia o se tagata sa liliu mai i le Ekalesia, ma sa avea ma se faifeautalai i Egelani mo le 11 tausaga. Ina ua faamalolo mai o ia, sa ia faatauina atu nisi o ana meatotino e totogi ai lana malaga mai i Siona. Sa i ai nisi o le Au Paia sa matauina o ia ma latou faapea ai, ua ia aveina meatotino a le Ekalesia.

O lena mea na matua ita ai o ia, o lea sa alu ai i le falealuga o lona fale, ma nofo ai i lalo, ma tusia fuaiupu nei, ia ua outou masani ai (Tagai Karen Lynn Davidson, Our Latter-day Hymns: The Stories and the Messages [1988], 323.)

I le tele o tausaga ua mavae, sa ou faigaluega ai i se tasi o a tatou auala o nofoaafi. Sa i ai se tagata e faigaluega ai foi sa na o le fesavaliai solo ai lava iina, i se tasi aso. Sa ou fai atu ia te ia e tago e aveese se taavale nofoaafi sa i ai, i se isi laina. Sa matua faalii o ia. Sa togi lona pulou i luga o le ala ma osooso ai i luga, ma laulauvavale e pei o se seila onā. Sa ou tutu ai iina ma ata i lana amio faatamaitiiti. Ina ua vaai mai o ou ata, sa amata ona ata i lona lava faavalevalea. Ona amata ai lea ona oso gugu i luga o le masini e aveese ai taavale nofoaafi, ma aveese atu ai le taavale nofoaafi e le o faaaogaina, ma tuu i se laina avanoa.

Sa ou mafaufau i se fuaiupu mai le Failauga: “Aua le faataalise ona ita o lou loto; aua e tumau le ita i loto o e valelea” (Failauga 7:9).

O le ita o le tina o aga faatiapolo.

Sa ou aumaia mai se nusipepa o le taeao se tala na talamaea lava i le faamatalaga lenei:

“E silia ma le afa o tagata Amerika i latou semanu e sami le ta’i 25 tausaga o a latou faaipoipoga talu mai le 2000 a ua tatala faaipoipoga, ua tetea, pe ua nonofo taitoatasi foi a o lei aulia lena taimi taua” (Sam Roberts, “Most U.S. Marriages Don’t Get to Silver,” Deseret Morning News, Sept. 20, 2007, p. A1).

O le oti o le tane po o le ava e le mafai ona pulea e le ulugalii, ae o le tatala o le faaipoipoga ma le tetea e leai.

Ua tele ina avea le tatala o faaipoipoga ma fua oona matuitui o le ita. E i ai se alii ma se tamaitai ua matuai alofa lava le tasi i le isi, pei ona la faaupuina ai; ua taufai aulelei ma lalelei le tasi i le isi, ua leai lava se isi e faaluaina lo la alofa faamemelo; ua la tauivi malosi ia maua tupe e faatau ai se mama faaipoipo; ona la faaipoipo ai lea. Ua lelei mea uma—o lona uiga, mo sina taimi. Ona oo mai lea o nai mea iti e le taua ma oo atu ai i faitioga. O nai masei laiti ua faalauteteleina ma avea ma uaga tele o le vailiili masei; ua motusia le mafutaga, ua tetea, ona sosoo ai lea ma le inoino ma le oona matuitui ma tatala ai le faaipoipoga.

O le faiga lava lea o loo tupu pea lava pea i le fia afe o faafitauli. E matautia, ma e pei lava ona ou fai atu, o le tele lava o mea, e tutupu ona o le fua oona o le ita.

Ou te mafaufau i la’u lava faaipoipoga. Ua tolu nei tausaga talu ona maliu la’u soa e faavavau. Peitai, sa ma nonofo faatasi mo le 67 tausaga. Ou te le manatuaina lava se taimi na ma misa ai. Ma te malaga faatasi ma ia ma lauga i konetineta uma, ma augani atu i tagata ina ia faatino i le agalelei ma le alofa.

Sa i ai se tamai lomiga na ou maua i ni nai tausaga ua mavae o loo tusia ai lenei mea:

“Sa i ai se alii na faaleaga e se nusipepa, ona sau lea ia Edward Everett Hale e fesili po o le a se mea e fai i ai. Fai mai Everett, ‘Aua le faia se mea! O le afa o tagata na faatauina le pepa, e lei vaai lava i lea tala. O le afa o i latou na vaai i ai, latou te lei faitauina. O le afa o i latou na faitauina, e lei malamalama ai. O le afa o i latou na malamalama ai, e lei talitonu i ai. O le afa o i latou na talitonu i ai, latou te lei faatauaina.” (“Sunny Side of the Street,” Nov. 1989; tagai foi Zig Ziglar, Staying Up, Up, Up in a Down, Down World [2000], 174).

