O tagata o le Ekalesia i le atu konetineta o Aferika sa faaaluina le Aso Toonai, 21 o Aokuso, 2010, e faaleleia ai o latou nuu o se vaega o le Aso o Lima Fesoasoani o Aferika Atoa 2010.

O le tausaga lenei, sa valaaulia ai e le siteki o Aba Nigeria ni nai vaega o autalavou o nonofo ai i nuu latou te faipaaga, ma aumaia faatasi ai le silia ma le 1,000 tagata. I le Itu o Umuahia Nigeria, e silia ma le 100 tagata o le Ekalesia mai paranesi e ono na sasaina le vao, teuina togalaau, ma faamamaina alavai ma lotoa o le Matagaluega o Faasalalauga o le Setete o Abia.

I Accra, Ghana, na tofiaina ai paranesi e faamamaina ia nofoaga eseese, e aofia ai falemai, faleaoga o tamaiti, ma ofisa o leoleo. Sa tofiaina nisi o tagata o le Ekalesia e faatumuina ni lua pe faamamaina foi alavai ua amata ona poloka.

I soo se mea lava e o atu i ai tagata o le ekalesia ma o latou taofu o Lima Fesoasoani o loo ofuina, e faafeiloaia i latou e tagata o nuu, ma le lotofaafetai mo la latou fesoasoani. Sa tau atu e se taiulu o le Aoga a Matata eseese o le Setete o Abia i tagata volenitia, “I se vaitaimi o loo tuufesili ai pea tagata uma po o le a se mea a le malo o le a faia mo i latou, o se atiina ae e talisapaia le i ai o se faalapotopotoga o loo tuuina mai pea lava pea le auaunaga i tagata lautele.”

Ua maua nei se lomiga faa-Initonesia o tusitusiga paia fusitolu, ma ua faigofie ai mo failauga Initonesia ona maua le Tusi a Mamona, Mataupu Faavae ma Feagaiga, ma le Penina Tau Tele ua fusia faatasi i la latou lava gagana. Ua maua foi se lomiga fou o le Tusi a Mamona i le gagana Initonesia.

Ua maua foi i luga o le initoneti ia tusitusiga paia fusi tolu faa-Initonesia. O le ituaiga lea i luga o le initoneti o loo aofia ai ma faafanua, ma atapue ma e mafai e le au faitau ona faailoga ia mau ma faatinoina ia sailiga i upu autu. E mafai ona maua i le scriptures.lds.org/ind.

E silia ma le 6,000 tagata o le Ekalesia i le lalolagi atoa e tautatala i le gagana Initonesia o le toatele o i latou o loo i Initonesia, Meleisia, ma le Iunaite Setete. O Initonesia o le atunuu lona fa lea e aupito i toatele le faitau aofai o ona tagata i le lalolagi.

Ua faamalosiau mai le Au Peresitene Sili i tagata o le Ekalesia ia faaaogaina a latou lava tusitusiga paia ma faaaogaina i suesuega faifai pea, i sauniga ma fonotaga a le Ekalesia, ma mo tofiga faale-Ekalesia.

Ua ulufale atu nei i le Radio Hall of Fame i le Iunaite Setete le polokalama O Musika ma le Afioga Tulei, le faasalalauga faalevaiaso a le Aufaipese a le Tapeneko. Sa filifilia le faasalalauga ina ua uma ona filifilia e le fono a le aufaatonu ia polokalama mo le faaulufalega, ma sa palota tagata lautele mo a latou polokalama e fiafia i ai ma uiga tausaafia.

O Musika ma Afioga Tulei na manumalo i le vaega o le National Pioneer, lea na faamamaluina ai le au faasalalau o e na faia se tautua e le itiiti ifo ma le 10 tausaga i le atiina ae o leitio ma na avea ma e na taitaia ma atiina ae pe faaleleia polokalama o leitio i le tulaga faaleatunuu.

O Musika ma Afioga Tulei o se faasalalauga i leitio aupito umi i le Iunaite Setete. O le uluai faasalalauga na faia i le aso 15 o Iulai, 1929.

O loo faasalalauina le polokalama i le silia ma le 2,000 alaleo leitio, alaleo televise, ma isi faiga e ala i uaea malolosi. O loo maua foi i luga o le initoneti i le musicandthespokenword.org. Mai le itulau autu, kiliki i le Listen Live ma mulimuli i le fesootaiga mo alaata e maua ai.