O Le Tofotofoina o Lo’u Faatuatua

O la matou vasega o le Aoga Sa o le au tai 13 tausaga le matutua, sa le masani ona lauiloa i lo matou migao. Peitai, sa ia i matou se faiaoga lelei o lē sa taumafai i lona malosi e aoao mai lesona taitasi e ala i le Agaga. O se tasi o na lesona na faatatau i le faitauina o tusitusiga paia.

I le faaiuga o le lesona na ia tuuina mai ia i matou se lui. Sa faatatau lea ia i matou uma lava, ae mo se mafuaga sa ia tilotilo sa’o mai ai lava ia te au ma fai mai, “Ou te luiina outou e faitau le Tusi a Mamona i aso taitasi!” Sa ou mafaufau ifo ia te au lava, “Ia o le a e vaai la i ai. O le a ou faia!”

Na ou amata i le 1 Nifae mataupu 1 i le po lava lena ma faaauau ai lava le faitauina i aso uma. Atonu e lei i ai sou uiga lelei i le taimi na amataina ai ona ou faitau, ae i le aluga o taimi sa amata ona ou fiafia i lagona na ou maua e ala i le faitauina o le Tusi a Mamona. O le faitau i po taitasi na avea ma mausa [na ou] fiafia ai.

I ni masina mulimuli ane sa ou oo ai i le Alema e 32 ma na ou fiafia i le manatu o le tofotofoina o le faatuatua. I le aoga e lei leva ona matou aoao e uiga i le faia o ni suesuega faasaenisi, o lea sa ou tootuli ifo ai ma ta’u atu i le Tama Faalelagi o lea ua amata la’u suesuega. Sa ou tau atu o le a ou iloa ai pe moni le Tusi a Mamona.

O le matau atu i ai, sa ou iloa ai na tali mai e le Tama Faalelagi au tatalo i le tele o taimi. O le faitau i le Tusi a Mamona i aso uma na aumai ai ia te au le malosi faateleina e faatoilalo ai le leaga. Sa lagonaina lo’u latalata atili atu i lo’u Tama oi le Lagi. Sa lagona le faamalosia o au e le mana o le Agaga Paia ina ia ou manumalo i faafitauli. O mea na tau mai e Alema e uiga i le suesue i afioga a le Atua e moni ia: “Ua amata ona faateleina ai lou loto; ioe, ua amata ona faamalamalamaina ai lou mafaufau, ioe, ua amata ona suamalie ia te au” (Alema 32:28).