Ia Manuia Lou Aso Soifua, Peresitene Monson!

Ia Aokuso i le tausaga na te’a nei, ina ua fesiligia Peresitene Monson po o le a sana meaalofa e sili ona fiafia i ai mo lona aso fanau, sa faamalosiau mai Peresitene Thomas S. Monson ia i tatou e “saili se tasi o loo feagai ma se taimi faigata, … ma faia se mea mo i latou.”¹ I le tausaga lenei ua liliu atu loto ma lima o tamaiti o le lalolagi atoa i isi ina ia tuuina atu ia Peresitene Thomas S. Monson le mea e sili ona manao i ai o ia.

E matua toatele lava tamaiti na tali mai i le faamalosiauga a Peresitene Monson ia faia se galuega fesoasoani mo se isi tagata. Sa na o ni nai tusi ua lomiaina o tusi na matou mauaina. Peitai o outou uma lava tamaiti agalelei ua outou faasoa atu se meaalofa o le auauna atu i lo tatou perofeta peleina, ma ua faamanuia uma atu i ai e tamaiti ia ona maua se aso soifua e sili ona fiafia i le masina lenei!

Sa ou fesoasoani i se aiga i le avatu i ai o mea ou te lei faaaogaina ma meataalo sa lelei lava. Sa matua manaia la’u faalogona ina ua ou faia lenei mea. E faapei lava o mea na faia e le Tama Faalelagi ma Iesu Keriso mo i tatou. E fesoasoani mai ia i tatou i o tatou lu’itau ma tuuina mai ia i tatou le tele o faamanuiaga.

Alma V., 11 tausaga, Itu o le Laumua, Kolomupia

O tamaiti o le Uarota a Oakridge Farms, Siteki a Farmington Utah Oakridge, na faapotopoto faatasi mo se gaoioiga sa latou noanoaina ai ie soosoo. Sa foai atu mulimuli ane ia ie soosoo i le Nofoaga Autu o Fesoasoaniga Alofa a le Ekalesia.

Sa fesoasoani lo’u tama ia i maua ma lo’u uso, o Maximo, e faia ni ofe fagota mo a’u uo i le Peraimeri. Matou te fiafia e o o se aiga e faagogota. O taimi uma lava ou te valaaulia ai nisi o a matou uo matou te o e fagogota, ae leai ni a latou mea fagota. O lo’u vaai atu ua matua fiafia le toatele o i latou aua ua i ai nei a latou lava ofe fagota, ua ou fiafia ai foi.

Luciano N., 9 tausaga, Entre Ríos, Atenitina

O le taulaga ou te nofo ai e ese le malulu. Ina ia fesoasoani i faifeautalai ia mafanafana, sa ou toloseina ai ni ufiufi taliga faatasi ma le fesoasoani mai a lo’u tina.

Mirai H., 10 tausaga, Hokkaido, Iapani

Sa ou iloa faitau tusi ao lima o’u tausaga. O lea la ua ou faia i lo’u tausoga laitiiti le mea sa faia e o’u matua ia te a’u—aoao o ia e faitau tusi i le faaaogaina o tusitusiga paia.

Nicolas N., 7 tausaga, São Paulo, Pasila

O la’u uo e sau mai Peru, ae ua nofo nei o ia i Italia mo ni nai tausaga. E toafa ona uso ma tuagane na papatisoina, ma o Oketopa i le tausaga ua te’a na avea ai foi lona tina ma se tagata o le Ekalesia. O lea la ua manao foi la’u uo e papatiso o ia. Na talosaga mai faifeautalai ia te a’u ou te fesoasoani atu ia i laua e saunia o ia mo le papatisoga. O lea la sa ou i ai faatasi ma ia i taimi uma lava na feiloai ai ma faifeautalai e talanoa e uiga i le talalelei. Ou te faamoemoe o le a vave ona papatiso o ia.

Eleonora A., 11 tausaga, Piedmont, Italia

I le taimi o le matou tafaoga, sa matou fia feinu ai lava. Sa ou fai atu i lo’u tina mo se tupe e faatau ai ni vai. Ao ou sau i fafo o le faleoloa, sa ou iloa atu se tamaloa o tilotilo i totonu o le apa lapisi mo sina vai. Sa ou tilotilo i o’u lima. Sa i ai se tupe na totoe o le faatauga, o lea sa ou faatauina ai se fagu vai mo ia.

Orson B., 10 tausaga, Sonora, Mekisiko

Sa gau le vae o la’u uo o Iona. Sa fealuai o ia i se nofoa faataavale mo se taimi umi lava. O aso uma lava ou te fesoasoani ai e tulei lona nofoa faataavale i le taimi o le malologa umi, malologa puupuu, po o soo se mea lava na fia alu i ai o ia. Sa lagonaina lo’u fiafia tele e fesoasoani i la’u uo.

Emma S., 8 tausaga, Arisona, ISA

O a’u o se tamaitiiti laitiiti e fiafia tele e auauna atu. Ou te fiafia i taimi uma ou te kuka, ma ou te fiafia e fai a ma panikeke ma lo’u tinamatua. Ou te fiafia foi e ofo atu panikeke mo o’u tuaoi.

Jonas V., 5 tausaga, Wallonia, Peleseuma; ma le fesoasoani a lona tina.