O Tina Ua Latou Iloa

O tina ua iloa, e naunau foi e fanauina fanau. E ui o le tele o aganuu i le lalolagi, ua “le faatauaina tele ai”² fanau, o le aganuu o le talalelei o loo tatou talitonu pea lava i le i ai o fanau. Ua tautino mai e Perofeta, tagatavaai, ma talifaaaliga ia sa lagolagoina i lenei konafesi, o le “poloaiga a le Atua i Lana fanau ia fanafanau ma uluuluola ai le lalolagi ua faamalosia ma faatumauina.”³ Na aoao mai foi e Peresitene Ezra Taft Benson e le tatau i ulugalii talavou ona tolopo le faia o fanau ma “i le vaaiga faale-faavavau, o fanau—ae le o oa, e le o tulaga, e le o mamalu—o a tatou maataua aupito silisili ia.”⁴

O afafine faamaoni o le Atua e mananao i fanau. I tusitusiga paia ua tatou faitau ai ia Eva (tagai Mose 4:26), o Sara (Kenese 17:16), Repeka (tagai Kenese 24:60), ma Maria (tagai 1 Nifae 11:13–20) o ē sa muai faauuina e avea ma tina a’o lei fanauina e i latou fanau. O nisi tamaitai ua le tuuina i ai le tiutetauave o le fanauina o fanau i le olaga nei, ae pei lava foi ona tatalo faatauanau Hana o le Feagaiga Tuai mo lana tama (tagai 1 Samuelu 1:11), o le taua e tuu e tamaitai i le tulaga faatina i lenei olaga, ma uiga o le tulaga faatina latou te mauaina i lenei olaga, o le a toetutu ma i latou i le Toetutu (tagai MFF 130:18). O tamaitai e mananao ma galulue mo lena faamanuiaga i lenei olaga, ua folafola atu i ai o le a latou mauaina mo le faavavau atoa, ma o le faavavau e matua umi lava nai lo le olaga nei. E i ai le aafiaga e faavavau ma le mana i le tulaga faatina.

O tina ua iloa, latou te faamamaluina sauniga paia ma feagaiga. Ua ou asiasi i sauniga faamanatuga i nisi o nofoaga e sili ona matitiva i le lalolagi, ia e matua faaeteete ai lava tina i o latou laei sili o le Aso Sa e ui ina savavali mo le tele o maila i auala pefua pe malaga foi i taavale faitele malepelepe. E o mai ma a latou fanau teine e mama ma mafolafola lelei le auliga o o latou ofu ma o latou ulu ua selu faalelei; o a latou fanau tama e fai o latou ofutino papae ma fusiua ma ulu e ‘oti faata’iti. E iloa e nei tina o loo o i le sauniga faamanatuga lea e faafou ai feagaiga. Ua uma ona osia ma faamamaluina e nei tina feagaiga i le malumalu. Ua latou iloa afai latou te le saunia a latou fanau mo le malumalu, latou te le o saunia i latou mo sini manaomia o le faavavau. Ua i ai i nei tina le malosi e uunaia ai ma le mana.

O tina ua iloa, o ni e faafailele. O la latou galuega faapitoa lenei ma matafaioi i le ata o le fiafia.⁵ O le faafailele o lona uiga o le galueaiina, tausia, ma fai ia ola. O lona uiga, o tina ua iloa, latou te fatufatuina se siosiomaga mo le ola faaleagaga ma le faaletino i o latou fale. O se tasi upu mo le faafailele o le tausiaiga. O le tausiaiga e aofia ai le kuka, faamama o lavalava ma ipu, ma le faatulagaina lelei o le fale. O le fale, o iina e tele ina maua ai e tamaitai le mana ma uunaiga; o le mea lea, e tatau i tamaitai o le Au Paia o Aso e Gata Ai ona avea ma tausiaiga aupito sili i le lalolagi. O le galulue faatasi ma le fanau i galuega faatausiaiga, e maua ai avanoa e aoao atu ai ma faata’ita’i uiga taua e tatau ona faaa’oa’o i ai le fanau. O tina faafailele e tele lo latou silafia, peitai o aoaoga uma lava e maua e tamaitai o le a augapiu se aoga pe afai e leai ni o latou tomai e fausia ai se aiga e faatupuina ai se siosiomaga mo le tuputupu a’e faaleagaga. O le tuputupu a’e e sili ona tulai mai i se “fale o le tulaga maopoopo” ma e tatau i tamaitai ona mamanuina o latou fale i le fale o le Alii (MFF 109). O le faafailele e manaomia ai le faatulagaina, onosai, alofa, ma le galue. O le fesoasoani i le tuputupu a’e e ala i le faafailele, o se matafaioi mamana moni lava ma le faatosina ua faaee mai i tamaitai.

