Ki he Kau Talavou ʻo e Lakanga Taulaʻeiki Faka-ʻĒloné
Charles W. Dahlquist (lotomālie), palesiteni; Dean R. Burgess (toʻohema), tokoni ʻuluaki; mo Michael A. Neider, tokoni ua.
Naʻe fakamanatu ʻe Paula kia Tīmote ha meʻa mātuʻaki mahuʻinga—mahuʻinga kia Tīmote pea ki he tokotaha maʻu Lakanga Taulaʻeiki Faka-ʻĒlone takitaha: “ʻOua naʻá ke taʻetokangaʻi ʻa e meʻafoaki ʻoku ʻiate koé, ʻa ia naʻe foaki kiate koe ʻi he kikite, mo e hilifaki ʻo e nimá” (1 Tīmote 4:14). Naʻe fakamatala ʻa Paula ki he mahuʻinga ʻo e lakanga fakataulaʻeikí.
ʻOku ʻuhinga ki he hā ʻa e “oua naʻa taʻetokanga” ki hotau lakanga fakataulaʻeikí? ʻUluakí, ʻoku ʻuhinga ia ke tau moʻui taau mo e ngaahi tāpuaki ʻoku fakafou mai ʻi he lakanga fakataulaʻeikí. ʻOku tau fakapapauʻi ʻoku maʻa ʻetau ngaahi fakakaukaú, ngaahi leá, mo e ngaahi tōʻongá. ʻOku tau moʻui ʻi ha founga te tau hoko ai “ko ha faʻifaʻitakiʻanga ʻo e kakai tuí” ʻi he meʻa kotoa pē ʻoku tau faí: lotu mo e lau folofola fakaʻahó, ʻalu ki he seminelí, totongi vahehongofulú mo e ʻalu ki he temipalé ʻo fakahoko e papitaiso maʻá e kakai pekiá, ʻo ka lava.
Uá, ʻoku ʻuhinga ia ki hono ngāue totonuʻaki ʻo e lakanga fakataulaʻeikí—ke fakaʻaongaʻi ʻa e lakanga fakataulaʻeikí ke tokoniʻi mo faitāpuekina e moʻui ʻa e niʻihi kehé. ʻE lava ke tau fai ʻeni ʻaki hono fakahoko e ngaahi ngāue ʻo e lakanga fakataulaʻeikí; fakahoko ʻo ha ngāue tokoni fakatāutaha pe fakakōlomu; pe tokoniʻi ha taha ʻi ʻapi, ʻapiako pe ngāueʻangá ʻokú ne fie maʻu ha lea ʻofa, ha malimali, pe fakalotolahi.
Tolú, ʻoku ʻuhinga ia ki heʻetau ako ki he lakanga fakataulaʻeikí mo hono ngaahi fatongiá. Lau mo fakalaulauloto ki he folofolá tautautefito ki he lakanga fakataulaʻeikí, ʻAlamā 13 mo e Tokāteline mo e Ngaahi Fuakava vahe 13, 20, 84, 107, mo e 121. Lau e ngaahi lea naʻe fai ʻi he fakatahaʻanga ʻa e lakanga fakataulaʻeikí ʻi he konifelenisi fakamuimui tahá, peá ke toki fehuʻi hifo pē kiate koe, “ʻE anga fēfē haʻaku fakaʻaongaʻi ʻa e meʻa naʻá ku akó ke tokoni ke u fakaʻaongaʻi totonu e lakanga fakataulaʻeikí?”
ʻOku mau ʻofa atu kiate kimoutolu. ʻOku mau falala atu kiate kimoutolu. ʻI hoʻomou feinga ke fakaʻaongaʻi totonu homou lakanga fakataulaʻeikí, te mou mateuteu lelei ange ai ke ngāue maʻá e ʻEikí ko ha faifekau taimi kakato, pea hangē ko e talaʻofa ʻa Tīmoté, ʻe faitāpuekina ʻe hoʻomou ngāué mo e faʻifaʻitakiʻangá ʻa hoʻomou moʻuí mo e moʻui ʻanautolu ʻoku mou feohí. Fakatauange ʻe tāpuakiʻi kimoutolu ʻe he ʻOtuá ʻi hoʻomou ngaahi ngāué.