Faapau Pepe: O Se Faaoolima i E
le Mafai ona Tali Mai
E muamua, ou te fia faatoese atu i le au faitau mo le faaaogaina o faaupuga e le logoleleia. O le natura o le taua lea ou te tautala i ai e manaomia ai le matua manino o le fesootaiga.
I le avea ai ma atalii ma afafine o le Atua, tatou te faapelepele i le ola o se meaalofa mai ia te Ia. O Lana fuafuaga e faavavau ua saunia ai avanoa mo Lana fanau e mauaina ni tino faitino, ia maua ni aafiaga faalelalolagi, ma ia maua lo latou taunuuga paia o ni tupuaga o le ola e faavavau.1
O Le Aofai o e ua Maliliu mai Taua
Faatasi ai ma lena malamalamaaga ma le faaaloalo mo le ola, tatou te faanoanoa ai ona o soifua ua maumau ona o taua. O faamaumauga e maoae. I le Taua Muamua o le Lalolagi, e sili atu ma le 8 miliona fitafita na maliliu ai. I le Taua Lona Lua o le Lalolagi, e sili atu ma le 22 miliona alii ma tamaitai o vaegaau na maliliu ai.2 I le tuufaatasiga o nei taua e lua, e aofia ai le tusa o le 14 tausaga, na maumau ai ola e tusa ma le 30 miliona o fitafita i le lalolagi atoa. O na fuainumera e le o aofia ai le miliona ma miliona o tagata lautele na maliliu ai.
Ae peitai, o nei faamaumauga ua faaitiitia e le faitau aofai o se isi taua ua aafia ai le tele atu o e maliliu i tausaga taitasi nai lo le tuufaatasiga o le Taua Muamua ma le Taua Lona Lua o le Lalolagi. I lipoti i le lalolagi atoa o loo faailoa mai ai e silia ma le 40 miliona faapau pepe ua faatinoina i le tausaga.3
O lenei taua ua faaigoaina o le faapau pepe o se taua e faasaga i e le mafai ona tali mai ma e leai ni leo. O le taua e faasaga i e lei fananau mai. O lenei taua o loo faia i le lalolagi atoa. O le mea moni, o atunuu malamalama e masani ona puipuia le ola o le tagata, ua pasia nei ni tulafono e faatagaina ai lenei faiga.
Aoaoga Faavae Paia
E matua matuia lava lenei mea ia i tatou aua o loo faamanatu mai pea e le Alii lenei tulaga paia e le maalofia: “Aua e te fasioti tagata.”4 Ona Ia faaopoopo mai lea, “Po o le faia foi o se isi lava mea faapena.”5 E oo lava i le taimi e lei tuuina mai ai le atoatoaga o le toefuataiina o le talalelei, sa malamalama ai tagata aoaoina i le paia o le ola o le tagata. O John Calvin, o se tasi sa taulamua i le toefuataiina o le seneturi e sefuluono sa tusia faapea, “Afai e sili atu ona mataga le fasiotia o se tagata i lona lava fale nai lo le malae o taua, … o lona uiga moni e sili atu ona matuia le faaleagaina o se alualutoto i totonu o le manava ao lei fanau mai.”6
O tulafono e faia e tagata ua faapea ona faatagaina ai mea ia sa faasaina e le Atua mai le amataga o taimi! O mafuaaga faaletagata ua fenumiai ai ma faaliliuina mea moni tumau i ni faaupuga laiti ma le poto e faailoa ai se amioga e matuai sese lava.
Popolega Faapitoa
O le popolega mo le soifua maloloina o le tina o se tulaga taua lena. Ae o mea ua tutupu lea e faagataina ai se maitaga e tatau ai ina ia faasaoina le ola o le tina e seasea lava ona tupu, aemaise lava le i ai o tulaga faaneionapo faalesoifua maloloina. O se isi popolega e faasaga lea i maitaga ua mafua mai i feusuaiga fai faatautala po o le toe ui i fanau. O lenei mala ua faateteleina le leaga ona o le saolotoga e filifili ai se tamaitai e leai se sala ua taofia. I nei mea ua tutupu, o le faapau pepe ua fautuaina ina ia iloiloina, ina ia puipuia ai le tulaga maloloina faaletino ma le mafaufau o le tina. O le faapau pepe ona o nei mafuaaga e faapea foi ona seasea tutupu.
