O Tusitusiga Paia O Afioga ia a le Atua

I le Tusi a Mamona, o loo faamatala atu ai e Liae i lona aiga lana miti, i le laau o le ola. I le miti, sa manao Liae e aai lona aiga i le fua o le laau, lea sa “manaomia ua sili i fua uma” (1 Nifae 8:15). Sa ia vaaia ni tagata e toatele o ui atu i le ala e tau atu i le laau o le ola, ae peitai, sa leiloloa nisi i le ao pogisa ma se ese ai mai le ala. O isi sa pipiimau pea i le ai uamea lea sa i ai i le ala e tau atu i le laau. Sa latou savavali i luma, ma pipiimau i le ai uamea seia oo ina latou taunuu atu i le laau ma aai i ona fua, lea sa aumaia ai ia i latou le olioli. (Tagai 1 Nifae 8.)

Sa tatalo Nifae le atalii o Liae ia iloa le uiga o mea sa vaaia e lona tama. Sa faaali mai ia Nifae lea lava faaaliga e tasi e pei ona sa faaalia i lona tama. Sa aoaoina e le Agaga ia Nifae e faapea, o le laau o le ola ua faatusa i le alofa o le Atua. Sa faaalia foi ia Nifae ia Iesu Keriso, le Alo o le Atua, o aoao atu ma faamanuia i tagata i luga o le fogaeleele. Sa aoaoina foi Nifae o le ai uamea ua faatusa i le afioga a le Atua. (Tagai i le 1 Nifae 11.)

O tusitusiga paia o afioga ia a le Atua. O le faitauina o tusitusiga paia e pei lava o le pipiimau i le ai uamea. O le a tatou iloa le mea e finagalo Iesu tatou te faia ma tautatala atu ai. O le a tatou maua le mana e tetee ai i faaosoosoga ma tatou savavali atu ai i le laau o le ola ma lagona ai le alofa o le Atua.