Sa Ou Manatuaina le Faaola

I se taimi ua mavae sa ou feagai ai ma se vaitaimi na tumu i mala o faafitauli faaletagata lava ia ma sa ou lagonaina na leai se isi e fesoasoani mai ia te a’u e faafoia ou faafitauli. Sa ou toaga i le lotu ae sa le faamanuiaina au sailiiliga mo ni tali i o’u faafitauli. Sa masani ona lofituina a’u i le fefe, aemaise lava i po. Sa ou matua le fiafia lava.

I se tasi aso ao ou matua lagonaina lo’u faanoanoa, sa ou taumafai ai ou te fesootai atu i le peresitene o le misiona. I se tasi foi aso sa matua malosi lo’u faanaunauga ina ia ou fesootai atu i le Peresitene o le Ekalesia. Sa ou manatu pe ana mafai lava ona ou talanoa atu pe tusi atu foi ia te ia, o le a ia aumaia ni tali na ou sailia.

Ao ou i ai i lea tulaga faaletonu o lo’u mafaufau, sa ou auai atu ai i se sauniga o le konafesi a le itu i Cúcuta, Kolomupia. Sa ou maua le tali sa ou manaomia i le saunoaga a le peresitene o le misiona. Ina ua fesili mai Peresitene Canals, “O anafea le taimi mulimuli na e maua ai se aafiaga faaleagaga?” Na ou iloa ai sa ou matua pisi i lo’u taumafai e saili se tasi e fesoasoani mai e faafoia o’u faafitauli, ae galo ai ia te a’u le valaau a le Faaola ina ia faalatalata atu ia te Ia (tagai MFF 88:63). I lo’u faatopetope e saili se tali, sa galo ai ia te a’u le Tagata sa i ai le mana e aumai ai ia te a’u le filemu ma tali i a’u tatalo.

I le aso lava lena sa amata ai loa la’u fuafuaga o le faalatalata atili atu i lo’u tama Faalelagi ma Lona Alo o Iesu Keriso. Sa ou ta’u atu i le Tama Faalelagi lo’u fefe ma lo’u le fiafia, ma sa ou tatalo i le suafa o Iesu Keriso ina ia ou maua Lona Agaga e faatasi mai ia te a’u. Sa ou lafoina a’u avega uma i aao o le Faaola, ma manatua Lana folafolaga: “Ia outou o mai ia te a’u, outou uma o e tigaina ma mafatia i avega, o a’u foi e malolo ai outou” (Mataio 11:28).

Ou te lei maua ni tali uma i o’u faafitauli patino, ae ua ou maua le malosi ma le faamafanafanaga. Ua ou maua foi musumusuga afai ou te ola i se olaga amiotonu, tausi poloaiga, ma auauna atu i le Alii ma lo’u loto atoa, o le a fesoasoani mai o Ia ia te a’u e faafoia o’u faafitauli pe aumaia foi ia te a’u le malosi ou te onosaia ai (tagai Mosaea 24:14).