O UO
Semanu o Au
Filifili uo e tutusa mea tou te faatauaina. Ia agalelei ma faaaloalo i tagata uma. Ia valaaulia au uo mai isi lotu i a outou gaoioiga faale-Ekalesia. Aapa atu i uso fou faatoa liliu mai, ma i latou ua le toe toaaga mai.
Ina ua fitu ou tausaga, sa siitia mai ai se teineitiiti i lo matou tuaoi, ma sa avea i maua o se uo. Sa tutusa mea ma te fiafia i ai, ma sa avea i maua mai faatosinaga lelei o le tasi i le isi. Sa ma faia ni filifiliga lelei aua sa aoaoina i maua e o ma matua ina ia filifili ma le atamai.
Ae ina ua ma oo atu i le vasega ono, sa ma faia ni filifiliga sese ina ia talia ai i maua e a ma uo e maualalo o latou tulaga faatonuina. I le tausaga na sosoo ai, sa ou filifili ai e manaomia le suia o au uo ina ia mafai ai ona ou amata le toe faia o filifiliga sao e ala i le ola ai i tulaga faatonuina maualuga. Na pau lava le faafitauli ona o au ma lau uo o loo tumau pea ona ma uo, ma sa ou le manao e taofia le ma faifaimea faatasi ai.
O le faia o le mea e tatau ona ou faia sa faigata. Sa tauina mai ia te au i lou olaga atoa ina ia filifili uo lelei ma tausia ou tulaga faatonuina maualuluga. Ae sa leai sau molimau pe aisea e taua ai lea tulaga, o le mea lea e tatau ai ona ou talitonu e sao lea mea. I le gasologa o le taumafanafana ma le vasega valu, sa ma le toe feofeoai ai loa ma lau uo ma filifili ai e alu lava le tagata ia i lona itu.
Sa ou vaaia faamanuiaga o lenei filifiliga i se taimi mulimuli ane ai i lena tausaga. Sa filifili e sa avea ma au uo e aumaia meainu malolosi i le aoga. Sa latou faatosinaina nisi o tamaitai e inu ai, ma sa oo atu i latou uma i se tulaga pagatia. Na ou iloa ai semanu o se tasi o nei tamaitai o au lea. Pe a na faapea sa ou i ai pea faatasi ma i latou, ou te le iloa pe mafai ona i ai sou malosi ou te tu atu ai mo ou talitonuga.
Pe a ou mafaufau i taunuuga na semanu ou te oo i ai, sa ou lagonaina le lofituina. Semanu ou te tauivi ma ni mausa, o le aafia ai i le tulafono, o le aveesea o le faatuatuaga o ou matua, ae o le mea sili, semanu ou te faalataina le faatuatuaga o lou Tama Faalelagi ia te au.
Ou te iloa o mea o loo saunoa mai ai le perofeta e uiga i le ola ai i tulaga faatonuina maualuluga e mo lo tatou puipuiga. E ui lava faapea tatou te vaai i ai o se mea e fai ma faalavelave, ae e fesoasoani tele ia i tatou i le faaleagaga, faaletino, faalemafaufau, ma isi auala tatou te le o iloaina lava.