Na Folasia Mai Tusitaulima Fou i le Taimi o le Aoaoga i le Lalolagi Atoa

“O loo i ai le saogalemu i tusitaulima,” na saunoa ai Peresitene Monson, e lapata’ia ai mai ni faiga e le masani ai e mafai ona faaofiofi mai i polokalama a le Ekalesia, pe a le masani ia taitai ma aiaiga ma faiga faavae a le Ekalesia. “O le a avea ma se faamanuiaga ia te outou ma i latou o loo outou tautuaina pe a outou faitauina [tusitaulima], malamalama i ai, ma mulimuli ai.”

E maua i tusitaulima le tulaga sili atu ona faigofie ma maufetuuna’ia, e le oo ai i ni tulaga e sili ona matautia se lua, e tusa ai ma le saunoaga a Peresitene Boyd K. Packer, Peresitene o le Korama a Aposetolo e Toasefululua.

Muamua o le matautia o le pulepuletutu i le uunaiga a le Agaga Paia ma aveesea ai mai polokalama a le Ekalesia. “O se galuega e faaleagaga o loo tatou punoua’i ai,” na ia saunoa ai, “ma o se galuega e faaleagaga e tatau ona tomatauina e le Agaga.”

Lona lua o le tulaga matautia o le “faatuina o le Ekalesia e aunoa ma le faatuina o le talalelei,” na ia saunoa ai. “Tatou te manaomia le i ai o le Ekalesia i olaga o le au paia, ma faatuina le talalelei i loto o tagata o le au paia.”

O le tele lava o le anotusi o le Tusitaulima 1: Peresitene o Siteki ma Epikopo o loo tumau e le o suia mai le faafouga na i ai i le 2006 o le Tusitaulima o Faatonuga a le Ekalesia, Tusi 1. Ua maea ona tuu i ai faatonuga na aumai i tusi aupito lata mai a le Au Peresitene Sili, o mataupu e uiga i tiute o le peresitene o le siteki ma le epikopo ua faapuupuu ma faamanino, ma ua toe faatulagaina nisi o punaoa ina ia faigofie ona tagatagai i ai.

O suiga i le Tusitaulima 2: Taitaiina o le Ekalesia e sili atu ona tetele. O se faiga e faavae i mataupu faavae, ua faia ina ia faaitiitia ai le lavelave o polokalama a le Ekalesia ma faatagaina ai ni fetuunaiga i le lotoifale, i mea e tatau ai e aunoa ma le ositaulagaina o le laugatasia o aiaiga, faiga faavae, ma polokalama.

O isi suiga o faamatalaga e aofia ai le tuuitiitia o le avega a le epikopo e ala i le faalauteleina o le matafaioi a le aufono a le uarota ma ona sui auai, o le faaopoopoga talafeagai i le tele o taimi e fai ai fonotaga a le aufono a le uarota, o se faamaninoga o le misiona a le Ekalesia, tuufaatasi o le galuega a le komiti o le uelefea a le uarota i talanoaga a le komiti a le au taitai perisitua (lea e ono valaaulia ia peresitene o Aualofa e auai pe a tatau ai) ma aufono a uarota, lē toe faia o se komiti tumau o gaoioiga a uarota ma le taulimaina o gaoioiga e ala i le aufono a le uarota, ma isi suiga.

O tusitaulima fou ua faamanino mai ai le fenumiai e tusa ai ma le mea sa ta’ua e le Au Peresitene Sili i le 1981, o le misiona tafatolu a le Ekalesia—folafola, faaatoatoa, ma le faaolaina.

O le Tusitaulima 2, vaega 2.2, ua toe faamautu mai ai le faamoemoega o le Au Peresitene Sili i le 1981, o nei faatatauga e tolu o se vaega o le galuega tele e tasi, e faapea: “O Le Ekalesia a Iesu Keriso o le Au Paia o Aso e Gata Ai, na faatulagaina e le Atua e fesoasoani i Lana galuega e faataunuuina le faaolataga ma le faaeaga o Lana fanau” (tagai Mose 1:39).

Na lapata’ia ai e Elder Dallin H. Oaks o le Korama a Aposetolo e Toasefululua le “soona gauai atu i le faauigaga ma tuaoi o nei faatatauga e tolu o le galuega a le Alii” po o le “lē amanaiaina ai o isi elemene taua e tatau ona i ai, e pei o le tausiga o e matitiva.”

Na ia saunoa, “O le mataupu faavae masani, o loo ta’ua i le vaega 2.2, e faapea ‘o polokalama ma gaoioiga a le Ekalesia [ua faamoemoe] e lagolago ai ma faamalolosia tagata taitoatasi ma aiga.’”

O mataupu ma aoaoga faavae o loo maua i mataupu muamua e tolu o le Tusitaulima 2 o “faavae ia o le taitaiga o le Ekalesia ma e tatau ona faavae ai mea uma e faia [e taitai],” na saunoa i ai Elder Quentin L. Cook o le Korama a Aposetolo e Toasefululua. Peitai, o mataupu o le tusi o loo sosoo mai ai, aemaise se mataupu fou ua faaigoaina o le “Ogatasi ma Fetuunaiga,” e fesoasoani e faamatala ai le mea e mafai ai ona fetuunai aiaiga ma polokalama a le Ekalesia.

E fesoasoani lenei mataupu “ua faatulaga manino mai ai mataupu e tatau ona laugatasia ai iunite uma lava o le Ekalesia” po o fea lava e i ai, “o loo i ai foi mataupu faavae e matuai taua o loo faatulaga mai ai tulaga e mafai ai ona faatagaina … se fetuunaiga i le lotoifale,” na saunoa ai Elder Cook.

O faataitaiga o mea e mafai ona faia ai ni fetuunaiga talafeagai e aofia ai tagata e galulue ma polokalama a ausilali, ma le faatulagaga ma pe faafia ona faia ia fonotaga faaleautaitai ma gaoioiga. O tulaga e tatau ona mafaufau i ai, e aofia ai tulaga faaleaiga, feoa’iga ma fesootaiga, vaega toaitiiti o le au paia, ma le saogalemu.

“A mafaufau po o a fetuunaiga e ono talafeagai, e tatau i taitai ona sailia pea lava pea le taitaiga a le Agaga ma talanoa fefautuaai ma lo latou pulefaamalumalu o loo vaaia,” o le saunoaga lea a Elder Cook.

I le taitaiina ai o se felafolafoaiga, sa fautuaina ai e Elder M. Russell Ballard o le Korama a Aposetolo e Toasefululua e faapea, o le suesueina o faatonuga i mataupu taitasi i le taimi, ma talanoaina ia mataupu faavae i fonotaga a aufono, e mafai ai ona maua ni aoaoga e sili atu ona ‘anoa.

Afai e i ai ni fesili a taitai e uiga i aiaiga ma polokalama e le o mafai ona taliina e tusitaulima, e tatau ona latou talanoaina ma lo latou taitai perisitua pulefaamalumalu, na fautua mai ai Elder Oaks. Afai e i ai ni fesili e le o maua ni tali, na ia saunoa, “e na o taitai perisitua aupito sinia e tatau ona siakiina i le Ofisa o le Au Peresitene Sili.”