Fesoasoani ma Ia Fiafia

Sa tomumu Ionatana a o oso atu o ia i luga o le taavale e sosoo ma lona uso o Mika. Sa manao o ia e nofo i le fale ma taalo i le taaloga fou sa ia maua i lona aso fanau i le vaiaso ua tuanai. Ae sa faamalosi mai lona tina ina ia latou o uma i le falelotu ma fesoasoani i le galuega faamama a le uarota.

“Aisea tatou te o ai?” sa fesili atu ai Ionatana ao ia fesoasoani e sii atu le masini miti pefu i totonu o le taavale.

“O le a manaia,” sa tali mai ai tina ma ataata. “E le gata i lea o tatou uma lava e faaaogaina le falelotu. O se mea sao lo tatou fesoasoani e faamama mai lea taimi i lea taimi.”

Sa pulatoa atu Ionatana i fafo o le faamalama ma matamata atu i fale ma laau ua pasia ao latou faimalaga atu i le falesa. Ao aveina atu e lona tina le taavale i le nofoaga e tutu ai taavale o le falesa, sa faateia Ionatana ina ua vaaia le uso o Laseni ua tu lana taavale i tafatafa o le latou taavale.

“Po o le a le mea a le uso o Laseni e fai iinei?” o le taumanatunatu lea o Ionatana.

O le uso o Laseni sa matua ma’i lava talu ai nei i le kanesa ua taua o le lukimia. Sa i ai o ia i le falemai mo se taimi umi lava. Sa manatua e Ionatana le faamalosiau a ona matua ia Mika ma ia e tatalo mo le uso o Laseni pe a fai a la tatalo faaletagata ma tatalo faaleaiga. O le uso o Laseni e lei leva ona toe foi mai mai le falemai.

E masani lava ona fiafia ia Ionatana i le uso ia Laseni. E matua atu o ia nai lo tama matutua o Ionatana, ae e alu atu o ia ma talanoa ma Ionatana ma fesili atu ia te ia e uiga i le aoga ma lana au taalo. I se tasi taimi sa oo atu ai lava i se tasi o taaloga a Ionatana.

Ao oso ese Ionatana mai le taavale, sa talo mai le uso o Laseni ma fai mai, “Talofa Ionatana.” Sa savali le uso o Laseni i tua o lana taavale ma aumai se masini miti pefu mai le keli. Ao savali lemu atu ai, ma tulei le masini i totonu o le falesa.

“Ionatana,” sa valaau mai ai lona tina, “e mafai ona e fesoasoani mai i lenei mea?” O loo taumafai o ia e tau sei mai le latou masini miti pefu mai tua o le taavale.

“Ioe tina,” sa tali atu ai Ionatana. Sa fesoasoani atu o ia i lona tina e sei mai le masini i fafo ma tulei atu loa faatopetope i luga o le tulaga e tutu ai taavale.

I lena afiafi atoa sa galulue soosoo tauau ai Ionatana ma Mika ma le uso o Laseni. I le tele o taimi e vaivai ai Ionatana ma malolo, ae sa ia iloa o loo faaauau pea ona galue le uso o Laseni. Ma o loo ia ataata! “E manaia tele le mafai ona fesoasoani a, e le sao ea lena,” sa fai mai ai le uso o Laseni.

Sa lagonaina e Ionatana se mea ua suia i totonu ia te ia. “Afai e mafai e le uso o Laseni ona fiafia ao ia fesoasoani ai, ou te mafaia foi,” sa ia mafaufau ai. Sa amata ona ia galue atili ai ma le malosi.

“Faafetai ona ua e sau,” o le tala atu lea a le tina ao latou agai atu i le fale.

“Ia faafetai foi,” o le tala atu lea a Ionatana. “Ou te faamalie atu i lo’u faitio e uiga i lo’u sau. Ou te lei iloa e mafai ona e aoaoina ni mea se tele mai le tosoina o le masini miti pefu.”