ʻEletā Carlos A. Godoy

ʻOku pehē ʻe ʻEletā Kālosi ʻAokositō Kotoi, ʻa ia ne toki uiuiʻi ki he Kōlomu ‘Uluaki ʻo e Kau Fitungofulú, “Mahalo pē te ke mavahe mei ho ngaahi kaungāmeʻa kehé, ka ʻe kei ʻi ai pē ʻa e fāmilí.”

ʻOku leaʻaki ʻe ʻEletā Kotoi e ngaahi meʻa kuó ne aʻusia. Tupu mei he ngaahi faingamālie fakaakó, ngaahi ngāue fakapalofesinalé mo e ngaahi ngāue ʻi he Siasí, kuo nofo ai ʻa ʻEletā Kotoi; hono uaifí, ko Monika Soalesi Pelenitou; mo ʻene fānau ʻe toko faá, ʻi ha ngaahi feituʻu lahi, kau ai ʻa Pōtō ʻAlekili ʻi Palāsila; Sao Paulo ʻi Palāsila; Polovo ʻi ʻIutā, USA; mo Pēlemi ʻi Palāsila.

Naʻe hounga kia ʻEletā Kotoi e ngaahi fetuʻutaki fakafāmili vāofí ki muʻa pē ia peá ne toki fononga holo ʻi hono fonuá pē pea ki mulí foki ʻi hono ngaahi fatongiá. Naʻá ne ʻuluaki ʻilo ki he ongoongolelei ʻo Sīsū Kalaisí ʻi haʻane ʻalu mo hono tuofefine siʻí ki ha ʻekitivitī ʻa e Siasí naʻe fai. Naʻe hoko ai mo ʻene feʻiloaki mo e ongo faifekaú pea papitaiso ia hili ha māhina ʻe taha mei ai.

Naʻe fāʻeleʻi ʻa ʻEletā Kotoi ʻi he ʻaho 4 ʻo Fēpueli 1961, ʻi Pōtō ʻAlekili ʻi Palāsila, kia Moasi Kotoi mo ʻĪvoni Poesi Kotoi. Naʻá ne kau ki he Siasí ʻi he 1977 pea ngāue fakafaifekau taimi kakato ʻi Sao Paula kimui ai. Naʻá na mali mo Mōnika, ʻa ia naʻá na fetaulaki ʻi ha konifelenisi ʻa e toʻu tupú he faʻahitaʻu māfaná hili pē ha taimi nounou mei heʻene kau ki he Siasí, ʻi he 1984 ʻi he Temipale Sao Paulo Palāsilá.

Naʻe maʻu e mataʻitohi ʻo ʻEletā Kotoí ʻi he ʻekonōmiká mo e saienisi fakapolitikalé mei he Pontificia Universidade Católica pea mo hono MA ʻi he ʻulungāanga ki hono fokotuʻutuʻu ha faʻahinga kautaha mei he ʻUnivēsiti Pilikihami ʻIongí. Naʻá ne ngāue ʻi ha ngaahi lakanga fakapisinisi kehekehe peá ne toki kamata ke fokotuʻu ʻene kautaha pē ʻaʻana.

Naʻe hoko ʻa ʻEletā Kotoi ko ha pīsope, aleaʻanga māʻolunga, palesiteni fakamisiona, mo e Fitungofulu Fakaʻēlia. ʻOkú ne pehē kuó ne ako lahi ange ʻi he ngaahi faingamālie ko ʻeni ke ne ngāue aí, ʻo kau ki he founga ʻe “hoko ai” peá ne hanganaki atu ke ako ʻi hono uiuiʻi foʻoú.

ʻOkú ne pehē, “ ʻOku ou ongoʻi taʻefeʻunga, ka ʻoku ou ʻilo ʻoku tataki ʻe he Fakamoʻuí ʻa e ngāué ni pea te Ne lava ʻo tokoniʻi kitautolu kotoa ke tau hoko ʻo hangē ko Iá.”