E Aoao ma Molimau Mai Tusitusiga Paia e uiga ia Iesu Keriso

E aofia i tusitusiga paia ia fautuaga mai perofeta, tala musuia o le taulimaina e le Atua o tagata, ma faaaliga mai le Atua i Ana perofeta. Ua aoao mai e tusitusiga paia o i tatou o fanau a lo tatou Tama Faalelagi, e alofa ia i tatou. O se vaega o Lana fuafuaga mo lo tatou fiafia e faavavau, ua tatou o mai ai i le lalolagi. A o tatou i ai la iinei, ua avea ia tusitusiga paia o se laina faaola faaleagaga i lo tatou Tama Faalelagi ma Iesu Keriso.

O le mafuaaga autu lava o tusitusiga paia o le molimau mai lea ia Keriso, ma fesoasoani ia i tatou ia o mai ia te Ia ma maua le ola e faavavau (tagai Ioane 5:39). O lea ua fautuaina ai i tatou e perofeta o Aso e Gata Ai ia suesue i tusitusiga paia i aso uma, taitoatasi pe faatasi foi ma o tatou aiga. Na saunoa mai Peresitene Thomas S. Monson: “Ia auai i aso taitasi i le suesueina o tusitusiga paia. O vasega auiliili e faatatope ona fai, e le tutusa le aoga ma le faitauina i aso taitasi ma faaaoga tusitusiga paia i o tatou olaga. Ia faamasani i lesona e aoao mai i tusitusiga paia. … Suesue i ai e faapei o latou saunoa mai ia te oe, aua o upumoni na.”¹

E ala mai i upu o tusitusiga paia, ua mafai ai ona tatou iloa ma alolofa i lo tatou Tama Faalelagi ma le Faaola o Iesu Keriso. Ua mafai ona tatou faitauina a La’ua poloaiga ma, o se taunuuga, ua aoao ai ia iloa le eseesega i le va o le mea sa’o ma le mea sese. Ua tatou maua ai le malosi e tetee atu i faaosoosoga e fai le agasala. Ua faateleina lo tatou naunau ia usitai i tulafono a le Atua. Ua faamafanafanaina ma aoaoina i tatou e tusitusiga paia a o tatou i ai i le lalolagi, ma e latou te toe faasinoina ai i tatou i le ala e toe foi ai i lo tatou aiga faalelagi.

Ua talia e Tagata o Le Ekalesia a Iesu Keriso o le Au Paia o Aso e Gata Ai tusi nei o ni tusitusiga paia:

1. O le Tusi Paia o se faaputuga o faamaumauga paia o loo i ai faaaliga a le Atua i perofeta anamua i le Nuu Paia. O loo ta’u mai e lo tatou faatuatuaga lona valu e faapea, “Matou te talitonu o le Tusi Paia o le afioga a le Atua i mea uma ua tonu ona faaliliuina.”

2. O le Tusi a Mamona: O le isi lea Molimau ia Iesu Keriso e aofia ai faaaliga a le Atua i perofeta anamua i Amerika. Ua i ai [i lea tusi] le atoatoaga o le talalelei a Iesu Keriso (tagai i le MFF 20:9).

3. O le Mataupu Faavae ma Feagaiga o se tusi o faaaliga e faatatau i le Toefuataiga o le talalelei a Iesu Keriso, na tuuina atu i perofeta i nei ona po e amata mai ia Iosefa Samita.

4. O le Penina Tau Tele e aofia ai ni faaaliga faaopoopo mai le Atua ia Mose, Aperaamo, ma Iosefa Samita.

5. E faaauau pea ona faaalia upu moni e le Atua i perofeta soifua e ala i musumusuga a le Agaga Paia. O nei upu moni ua faatatau i tusitusiga paia (tagai MFF 68:4). E oo mai muamua ia i tatou e ala mai i konafesi aoao, lea e faia i le faaiuga o le vaiaso muamua o Aperila ma Oketopa, pe a faafofoga tagata o le ekalesia i le lalolagi atoa i saunoaga mai lo tatou perofeta ma isi taitai o le Ekalesia.