O Le Ki i le Tatalo

Sa faatoa ou foi mai lava i lo’u aiga mai le faataunuuina o se misiona ma sa faamanuiaina a’u e maua se galuega e mafai ai ona ou sefeina se tupe mo lo’u pili i le kolisi. Sa ou finafinau ia ou galue lelei ina ia manao ai lo’u pule e faafaigaluegaina isi ua uma foi a latou misiona.

Sa faigofie la’u galuega: Sa ou faia soo se galuega lava e manaomia ona faia mo se kamupani enisinia faufale. E masani lava o lona uiga o le faia o suesuega faigofie faasaienisi. I se tasi aso faapitoa lava, sa fuafua ai ou te alu e piki mai ni faataitaiga o mea faufale mai ni nofoaga eseese ma toe faafoi atu i le potu e fai ai suesuega. Sa tuuina mai ia te a’u se loli tuai ou te feosofai ai, ma sa ou alu loa.

Sa ou taunuu i le nofoaga muamua, sa faafeiloai a’u e le fomeni, ma faavave loa ona maua ia faataitaiga o sima ma uamea. Ina ua uma ona ou tuuina ia mea i le loli, sa ou tago atu i la’u taga mo le ki o le loli. Na faateia a’u i lo’u tago atu na leai se mea o i ai. Sa ou siakiina le ki o totonu o le taavale ma sue faavave i totonu o le loli ae sa lei maua lava. Na oo mai i lo’u mafaufau ai na pa’ū ao ou fealuai i totonu o le nofoaga o loo fai ai le galuega. Ao ou toe foi atu i mea uma sa ou savalia, sa faia sa’u tatalo le leoa, ae sa le maua lava le ki.

Sa ou toe sueina faatapito le loli, e oo lava i lalo o fala solo vae o le taavale. Na leai se ki. Sa punou lo’u ulu ma ou tatalo ma le faamaoni o lo’u loto, ma faamatala atu o loo ou manao ia avea a’u o se tagata faigaluega lelei ma ia aua nei ou tuai i la’u galuega muamua o le aso. Sa amata ona ou toe saili ao ou faalogologo mo se tali i la’u tatalo. Sa ou maua se uunaiga ia ou vaai i lalo o le loli, o lea na ou vaai vave atu ai ma le masalosalo i le palapala i le mea na ou tu ai. Sa ou le vaai lava i se ki, o lea na ou manatu ai ia ou toe foi atu i le nofoaga o loo fai ai le galuega.

Ina ua ou toe foi mai i le loli, sa leai lava se ki. E faapefea ona ou ta’u atu i lo’u pule fou ua leiloa ia te a’u le ki ma na le mafai ona ou faataunuuina se galuega faigofie? Sa ou toe faia le leoa se isi a’u tatalo, ma na toe oo mai foi le uunaiga ou te toe vaai i lalo o le loli. Sa ou toe tepa vave ifo i lalo o le loli, ma i lo’u le vaai atu i se ki, sa toeitiiti ai lava a ou tuleieseina le uunaiga. Peitai sa ou filifili ou te savali ese teisi mai le loli ma toe vaai.

Na faafuasei ona ou vaai atu i ai! Ai na pa’ū i le taimi na ou oso ai i fafo ma le loli. E fai lava sina mamao ese i lalo o le loli, o le mea lena na ou le iloaina ai i taimi na ou sueina muamua ai. Sa ou maasiasi i lo’u le faalogo lelei i musumusuga a le Agaga.

I lena aso ma le tele o taimi talu mai lena aso, na ou tomanatu ai i le onosai ma le agalelei na galue ai le Agaga ia te a’u. A tatou usuina le pese, “Ua ou mautinoa o soifua lo’u Tama, ma Ia alofa ia te a’u” (“I Know My Father Lives,” Hymns, nu. 302), e ootia lava lo’u loto. Ou te ofo i le maoae o le alofa o lo tatou Tama ia i tatou, e tali mai ai o Ia ia tatou tatalo e sili ona faatauvaa.