Ina Ia Mafai Ona Ia Tusi i o Tatou Loto

O le tatalo o se mataupu o le loto. Na tele atu mea na aoaoina ai a’u nai lo na o tulafono o le tatalo. Sa ou aoao mai i o’u matua ma aoaoga a le Faaola e tatau ona tatou talanoa atu i lo tatou Tama Faalelagi i le gagana migao o le tatalo. “Lo matou Tama … i le lagi, Ia Paia lou suafa” (Mataio 6:9). Na ou iloaina tatou te le upuvale i Lona suafa paia—e leai lava. Pe mafai ea ona e vaai faalemafaufau i auala e faaleagaina ai tatalo a se tamaitiiti i le faalogo o upuvale e se matua le suafa o le Atua? O le a i ai ni taunuuga matuia mo agasala faapena i fanau laiti.

Na ou aoaoina ai e taua le tuuina atu o le faafetai mo faamanuiaga ma ole atu mo le faamagaloga. “Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou” (Mataio 6:12). Sa aoaoina a’u, tatou te ole atu mo mea tatou te manaomia ma tatalo ina ia faamanuiaina isi tagata. “Ia e foai mai ia te i matou i le aso nei a matou mea e ai e tatau mo le aso” (Mataio 6:11). Na ou iloa e le tatau ona faia o tatou loto. “Ia oo mai Lou malo. Ia faia Lou finagalo i le lalolagi, e pei ona faia i le lagi” (Mataio 6:10). Sa aoaoina a’u ma ou iloa e moni lava e mafai ona lapataia i tatou i mea matautia e ono tutupu mai ma vave faailoa mai mea ua tatou faia e faanoanoa ai le Atua. “Aua foi e te taitaiina i matou i le tofotofoga, a ia e laveai ia i matou ai le leaga” (Mataio 6:13).

Na ou aoaoina e tatau ona tatou tatalo i taimi uma i le suafa o Iesu Keriso. Ae o se mea na ou vaai ma faalogo i ai na aoaoina ai au o na upu sa sili atu nai lo na o se faiga masani. Sa i ai se ata o le Faaola i le puipui o le potumoe lea sa faataotolia ai lo’u tina i tausaga ao lei maliu o ia. Sa ia tuua iina ona o se mea sa tauina atu ia te ia e lona tausoga o Elder Samuel O. Bennion o le Au Fitugafulu (1874–1945). Sa la malaga faatasi ma se Aposetolo o lē sa faamatalaina lona vaai i le Faaola i se faaaliga. Sa tuuina atu e Elder Bennion lena ata ia te ia [tina] ma le faamatalaga e faapea, o le ata sili lea ua ia vaai i ai o loo faaali mai ai le malosi o le Matai. O lea sa ia faavaaina ai ma tuu i luga o le puipui i le mea e mafai ona ia iloa atu ai mai lona moega.

Sa ia iloaina le Faaola, ma sa alofa ia te Ia. Na ou aoao mai ia te ia tatou te le faaiuina a tatou tatalo i le suafa o se tagata tatou te le masani ai pe a tatou o atu i lo tatou Tama i le tatalo. Na ou iloaina mai mea na ou vaaia i lona olaga, sa latalata atu lona loto i le Faaola mai tausaga e tele o ana taumafaiga finafinau ma le tutumau ina ia auauna atu ia te Ia ma ia faafiafiaina o Ia. Na ou iloaina e moni le mau o loo lapatai mai, “Aua, pe faapefea ona iloa e le tagata le alii e lei auauna i ai o ia, o le tagata ese foi ia te ia, ma ua mamao i manatu ma manao o lona loto?” (Mosaea 5:13).

