Ou te Le Toe Alu Lava e Faataunuu Faiaoga o Aiga!

Sa matua fiafia lo’u atalii e 15 ona tausaga i le tele o mea sa tutupu i lona olaga—uo, o laupapa faataavale, taavale, ma lona pemita e aoao ai e ave taavale. Peitai, sa lei fiafia o ia i ona tiute o se faiaoga o aiga.

Sa momomo lo’u loto i le tasi Aso Sa ina ua fai mai o ia, “O le faiaoga o aiga o se faamaimauga o le taimi. O lea o le a ou vili i lo’u faufautua e tau i ai e tatau ona su’e se isi tagata aua ou te le toe alu lava ou te faiaoga o aiga!”

Ao lei maua se avanoa e su’e ai le igoa o lona faufautua faaleperisitua i le lisi telefoni a le uarota, ae tatagi loa le telefoni. O lana soa fou lava faatoa tofia la te faiaoga o aiga, o Tuagane Bernd Suckow, o le sa mamafa lana tautala faaSiamani.

“Topi, o lea o le a ou alu atu i le taimi nei lava,” o lana tala lea. “O oe la’u soa fou, ma na ou manatu e mafai ona fai nei ni a ta asiasiga. E lelei lena? Ua lelei. Tofa.”

Atonu sa musuia Tuagane Suckow ina ia le faatali mo se tali a Topi, pe sa manatu foi o ia o le le tali atu o Topi o lona uiga ua ia talia le fuafuaga. Po o le fea lava, ae o le 10 minute mulimuli ane na tuitui mai ai le faitotoa. Ao lei mafai e Topi ona fai atu sana faatuiese, sa toso atu o ia i fafo e se alii fiafia tele ma tuu le ki o se taavale i lona lima.

“O lou igoa o Topi? Ua ou fiafia ua ta feiloai,” na fai atu ai Tuagane Suckow. “Topi, o le Sapati lenei, ae o la’u galuega o le faataitai o taavale [e iloilo ai po o lelei]. Ou te manatu e le lelei ona ou aveave i le Sapati aua o la’u galuega lea. E mafai ona e fesoasoani mai ia te a’u? E i ai sou pemita ave taavale? E mafai ona e aveina le ta taavale e fai a ta asiasiga o faiaoga o aiga?”

Sa ofo faamaga Topi ina ua ia vaai atu i le ituaiga fausaga sili ona fou o taavale tutuu lea sa faataitai e Tuagane Suckow i lena vaiaso. Sa vave lava ona ia iloa na semanu na te le maua lenei avanoa o se asiasiga a faiaoga o aiga e le mafaagaloina.

Ina ua la foi mai i se taimi mulimuli ane, sa faaali atu e Topi ia Tuagane Suckow ni masini komepiuta fou, ma e le’i leva ae la talatalanoa loa e uiga i faiga fou faatekinolosi. Ina ua tuumuli o ia, na faapea atu Tuagane Suckow, “Ou te manatu e lelei pe a faauma a ta asiasiga o faiaoga o aiga i le Aso Sa lea. O le a sou manatu, Topi?”

Sa oso atu le uso laitiiti o Topi, “E mafai foi ona avea au ma se faiaoga o aiga?”

E le faatuai lava Topi pe a oo i le taimi e o ai e faataunuu faiaoga o aiga ma Tuagane Suckow. Ina ua mavae ni nai masina, sa le toe avea le faiaoga o aiga o se mea e uiga i taavale mananaia lea sa ia maua le avanoa e aveave ai. Nai lo lena, sa avea Tuagane Suckow o se uo moni lava, ma na iloa e Topi le taua tele o le faiaoga o aiga i aiga na laua asia.

Na iu ina toe foi Tuagane Suckow ma lona faletua i Siamani. Ua matua misia lava i laua e le matou siteki. O le a le galo lava ia te a’u le faataitaiga mamana o le alofa o Tuagane Suckow i se alii talavou lea sa manaomia lava ona faaoso le amataga o lana molimau.