O nisi e finau mo le faapau pepe ona o le fefefe ina nei i ai ni tulaga faaletonu faaletino i le fanau mai ai o le tamaitiiti. E moni lava, o ni aafiaga e ono afaina ai nisi o vaega po o ni mea oona i le tolu masina muamua o le maitaga e faamaonia, ae manaomia le faaeteete i le iloiloina o le faagataina o se maitaga. O le ola e tele sona aoga mo tagata uma, e aofia ai ma i latou e fananau mai ma faaletonu o le tino. E le gata i lea, o le taunuuga e ono le matuia e pei ona mafaufauina.
Ou te manatuaina lelei lava se ulugalii sa mafai ona gafatiaina lena ituaiga aafiaga. O le tamaitai sa na o le 21 tausaga le matua i lena taimi—o se toalua aulelei ma le faamaoni. I le tolu masina muamua o lona uluai maitaga, sa maua ai o ia i le misela rupela. Sa fautuaina e faapau le pepe ona o le pepe ua foafoaina e toetoe lava a mautinoa le faaleagaina. O nisi o tagata o lona aiga, ona o le popole alofa, sa latou faaopoopo atu le uunaia o le faapau pepe. I le naunautai i ai, sa talanoa atu ai lenei ulugalii i lo la epikopo. Sa ia auina atu i laua i lo latou peresitene o le siteki, lea, ina ua maea ona faalogo i lo la popolega, sa fautuaina i laua ina ia aua nei faamutaina le ola o lenei pepe, e ui lava o lenei tamaitiiti e ono i ai se faaletonu. Sa ia tauina atu lenei mau:
“Ia e faatuatua ia Ieova ma lou loto atoa; a e aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.”7
Sa la filifili e mulimuli i lena fautuaga ma faatagaina le teineitiiti e fanau mai—o se teineitiiti aulelei, e atoatoa i tulaga uma, sei vagana ai e logonoa o ia. I le maea ai o le suesuega a lo la afafine i se aoga mo e logonoa, sa fautuaina ai matua, o lenei teineitiiti o loo i ai se atamai o se tagata poto maoae. Sa auai atu o ia i se iunivesite tautaua i luga o se sikolasipi. I le taimi nei i le 40 tausaga mulimuli ane, o loo ia fiafia i se olaga matagofie.
O le taofia o le ola mai se tagata ona o se faaletonu faaletino e ono tulai mai o se tulaga matuia tele. O tulafono e faavae e o faatasi ma lena manatu e faapea o i latou ua soifua mai ma na faaletonu sa tatau foi ona fasiotia. O se isi laasaga agai i lena ituaiga o mafaufauga o le a oo atu ai i se faaiuga o i latou o e mamai po o e le talafeagai le malosi e tatau foi ona fasiotia. O ia tulaga le faaaloalo mo le ola o se tulaga e le tatau ona mafaufauina!
Talosagaina o le Faapau Pepe
I le faatusatusa atu i ai, e laiti ni faapau pepe ua faia ona o tulaga faapitoa lea sa ou taua.8 O le tele o faapau pepe ua faia ona o luga o talosaga ina ia taulimaina ai ni maitaga le manaomia. O nei faapau pepe o se tulaga faigofie o le taofiofia o le fananau mai.
O le faapau pepe ona o le filifiliga lava a le tagata, ua faatagaina i le tele o atunuu i luga o le talitonuga o le tamaitai, ua saoloto e filifili po o le a le mea e na te faia i lona lava tino. I le faalauteleina, o lenei mea e moni mo i tatou taitoatasi, alii po o le tamaitai. O loo tatou saoloto e mafaufau. O loo tatou saoloto e fuafua. Ma o loo tatou saoloto e faatinoina. Ae pe a faataunuuina loa le faatinoina o se gaoioiga, o le a tatou le saoloto lava mai i ona taunuuga.