Ua toatele naua i tatou e amanaia mea iti e faaletaua. Ua matua o tatou itaita gofie tele. Amuia lava se tagata e mafai ona le amanaiaina tala faatiga a se tasi ae alu lava ia i lona ala.

O mea faafatuulu, afai e tuu ai lava e faalavelave ia i tatou, e mafai ona avea ma faafitauli matautia. Pei lava o se ma’i tiga, e mafai ona mitiia uma ai lo tatou taimi ma le malosi. Na tusia e Guy de Maupassant se tala faatupu manatu e faamatala ai lenei mea.

E faatatau i le alii o Hausikome, o le sa alu i le taulaga i le aso o le maketi. Sa mafatia o ia i le rumatika, ma a o setusetu atu o ia, sa ia vaaia se fasi manoa o taatia i ona luma. Sa tago o ia ma avae ma tuu i totonu o lana taga. Sa matauina mai ana mea na fai e sona fili, o le fai faagutu o solofanua.

O le taimi foi lea, sa lipotia mai ai i le pulenuu se atotupe o loo i ai se tupe ua leiloa. Sa tuuaia Hausikome faapea o le mea lea na ia pikiina i luga, o le atotupe. Sa ia matua faafitia lava lea tuuaiga. Sa sueina ona lavalava ma sa maua ai na o le fasi manoa, peitai o tuuaiga sese e faasaga ia te ia na matua tiga ma mafatia ai o ia. Soo se mea lava sa alu i ai, na te faamatalaina ai lava i tagata. Sa matua avea o ia ma faasoesa, ma sa faasea tagata ia te ia. Sa oo ina ma’i ai.

“Sa oo ina amata ona vaivai lona mafaufau, ma pe tusa o le faaiuga o Tesema na le mafai ai ona toe fealuai.

“Na maliu o ia i le amataga o Ianuari, ma i ana toe fasaga lava ina o le a maliu, sa ia faia ai se tautinoga malosi o lona taumamaina, ma faapea mai:

‘O se tamai [fasi] manoa, se tamai [fasi] manoa. Vaai, lea, [lau Susuga Pulenuu]’” (Guy de Maupassant, (Tagai ”The Piece of String,” http://www.online-literature.com /Maupassant/270/.)

E i ai se tala faapea na faatalanoaina e le au fai lipoti se tamaloa i lona aso fanau. Ua pulapula lagoto le soifua. Sa latou fesili pe o le a le mafuaaga o le umi o lona soifua.

Sa tali atu o ia, “Ina ua ma faaipoipo ma lo’u toalua, sa tonu ia i maua afai e i ai se taimi ma te tauaiupu ai, ona alu lea o se tasi o i maua i fafo ma le fale. O le mea moni ua umi ai lo’u ola, ona o le tele o le ea fou sa ou manavaina i le gasologa o lo’u olaga faaipoipo.”

Atonu e i ai nisi tulaga e alagatatau ai le ita. O loo ta’u mai i le mau na tutuli ese e Iesu le au faatau tupe mai le malumalu ma fetalai atu: “E ta’ua lo’u fale o le fale tatalo, a ua faia e outou ma ana o e faomea” (Mataio 21:13). Peitai, e oo lava i lenei mea, sa fetalai i ai o se aoaiga nai lo se mateletele o le ita le taofiofia.

O lenei la, o’u uso pele, i le faaiuga, ou te aioi atu ia te outou, ia pulea lelei lo outou lotoita, ia tuu se ataata i ou foliga, lea o le a soloiese ai le ita; tautala mai i upu o le alofa ma le filemu, faafetai ma le faaaloalo. Afai o le a e faia lenei mea, o le a aunoa o outou olaga ma ni faanoanoaga. O le a faasaoina a outou faaipoipoga ma sootaga faaleaiga. O le a tele atu lo outou fiafia. O le a tele atu mea lelei tou te faia. O le a outou faalogoina le lagona o le filemu lea o le a matagofie lava.

Ia faamanuia outou e le Alii ma musuia outou ina ia savavali e aunoa ma le ita, e aunoa ma le matuitui o soo se ituaiga, ae aapa atu i isi ma lagona o le faauo, talisapaia, ma le alofa, o la’u tatalo faamaulalo lea, i le suafa o Iesu Keriso, amene.