O lenei la ua fia tausaga talu ona mavae atu lo’u tina ma lo’u tama, ae o upu “i le suafa o Iesu Keriso” e le o ni upu faasamasamanoa ia te a’u, e tusa pe ou te tauina pe ou te faalogo foi o tau e isi. E tatau ona tatou auauna atu ia te Ia e iloa ai le finagalo o le Matai. Ae e tatau foi ona tatou tatalo ina ia tali mai le Tama Faalelagi i a tatou tatalo i o tatou loto ma o tatou mafaufau (tagai Ieremia 31:33; 2 Korinito 3:3; Eperu 8:10; 10:16).

Na faamatalaina e Peresitene George Q. Cannon (1827–1901), o le sa avea ma fesoasoani i le Au Peresitene Sili, le faamanuiaga o le o mai faatasi o tagata o e sa tatalo mo ni tali faapena. Sa saunoa o ia e faatatau i le auai atu i se fonotaga faaleperisitua, peitai o le tele o outou sa saunia o outou loto i le auala sa ia faamatalaina i upu nei:

“E tatau ona ou ulufale atu i lena faapotopotoga ae ua matua saoloto atoa lo’u mafaufau mai faatosinaga uma e faapea ona taofia ai le galue o le Agaga o le Atua ia te au. E tatau ona ou alu atu ma le agaga tatalo, ma talosaga atu i le Atua e tusi i luga o lo’u loto Lona finagalo; ae le o lo’u lava loto ua saunia, ma manao e faia lo’u loto … , e tusa lava po o a manatu o isi tagata. Afai ou te alu [i lena fonotaga], ma o atu i ai ma tagata uma, ma lenei agaga, o le a faapea ona lagona ai le Agaga o le Atua e lotolotoi ia i tatou, ma o mea o le a tatou filifilia o le a avea ma mafaufau ma finagalo o le Atua, aua o le a faaali mai e le Atua ia i tatou. O le a tatou vaaia le malamalama i le auala e tatau ona tatou uia, ma o le a tatou vaaia le pogisa i le auala e le tatau ona tatou uia.¹

O la tatou sini pe a aoao a tatou fanau e tatalo, e mo i latou ia mananao ia tusitusi le Atua i o latou loto ma ia naunau ai e o atu ma faia le mea e finagalo le Atua latou te faia. E mafai ona lava le faatuatua o a tatou fanau mai mea latou te vaai o tatou faia ma mea tatou te aoao atu, ma e mafai ai ona latou lagona se vaega o le lagona na oo i le Faaola ao tatalo o Ia mo le malosi e faia ai Lana taulaga e le iu mo i tatou: “Ua maliu faaitiiti atu i luma, ona faapau fao ai lea o Ia ma tatalo, ua faapea atu, Lo’u Tama e, afai e mafai, ia ave ese lenei ipu ia te a’u; ae aua le faia lo’u loto ao lou finagalo” (Mataio 26:39).

E i ai au tatalo na taliina mai. Sa sili ona manino nā tali ina ua faafilemuina mea sa ou manao i ai e se lagona malosi tele o le fia iloa o le finagalo o le Atua. O le taimi lena e mafai ai ona ta’uina mai e le Tama Faalelagi le tali i le mafaufau e ala i le leo filemu ma le itiiti ma mafai ona tusia i le loto.

E fesili nisi o matua: “Ae e faapefea ona ou faamaluluina le loto o la’u tama ua matua ma talitonu na te le manaomia le Atua? E faapefea ona lava ona ou faamaluluina se loto ina ia mafai ai e le Atua ona tusitusi ai Lona finagalo? O nisi taimi o le a faamaluluina ai se loto e se faalavelave matuia. Ae mo nisi, e oo lava i se faalavelave matuia e le lava lena.