Ina ia malamalama lelei i lenei mataupu, e mafai ona tatou aoao mai i se tagata malaga i le vateatea. Soo se taimi e faia ai se sailiga po o se sauniuniga, o loo ia te ia le saolotoga e alu ese ai mai le polokalama. Ae a oo loa ina aluese atu le vaa i le vateatea, ua saisaitia loa o ia i le taunuuga o le filifiliga sa ia faia muamua o le faia lea o le faigamalaga.
E faapena foi i tagata ua filifili e amata i se malaga e oo atu i le tulaga faamatua. E ia i latou le saolotoga e filifili ai—pe amata po o le le amataina foi o lena malaga. Pe a tupu mai loa le maitaga, o lena filifiliga ua faapea loa ona uma ona faia.
Ioe, e saoloto se tamaitai e filifili po o le a le mea na te faia i lona tino. Po o lana filifiliga e oo atu i se misiona a se tagata malaga i le vateatea po o se pepe, o lana filifiliga e amata le malaga e noatia ai o ia i le taunuuga o lena filifiliga. Ma e le mafai ona ia “toe suia lana filifiliga.”
Pe a finauina tulaga feteenai e uiga i le faapau pepe, o le “aia a le tagata e filifili ai” ua faatuina mai e pei ona pau lea o le tulaga mama maualuga e tasi. E mafai ona moni lena mea pe ana faapea e na o le toatasi le tagata e aafia ai. O le aia a soo se tasi tagata, e le faatagaina ai le aia a le isi tagata ina ia solia. I totonu po o fafo foi o le faaipoipoga, o le faapau pepe e le o se mataupu e patino i se tagata e toatasi. O le faamutaina o le ola o se pepe ua foafoaina e aafia ai ni tagata se toalua, e eseese ni tino, faiai, ma ni fatu. O le filifiliga a se tamaitai mo lona lava tino e le aofia ai le aia e aveesea ai mai lana pepe le ola—ma se olaga o filifiliga o le a faia e lana tama.
I le avea ai ma tagata o le Au Paia o Aso e Gata Ai, e tatau ona tatou puipui filifiliga—filifiliga sao—ae le ona o filifiliga ona o a tatou aia tatau.9
E toetoe lava o tulafono uma e faatatau i le faapau pepe e iloiloina le umi o le maitaga. O le mafaufau faaletagata ua manatu e sao le fuafuaina po o afea e amata ai le “taua o le ola.” I le faagasologa o au suesuega faafomai, sa ou aoaoina ai o se ola fou e amata ina ua tuufaatasia sela (cells) faapitoa e lua ma avea ai ma sela e tasi, ma aumaia faatasi ai chromosomes (koromasone) e 23 mai le tama ma le 23 mai le tina. O nei koromasone o loo i ai le afe o gene (sane). I se faagaoioiga ofoofogia e aofia ai le tuufaatasia o faatulagaga eseese o vaega o uiga faaletagata o le tagata e lei fanau mai, o se DNA fou ua faapea ona amata ona fausia. O le faaauauina o le ola, e oo atu ai i se tagata fou. I le tusa ma le 22 aso talu ona tuufaatasia sela e lua, ua amata ona tata mai se fatu laitiiti. I le 26 o aso, o le faataamiloga o le toto ua faapea ona amata.10 Ina ia faatulafonoina po o anafea e iloilo ai le ola o loo tau atiae ma “aoga talafeagai” i lou talitonuga, ua na o ni manatu faivavale ma faapea ona faia i luga o ni lagona o isi.
O le faapau pepe ua faatagaina e ni pulega e aunoa ma le manatu i le Atua ma Ana poloaiga. O loo tauina mai pea i tusitusiga paia o le a soifua manuia tagata pe afai latou te usiusitai i tulafono a le Atua.11 O le a ola manuia tagata taitoatasi pe a latou savavali i le faatuatua ma usiusitai i le Atua, lea sa fetalai mai:
“O au le Alii… . ma atiina ae le lalolagi, o lau lava galuega taua; o mea uma foi o i ai e a au ia.
