Fesoasoani e Faatupu
O le mea lena na fai mai ai nei tamaitai talavou mai Initia talu mai la latou galuega fesoasoani faatauvaa lea na fiafia uma ai la latou paranesi e uiga i afiafi faaleaiga.
O tamaitai talavou o le Paranesi a Chennai Lua, Itumalo o Chennai i Initia, na mananao e uunaia tagata o le paranesi e fai afiafi faaleaiga. E lei i ai se umi na latou maua ai se manatu faigofie ma aoga. Na latou faia ni uili o afiafi faaleaiga: o siata e i ai se pine e faataavili e iloagofie ai tofiga e pei o le faia o tatalo, faia o le lesona, ma le saunia o sina “meaai suamalie.”
Sa faigofie ma felanulanuai ia uili pepa. Sa latou faapotopoto i se gaoioiga a Tamaitai Talavou i le falelotu i se tasi afiafi, na tofu le uili ma se ata o le aiga na fuafua e ave i ai le uili. O le toalua o nei tamaitai talavou, o Sushmitha Santhosh Kumar, e 15 tausaga, ma lona uso o Sujeetha, e 14 tausaga, na faapitoa lava lo laua fiafia ina ua la iloaina o le avea ai o i laua ma tagata fou o le Ekalesia, o le a maua ai e lo latou aiga le uili muamua.
“Ina ua uma le Mutuale na matou o faatasi o se vaega i lo latou fale mautotogi ma tuuina atu le uili i lo laua tamā,” o le tala lea a Daisy Daniel, e 16 tausaga. “Na foliga fiafia le aiga uma.” Ua uma ona talanoa le aiga ma faifeautalai e uiga i afiafi faaleaiga, ma na tuuina atu e le uili le isi faamalosiauga faaopoopo e tulitatao ai mea ua uma ona latou aoaoina.
Na faia foi e tamaitai talavou ia lava ni uili e tuuina atu i aiga taitasi o tamaiti Peraimeri o le paranesi. Ona latou faia lea o ni uili faaopoopo mo faifeautalai e tuuina atu i tagata fou liliu mai.
O le toatele o i matou i le paranesi o ni tagata fou o le Ekalesia, ma matou te le masani i le faia o ni afiafi faaleaiga,” o le tala lea a Daisy. “Ae e i ai la’u molimau e fesoasoani afiafi faaleaiga i tamaiti ma matua e vavalalata ai ma ou te faamoemoe a vaai nei aiga i le uili o le afiafi faaleaiga, o le a latou manatu, ‘Ia, e alolofa tagata o la tatou Ekalesia ia i tatou, ma na latou tuuina mai lenei faamanatu, o lea ia faia loa la tatou afiafi faaleaiga.’’’ Sa ia vavalo e le pine ae avea afiafi faaleaiga ma aafiaga masani i vaiaso taitasi mo le toatele o tagata o le paranesi.
O Le Tasi Auaunaga Lelei na Oo Atu Ai i Le Isi
O uili o afiafi faaleaiga ua na o se tasi lea o galuega fesoasoani ua faamaeaina e nei tamaitai talavou. I se taumafaiga e fesoasoani ai i se tina ua oti lana tane mai le paranesi e faaitiitia ai lona lagonaina o le tuua toatasi, na teuteuina ai e tamaitai talavou se ato ma faatumu i le anoano o faamatalaga pupuu, ma le fiafia. “E leai se isi e vaaia o ia,” o le tala lea a Daisy. “O lea na matou mananao ai e faamanatu atu ia te ia o loo manatua o ia e tagata o le paranesi.” Na momoli atu e tamaitai talavou lava ia le ato ma faamatala atu i ai e mafai ona ia faitauina se faamatalaga i aso taitasi e aumai ai se ataata i ona foliga.
O le ato o faamatalaga na musuia ai foi se tasi manatu. Na tonu i tamaitai talavou e tusia ni tusi faafetai mo le tasi ma le isi o i latou.“Ua tusia e i matou uma taitoatasi se tusi matagofie i le isi,” na tala mai ai Monisha Kalai Selvam, e 13 tausaga.
Ia Ola Pea Afiafi Faaleaiga!
E ala i nei ma isi gaoioiga, ua aoaoina ai e tamaitai talavou o le Paranesi Lua a Chennai e faapea, e mafai foi e nai faatinoga faatauvaa o auaunaga ona faalatalata atu ai tagata i le Faaola. Atonu o le a mafai ona manatua pea e tagata o le paranesi ia uili o afiafi faaleaiga aua e toatele ua latou mauaina ma faaaogaina. Ae ui lava o uili ua na o se faamanatu le tumau, e le afaina foi lena.
“E mafaia e soo se tasi ona faia sana ia lava uili po o se siata po o le nofo i lalo ma se peni ma se pepa ma faia fuafuaga,” o le tala lea a Daisy. “Na matou iloa lava e taua afiafi faaleaiga mo tagata uma, ma na matou mananao e fesoasoani e faatupu lea tulaga.”
Ata na pueina e Richard M. Romney
Karthikeyan
Meganathan
Tanielu
Bharath Raj