Ae e i ai se manaoga se tasi e oo lava i tagata loto maaa ma faamaualuluga e le talitonu e mafai ona latou faataunuuina mo i latou lava. E le mafai ona latou aveesea le mamafa o agasala mai i o latou lava tauau. E oo lava ia i latou e matua loto maaa lava e ono i ai taimi e lagona ai le tuia o le loto ma manaomia ai le faamagaloga mai le Atua. Sa aoao atu e se tama alofa, o Alema, i lona atalii o Korianetona lena manaoga e faapea: “O lenei foi, ua le mafai ona faataunuuina le ala o le alofa, sei iloga ua faia le togiola; o le mea lea ua togiola ai e le Atua lava mo agasala a le lalolagi, ina ia faataunuuina le ala o le alofa, e faamalie ai iuga o le faamasinoga, ina ia sao ona lelei le Atua, o le Atua amiotonu, o le Atua foi ua finagalo alofa” (Alema 42:15).

Ma ina ua uma ona tuuina atu lana molimau e uiga i le Faaola ma Lana Togiola, sa faia e le tama lenei olega ina ia faamalulu ai le loto: “Lo’u atalii e, ou te loto ina ia e le toe faafitia le amiotonu a le Atua. Aua e te taumafai ona tauamiotonuina oe i se mea aupito faatauvaa ona o au agasala, e faafiti ai le amiotonu a le Atua. Ae peitai, ia e tuu atu i le amiotonu a le Atua ma lona alofa, ma lona faapalepale e pule aoao i lou loto; ia e tuu i ai foi e aveina ifo oe i le efuefu i le loto faamaulalo” (Alema 42:30).

Na iloa e Alema le mea e mafai ona tatou iloa: o le molimau atu ia Iesu Keriso ma Le na faasatauroina na sili ona tele le avanoa e fesoasoani ai i lona atalii e lagona le manaomia o le fesoasoani e na o le Atua e mafai ona tuuina mai. Ma e tuuina mai tali o tatalo i e ua faamaluluina o latou loto e lena lagona matua malosi o le manaomia o le faamamaina.

A tatou aoaoina i latou tatou te alolofa i ai o i tatou o ni fanau agaga o loo toesea mo se taimi le tumau mai se Tama Faalelagi alofa, ua tatou tatalaina le faitotoa o le tatalo ia i latou.

Sa tatou nonofo i Lona afioaga ae tatou te lei o mai iinei ina ia tofotofoina. Sa tatou iloa Ona foliga, ma sa Ia silafia foi o tatou foliga. E pei lava ona vaavaai mai lo’u tama faalelalolagi i lou ou aluese atu ma ia, sa faapea foi ona silasila mai lo tatou Tama oi le Lagi i lo tatou o ese mai i le ola faaletino.

Sa tuua e Lona Alo Pele, o Ieova, na nofoaga mamalu ina ia afio mai i le lalolagi e puapuagatia mo mea na semanu tatou te puapuagatia ai e totogi ai le tau o agasala uma tatou te faia. Sa saunia e lo tatou Faaola mo i tatou le auala e tasi tatou te toe foi atu ai i lo tatou Tama Faalelagi ma Ia. Afai e na o le pau lava lena o le mea e mafai ona ta’u mai ia i tatou e le Agaga Paia e iloa ai o ai i tatou, tatou te ono lagonaina ma a tatou fanau le mea na lagonaina e Enosa. Sa tatalo o ia faapea:

“Sa matelaina lo’u agaga, ona ou tootuli ai lea i luma o Le na Faia a’u, ma ua ou tagi atu ia te Ia i le tatalo faatauanau ma le aioi atu mo lo’u lava agaga, na ou tagi atu ia te Ia i le aso atoa, ioe, ina ia po lava le aso ua ou alaga atu pea i le lagi.

“Ua tulei mai ia te au le siufofoga, ua faapea mai: Enosa e, ua faamagaloina au agasala, e faamanuiaina foi oe” (Enosa 1:4–5).

