I Le Faatasi Ai o Agelu

I le 2003 sa valaauina ai au ou te auauna atu faamisiona i Ivory Coast, i Aferika i sisifo. A o ou sailiili i ai, sa ou iloa ai sa foliga mai na aafia le atunuu i se taua faifai pea faaleatunuu, ae sa faamafanafanaina au i le iloa sa i ai se maliega sa faia e taofi le fevataua’i. Sa oo mai se isi faamafanafanaga atili ina ua vaetofia au. Sa tuuina mai e le peresitene o le siteki ia te au se folafolaga e faapea, a o ou auauna atu, o le a i ai taimi ou te lagonaina ai le faatasi mai o agelu ma o le a latou puipuia au. Sa folafola mai foi ia te au afai ou te usiusitai, o le a ou toe foi saogalemu mai i lo’u aiga.

I uluai masina o la’u misiona, sa fautuaina ai i matou e le peresitene o le misiona ina ia matou nofo saunia. I lo ma fale mautotogi i le laumua o Abidjan, sa ma teuina ai se sapalai o meaai ma vaiinu e faaaoga i ni aso se tolu, ma o fonotaga matou te maua mai ai ni aoaoga i mea matou te faia pe afai e alia’e mai se taua.

Ae, sa matou popole lava ina ua soli e tagata tetee le maliega i le aso 4 o Novema, 2004. Sa faataatia mai e o matou taitai se taimi faatulagaina o le 6:00 i le afiafi e faagata ai ona toe feoai. I le ma asiasiga faatulagaina mulimuli mo le ma lesona i le aso na sosoo ai, sa ma faalogoina ai se pa faafuasei. Sa faauma ai lava i le tatalo i le taimi lena le lesona, tuu atu i le aiga se mataupu mai le Tusi a Mamona e faitau ai, ae ma faataalise atu i le fale. E lei leva foi ae taunuu mai le isi soa matou te nonofo faatasi. Sa telefoni mai fesoasoani o le peresitene ma fai mai ia aua nei o matou toe o ese mai o matou fale e tusa lava po o le a se tulaga e i ai—ia aua nei o matou o ese atu mo le lotu po o le aumaia foi o ni meaai. Sa matou iloa sa fasiotia ni tagata Farani faatupu filemu i ni osofaiga a vaalele, o lea sa osofaia ai e Farani le malaevaalele a le militeli, ma matuai faaleagaina ai le ea fosi laitiiti a Ivory. I le tali atu i ai, sa tulai mai ai ni fetauiga tetele i totonu o le laumua.

E faitau afe ma afe tagata tetee sa lolofi atu i magaala, ma faalala atu sapelu, ma osofaia faleoloa o tagata Farani, ma o atu faamalosi i totonu o fale sa latou masalomia sa nonofo ai tagata Farani. Sa matou iloa atu i lo matou faamalama le faateteleina o fetauiga. Sa matou iloa sa lamatia o matou ola ona o le papae o o matou pa’u.

I le aoauli o le Aso Sa, aso 7 o Novema, e ui lava i leo o le feei, papa o fana, ma pomu, sa matou faia lava se sauniga faamanatuga i lo matou falemautotogi, ma sa na o le toafa lava i matou sa auai. Ina ua uma ona faamanuia ma tufa le falaoa ma le vai mai la matou sapalai o meaai mo aso e tolu, sa taitoatasi loa i matou ma faasoa atu se mau ma tuuina atu se molimau. Sa ou faitauina le Mataupu Faavae ma Feagaiga 84:88: “Ai foi se talia outou, ou te i ai foi, aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou.” A o ou faitauina, sa ou toe mafaufau i le faamanuiaga na tuuina mai e lo’u peresitene o le siteki ia te au, ma sa ou iloaina o le a ou saogalemu.

Sa atoa le vaiaso o matou nonofo i le fale. Sa asiasi mai taitai ma tagata o le uarota ma aumai a matou meaai. Sa i ai se tasi tagata o le au paia sa ia aveina a matou feau ma imeli atu i o matou aiga, e faailoa ai lo matou saogalemu i lena taimi. Sa maoae lava le fesoasoani a nei tagata o le au paia! O le taimi lea, sa tau fai tatalo ai o matou aiga ma tagata o le Ekalesia i le lalolagi atoa mo lo matou saogalemu. A o tatalo lo’u aiga, sa latou lagonaina se faamautinoaga toafimalie o le a ou le afaina.

O le Aso Faraile, 12 o Novema sa amata ai ona la’u ese i matou. Sa taitai mai matou e tagata o le Ekalesia i Ivory i auala o Abidjan, ma e ui ina sa matou faalogo i lipoti e uiga i le faamanualia o nisi o tagata sulufai, ae sa matou taunuu saogalemu lava i totonu o papuipui o le maota o le amepasa o Peretania. Sa aveese mai i matou e le vaegaau a Peretania mai le atunuu, ma sa taliina talosaga a lo’u aiga ina ua latou vaaia i tala fou le aveesea mai o ni alii faifeautalai se toalua faapea ai ma au. I le pogisa o le po, sa avatu ai e tagata o le Ekalesia ia isi faifeautalai e le o ni Aferika i le ofisa o le misiona. O iina sa aveina atu ai i latou e le ea fosi a Italia i Kana, lea sa matou toe feiloai ai.

E ui lava i le tele o osofaiga na faasaga i tagata ese i le atunuu atoa, ae sa leai se faifeautalai sa afaina ai i le taimi o fetauiga, ma sa leai foi se falemautotogi o faifeautalai sa talepeina ma osofaia faamalosi. Ona sa matou faalogo i le fautuaga a le peresitene o le misiona, sa matou saogalemu ai i le fale ina ua aliae fetauiga ma sa lava a matou sapalai sa moomia mo lo matou tausiga. Ae o le mea sa sili atu ona faamafanafanaina nai lo le puipuiga a le militeli o le iloa lea sa i ai le puipuiga a le Alii ia i matou.

Ao la’ueseina mai i matou, sa ou iloa ai o le aoauli o le Aso Sa ina ua uma le matou lotu faamanatuga, sa sauni ai ni tagata tetee e osofai lo matou falemautotogi. Sa alaga atu i ai se tasi o o matou tuaoi, “E le o i latou o ni tagata Farani!” ae sa le o ese lava. Sa iu ina alaga atu i ai se tasi tuaoi, “O i latou o faifeautalai!” ma sa taape ai loa le au faatupu vevesi. Sa ou toe manatuaina ai foi upu, “O lo’u Agaga o le a i o outou loto, e siomia foi outou e a’u agelu,” ma ou iloaina ai sa ou ola i le folafolaga mai le faamanuiaga a lo’u peresitene o le siteki. Sa ou vaai i le faataunuuina o valoaga.