“O lau galuega foi o le tausiga… .
“A e ao ina faia i lau lava ala… .
“Aua o loo tumu le lalolagi, ua lava foi ma totoe mea o i ai.”12
O Le Ekalesia a Iesu Keriso o le Au Paia o Aso e Gata Ai ua faatumauina pea ona tetee atu i le faatinoina o le faapau pepe. I le sili atu ma le seneturi talu ai, sa tusi mai ai le Au Peresitene Sili, “E matou te toe avea ai lenei avanoa e lapataia ai le Au Paia o Aso e Gata Ai e tetee atu ai i nei… . amioga o le fasiotia o alualutoto ma le fasiotia o pepe.”13
I le popofou o lana au peresitene, na saunoa mai ai Peresitene Spencer W. Kimball (1895–1985): “Ua matou faatumauina pea le tulaga o le Ekalesia i le tumau ai o le tetee atu i faapau pepe uma lava, sei vagana ai tuusaunoaga e lua e seasea ona tupu: Pe afai o le maitaga o se taunuuga o ni feusuaiga faia faamalosi ma le, pe afai ua tuuina mai se fautuaga faalesoifua maloloina tatau ai, o le soifua manuia o le tina o le a matua afaina ai lava.”14 O aiaiga faavae o loo i ai nei ua aofia ai isi tuusaunoaga e lua—o le toe ui i fanau ma le, pe afai e le mafai e le pepe ona ola i le fanau mai, e tusa ai ma le fautuaga e tatau ai faalesoifua maloloina. E ui i nei tuusaunoaga, ae le tauamiotonuina ai le tei lava ua faapau se pepe. E “tatau ona iloiloina maeaea lelei pe afai ua maea ona feutagai ia tagata o loo fitoitonu i ai ma o latou epikopo ma mauaina le faamautuina mai le lagi e ala i le tatalo.”15
Vaetamaina
Aisea e faaleagaina ai se ola e mafai ona aumaia ai se fiafiaga sili i isi? E i ai nisi auala sili atu e feagai ai ma se maitaga ua le manaomia. Pe afai o se ola ua mauaina i se agasala, o le auala sili ona amata ai le salamo faaletagata, o le faasaoina lea o le ola o lena tamaitiiti. O le faaopoopo o se isi agasala mamafa i luga o se isi agasala mamafa ua uma ona faataunuuina, ua na ona faateleina ai o le faanoanoa. O le vaetamaina o se isi auala matagofie lea e tali atu ai i le faapau pepe. O le a mafai ona matuai faamanuiaina uma le pepe ma matua na vaetamaina e ala i le vaetamaina o lena pepe i se aiga o le a faafailele ai le tamaitiiti ma le alofa ma o loo maua ai faamanuiaga o le talalelei.
E Mafai Ona Salamo
Pe i ai ea se faamoemoega mo le tagata ua auai i le faatinoina o le gaoioiga o le faapau pepe? Pe i ai ea se faamoemoega mo i latou o e ua agasala ma ua tigaina i le loto mafatia? O le tali o le ioe! “E tusa ai ma faaaliga ua tuuina mai, e mafai ona salamo ma faamagaloina le tagata mo le agasala o le faapau pepe.”16 Ua tatou iloa o le a fesoasoani le Alii ia i latou uma o e salamo faamaoni.17
E taua le ola! E leai se tasi e mafai ona siiina se pepe fou, ma vaai atu i ona foliga aulelei, ma pai atu i tamatamailima, ma sogi atu i alafau o lena pepe e aunoa ma se faaaloalo loloto mo le ola ma lo tatou Faaola. O le ola e sau mai le ola. E le o se mea tupu faafuasei. O se meaalofa mai le Atua. O nei ola mama e lei aumaia e Ia ina ia faaleagaina. Ua aumaia e Ia ma e faapea foi ona tatau ai ona toe aveina ai e na o Ia lava.18 Ou te molimau atu e faavavau le ola aua o Ia e faavavau.