Ua Faamanuiaina Tagata o le Ekalesia i Taiala Fou a le Aualofa
Sa fofogaina mai e Julie B. Beck, le peresitene aoao o le Aualofa, ni taiala fou mo sauniga ma fonotaga a le Aualofa i le ono masina talu ai, i le sauniga aoao a le Aualofa, ma ua faamanuiaina ai olaga o tuafafine i le lalolagi atoa.
I se tulaga lautele, sa taliaina fiafia ia taiala fou, na saunoa ai Sister Beck, ia o loo ta’ua ai e faapea, ua mafai nei e uso o le Aualofa i le salafa o le lalolagi ona mamanu a latou fonotaga po o gaoioiga e tusa ai ma manaoga o o latou tagata taitoatasi, e mafai ai ona fetuutuunai i se lotu e le tamau i se aganuu po o se tulaga e tasi.
“O se laasaga lelei tele lea mo se faalapotopotoga ua soo ai le lalolagi,” o le saunoaga lea a Sister Beck. “Matou te alolofa tele i tamaitai, matou te talitonuina tamaitai, ma ua matou iloa foi afai latou te faaaogaina lenei mea e avea o se mataupu o le faatuatua ma le usiusitai, o le a leai lava se faafitauli.”
O le saunoaga a Sister Beck ua faaautuina o le “Aualofa: O Se Galuega Paia” (Liahona, Nov. 2009, 110) e tatau ona avea ma aiaiga faavae aloaia e tusa ai ma sauniga po o fonotaga, ma e tatau i taitai o Aualofa e i ai ni fesili e uiga i aiaiga faavae, ona talanoa i o latou taitai perisitua.
Suiga Lautele
Sa faamautuina mai e faapea e tatau i fesoasoani o le Aualofa ona mulimulita’i i le mamanu o le perisitua ma ia faaigoa o le fesoasoani muamua po o le lua. O le valaauga lea sa faaigoa ai muamua o le taitai o le faatamaoaigaina o le aiga, auaiga, ma le tagata lava ia, ia faaigoa o le taitai faamaopoopo o mafutaga a le Aualofa. O le tuafafine e i ai lenei valaauga, e tatau ona faaauau pea ona ia faatulagaina mafutaga po o gaoioiga e faia i aso o le vaiaso, i lalo o le taitaiga a le au peresitene.
Taiala o Sauniga po o Mafutaga a le Aualofa
I saunoaga a Sister Beck, na ia ta’ua ai le igoa sa faaigoa ai nei sauniga po o fonotaga o le “faatamaoaigaina o le aiga, auaiga, ma le tagata lava ia” ma o le a na ona faaigoaina nei o sauniga a le Aualofa.
Sa faamatalaina e Sister Beck le auala e tatau ai ona vaaia e le peresitene o le Aualofa ia sauniga uma a le Aualofa ma ia talanoa ma le epikopo po o le peresitene o le paranesi, o lē na te faamaonia fuafuaga uma o ia sauniga.
E tatau i le peresitene o le Aualofa ona vaaia ia sauniga, peitai e mafai ona fesili atu i le fesoasoani muamua po o le lua—pe fautuaina atu foi se tamaitai o le uarota po o le paranesi e tofia—e avea ma taitai faamaopoopo o ia sauniga. Ia le itiiti ifo i le toatasi uso o le au peresitene e tatau ona i ai i sauniga uma.
E masani lava e tatau ona faia ta’i masina nei sauniga, peitai ia le itiiti ifo ma le ta’i kuata, i se taimi e ese mai i le Aso Sa po o le afiafi o le Aso Gafua. O le epikopo po o le peresitene o le paranesi ma le peresitene o le Aualofa e fuafuaina pe faafia ona faia nei sauniga, ma e le tatau ona faia ia manatu tina ma tamaitai faapea e tatau lava ona auai i nei sauniga uma.
A oo ina fuafua nei sauniga, e tatau i le au peresitene o le Aualofa ona mafaufau i faafitauli e pei o taimi, tupe e alu ai, saogalemu, ma le mamao e feoa’i ai.
O nei sauniga e tatau ona ausia ai “tiutetauave agaalofa ma faatinoga” a le Aualofa, o le faateleina lea o le faatuatua ma le amiotonu patino, ma le vaaia o manaoga faaleagaga ma faaletino o tagata taitoatasi ma aiga.
I le fuafuaina o na sauniga e tatau i le au peresitene o le Aualofa ona ave le faamuamua i autu e faataunuu ai faamoemoega o le Aualofa; e mafai ona taulai atu na sauniga i se autu se tasi pe vaevae foi i ni vasega po o ni gaoioiga e sili atu ma le tasi. O faiaoga e tatau lava o ni tagata o le uarota po o le siteki.
“O le faaaogaina tatau o sauniga a le Aualofa o le a faateleina ai le tomai o le Aualofa e galulue i ala mamana faatasi ma taitai perisitua i uarota taitasi,” o le saunoaga lea a Sister Beck.