Maʻu e Ngaahi Kaumeʻa Foʻou

ʻI ha ngaahi taʻu siʻi hili ʻeku ngāue fakafaifekaú, ne u hiki ki ha kolo naʻe ʻikai te u ʻiloʻi ai ha taha. Naʻá ku ʻalu ki he ʻinisititiutí mo e ʻamanaki ʻe ʻi ai haku ngaahi kaumeʻa foʻou ai mo kamata feohi mo e kakai lalahi kei talavou he feituʻú ʻo hangē pē ne u fai ʻi muʻá.

Ka ‘i he kamataʻangá naʻe faingataʻa. Naʻe ʻikai ha taha ia ʻe taʻeʻofa, kae hangē naʻe ʻikai loko ʻi ai ha meʻa ke faí, pea ne u faʻa ongoʻi taʻelata mo vāmamaʻo mo kinautolu he kuo nau ʻosi femaheniʻaki lelei. ʻI he tafaʻaki ʻe tahá, naʻe vave ʻeku kaungāmeʻa lelei mo kinautolu naʻe ʻikai kau ki he Siasí.

Taimi ʻe niʻihi naʻe hangē ka faingofua ange ʻa e nofo he ʻinisititiutí ʻi he ʻalu ki aí. Naʻe ʻikai ha taha ke ʻave au, ko ia ne u lue lalo pe heka pasikala ki ai he uike kotoa pē. Ne u maʻu ha ngaahi kaumeʻa lelei ʻi ha ngaahi feituʻu kehe ʻa ia ne tatau e meʻa ne mau saiʻia aí. ʻIkai ko ia pē, ka ne u ʻosi lavaʻi foki ʻe au ʻa e ʻinisititiutí.

Neongo iá, ʻi heʻeku fakakaukau ki he ngaahi ʻuhinga ko ʻeni ke ʻoua naʻá ku ʻalu aí, ne u manatuʻi ʻeku tupulaki lahi ʻi he kuo hilí koeʻuhí ko e ngaahi lēsoni kuó u akó mo hoku ngaahi kaumeʻa ʻi he ʻinisititiutí. Kuo tanumaki ʻe he ʻinisititiutí ʻeku fakamoʻoní pea tokoni ke mahino lelei ange kiate au ʻa e palani ʻa e ʻEikí maʻakú. Ne u fakapapau te u kei ʻalu pē, peá u fiefia ne u fai ʻeni. Naʻe faifai pē pea ʻi ai hoku ngaahi kaumeʻa lelei ʻi he ʻinisititiutí he taʻu ko iá. Naʻe fakaafeʻi au ki he ngaahi polokalama fakasōsiale naʻe fai pea iku ʻo lahi ange e ngaahi meʻa ne u kau ki aí.

Naʻe faingataʻa ʻa e ʻuluaki ʻalu ki he ʻinisititiutí ʻi ha feituʻu foʻou, ka koeʻuhí ne u kei hokohoko ʻalu pē, ne u maʻu ai ha ngaahi tāpuaki fakalāumālie mo fakasōsiale lahi ne ʻikai te u mei maʻu kapau ne ʻikai te u ʻalu.