O tina ua latou iloa, o ni taitai. I se tulaga faapaaga tutusa ma a latou tane, latou te taitaia se faalapotopotoga tele ma le faavavau. O nei tina latou te fuafuaina le lumanai o la latou faalapotopotoga. Latou te fuafua mo misiona, o faaipoipoga i le malumalu, ma a’oga. Latou te fuafuaina talosaga, suesueina o tusitusiga paia, ma afiafi faaleaiga. O tina ua iloa, latou te galueaiina fanau e avea ma taitai i le lumanai ma o faataitaiga muamua ia o foliga o taitai. Latou te lafoaia la latou fuafuaga e ala i le faamatuu atu i uunaiga faitele ma ala faamātua a le lalolagi. O nei tina atamamai o ē ua iloa, e faautauta i a latou lava gaoioiga ma lo latou auai, ina ia faasaoina ai lo latou malosi utiuti ina ia tele la latou uunaiga i mea e sili ona taua.

O tina ua iloa, o ni faiaoga e le aunoa. Talu ai e le o i latou o ni tausitama, e leai lava se taimi ua leai ai ni o latou tiute faatina. Sa fai mai sa’u uo aoaoina lelei, e leai lava se mea na ia aoaoina i le lotu faapea na te lei iloaina muamua mai le fale. Sa faaaoga e ona matua suesuega faaleaiga o tusitusiga paia, tatalo, afiafi faaleaiga, ma le taimi o meaai, ma isi taimi e potopoto ai, e aoao ai [i latou]. Manatu i le mamana o a tatou faifeautalai i le lumanai pe afai e fai e tina o latou fale o se mua’i nofoaga tutotonu e aoao ai faifeautalai. Ona avea lea o aoaoga faavae o le talalelei e aoao i le MTC ma se toefaamanatu ae le o se mea faatoa amata ona aoao. O se uunaiga lena; o le mana lena.

O tina ua iloa, e itiiti mea latou te faatagaina. E itiiti mea e le fua mai ai ni fua lelei e faavavau latou te faatagaina. E itiiti ala o faasalalauga latou te faatagaina i totonu o o latou fale, itiiti mea faalavelave, itiiti gaoioiga e aveesea ai a latou fanau mai lo latou fale. O tina ua iloa, e naunau e ola i nai mea iti ma itiiti foi mea o le lalolagi latou te faaaogaina, ina ia mafai ai ona tele atu le taimi e faaaluina faatasi ma a latou fanau—tele atu taimi e aai faatasi ai, tele atu taimi e galulue faatasi ai, tele atu taimi e faitautusi faatasi ai, tele atu taimi e talanoa ai, talie, pepese, ma faasino ai. O nei tina latou te filifili toto’a ma e latou te le taumafai foi e fai ma ia maua mea uma. O la latou sini o le saunia lea o se augatupulaga faia’e o fanau o le a aveina atu le talalelei a Iesu Keriso i le lalolagi atoa. O la latou sini o le saunia lea o tamā ma tina mo le lumanai o ē o le a avea ma tufuga o le malo o le Alii mo le isi 50 tausaga. O se uunaiga lena; o le mana lena.

O ai o le a saunia lenei tupulaga amiotonu o atalii ma afafine? O tamaitai o le Au Paia o Aso e Gata Ai o le a faia lena mea—o tamaitai ua iloa ma alolofa i le Alii ma molimau atu e uiga ia te Ia, o tamaitai o e malolosi ma mausali, ma e le fiu gofie i taimi faigata ma le faavaivai loto. Ua taitaia i tatou e se Perofeta musuia a le Atua o lē ua valaau mai i tamaitai o le Ekalesia ina ia “tutu mausali mo le mea sao ma tonu e tusa ma le fuafuaga a le Alii.”⁶ Ua ia talosagaina i tatou ina ia “amata i totonu o [o tatou] lava fale”⁷ ona aoao le fanau i ala o le upumoni. E tatau i tamaitai o le Au Paia o Aso e Gata Ai ona aupito sili i le lalolagi i le tausiga, faafailele, ma le puipuia o aiga. Ua ou matua talitonu o le a faia e o tatou tamaitai lenei mea, ma o le a lauiloa o tina “sa iloa” (Alema 56:48). I le suafa o Iesu Keriso, amene.