Uila Vilivae i le Lumanai

E toatele alii talavou e saunia mea tautupe e auauna atu ai i se misiona. I Aferika, o se vaega o lena sauniuniga o le sueina lea ia lava se tupe mo se tusifolau. Sa maua e Seterika Siamupine le mea sa ia manaomia i se faiga fatufatua’i: e ala i le faatauina atu o fa’i mai tua o se uila vilivae.

E nofo Seterika i Luputa, i le Ripapelika Temokarasi o Congo. O ia o se tasi o alii talavou e 45 mai le itumalo o Luputa, o loo faigaluega i le teuina o se tupe mo se tusifolau e alu ai i se misiona. I Ripapelika Temokarasi i Kongo, o le tau o le tusifolau e $250, pe tusa o le lua vaetolu o le tau o le fausiaina o se fale.

Ae e lei faavaivai ai Seterika. Sa ia sueina le tupe o lana misiona e ala i le viliina o le uila vilivae i le 15–30 kilomita (9–19 maila) mai Luputa e oo atu i nuu laiti, lea sa ia faatauina mai ai fa’i, ona toe vili foi lea o le uila e ui atu i laufanua valevalenoa o Aferika, ua matuai mamafa lana uila i fualaau aina suamalie e faatau atu i le taulaga. O vaiaso taitasi e 180 kilomita le mamao o le mea e alu ai (112 maila) i le auala oneone, ma sa na o le tasi le taimi na toulu ai sana uta na le’i paleni lelei.

O taumafaiga a Seterika, na ia maua ai pe tusa o le $1.25 i le vaiaso, po o le $65.00 i le tausaga. E fa tausaga na galue ai o ia e teu se tupe ia lava e faatau ai lona tusifolau, ae o lea ua ia iloa nei lona lumanai o le a aofia ai ma se misiona faafeautalai aua ua saunia o ia i le tulaga tautupe e tali atu ai i le valaau e faamisiona.