E mafai ona ou folafola atu ia te outou e leai se olioli o le a sili atu i mea o le a outou lagonaina pe afai e tatalo sau tamaitiiti i le taimi e pagatia ai ma maua ai lea ituaiga o tali. E i ai le aso o le a oulua valavala ai, ma se faanaunauga i lou loto ina ia lua toe faatasi. Ua silafia e se Tama Faalelagi alofa o lenei faanaunauga o le a tumau e faavavau sei vagana ai o le a toe faatasia i tatou o ni aiga faatasi ma Ia ma Lona Alo Pele. Ua Ia faatulagaina mea uma o le a manaomia e Lana fanau ina ia maua ai lea faamanuiaga. Ina ia maua, e tatau ona latou ole atu i latou lava i le Atua, e aunoa ma le masalosalo, e pei ona faia e le taulealea o Iosefa Samita.

Sa popole lo’u tama i lena aso i Niu Ioka aua sa ia iloa, e pei ona iloa e lo’u tina, na o le pau lava le tulaga sili ona matuia tele o le, matou valavala lea e faavavau. O le pogai lena sa laua aoaoina ai a’u e tatalo. Na la iloaina e na o le fesoasoani lava a le Atua ma Ana faamautinoaga e mafai ai ona matou faatasi e faavavau. E pei lava o le a outou faia, o le auala sili sa laua aoaoina mai ai le tatalo na ala lea i faataitaiga.

I le aoauli na maliu ai lo’u tina, sa matou o mai mai le falemai i lo matou aiga. Sa matou nonofo filemu i le potu malolo pogisa mo sina taimi. Sa faatulou mai Tamā ma alu atu i lona potumoe. Sa alu ese atu o ia mo ni nai minute. Ina ua toe savali mai o ia i le potu malolo, sa ataata mai o ia. Fai mai o ia sa popole mo Tina. A o ia tapenaina ese mai ana mea mai le potu o le falemai ma faafetai atu i le aufaigaluega mo lo latou agalelei ia te ia, sa mafaufau o ia i le alu atu o [tina] i le lalolagi o agaga i nai minute lava ina ua maliu. Sa fefe o ia ina nei tuua na o tina pe afai e leai se isi o faatali maia o ia. Sa alu atu o ia i lona potumoe e talosagaina lona Tama Faalelagi ina ia i ai se tasi e faafeiloaia Mildred, o lana ava ma lo’u tina. Fai mai o ia na ta’u mai i le tali o lana tatalo na faafeiloaia lana manamea e lona tina. Sa ou ataata foi i lena mea. O Tinamatua Eyring e le o se tagata e umi tele. Sa ou vaaia se ata manino o lona teletelea’i mai i le lotolotoi o tagata, ma le topetope o ona vae pupuu i lana misiona o le faatalia o lo’u tina.

E moni sa lei i ai se manatu o Tama e aoao a’u i lena taimi e uiga i le tatalo, ae sa ia faia. Ou te le manatua se lauga mai lo’u tina po o lo’u tama e uiga i le tatalo. Sa tatalo i laua i taimi faigata ma taimi lelei. Ma sa la ta’uina atu i auala mautinoa le agalelei, le mamana, ma le latalata mai o le Atua. O le tele o tatalo sa ou faalogo i ai na faatatau i mea e manaomia e mafai ai ona matou faatasi e faavavau. Ma o tali o le a tumau pea ona tusitusia i lo’u loto e foliga mai o faamaoniga ia sa matou i ai i luga o le ala e agai atu ai [i le faatasia e faavavau].

Ina ua ou vaai faalemafaufau i lo’u tinamatua o loo natinati atu i lo’u tina, sa ou lagonaina le olioli mo i laua ma se faanaunauga ina ia aumai la’u pele ma la maua fanau i sa matou faatasiga faapea. O lena faanaunauga o le mafuaaga lea e tatau ai ona tatou aoao a tatou fanau e tatalo.

Ou te molimau atu e tali mai e lo tatou Tama Faalelagi aioiga a matua faamaoni ina ia iloa ai auala e aoao ai a latou fanau e tatalo. Ou te molimau atu o se auauna a Iesu Keriso, ona o Lana Togiola, ua mafai ai ona faavavau o tatou aiga pe afai tatou te faamamaluina feagaiga ua ofoina mai i Lana Ekalesia moni lenei.