Te ana‘iraa taime o te Bukaa Moromona

Te mau Ati Iareda

Ua faarue teie pŭpŭ i te Patu no Babela e ua tae i te fenua Amerika i te area matahiti 2200 H.M. Ua ruperupe ratou e tae noa’tu i te matahiti 600 H.M.,i reira hoi te mau tama‘i i te haamouraa i te mau taata atoa maori râ o Korianetumera. (Ahi‘o Etera 1–15.)

Te mau Ati Nephi

Ua faarue te pŭpŭ a Lehi ia Ierusalema i te area matahiti 600 H.M. e ua tae atu i Amerika. I muri mai ua vahihia to’na huaai. I muri a‘e i to Lehi poheraa, ua pee te feia parau-ti‘a i ta’na tamaiti ia Nephi i te fenua apato‘erau. Ua riro mai ratou ei mau Ati Nephi. (A hi‘o 1 Nephi 1–22; 2 Nephi 1–5.)

Te mau Ati Lamana

I muri a‘e i te poheraa o Lehi, ua faaea mai te mau taata iino i piha‘iho i ta’na tamaiti o Lamana e ua riro mai ratou te mau Ati Lamana. (A hi‘o 2 Nephi 5.)

Te mau Ati Muleka

Ua arata‘i o Muleka, te hoê tamaiti a te arii Zedekia, i te hoê pŭpŭ taata no Ierusalema i te area matahiti 587 H.M. e ua tae atu i te fenua Amerika. Ua ite ratou ia Korianetumera. (A hi‘o Omoni 1:14–21.)

Mosia₁

I te area matahiti 225 H.M. ua riro mai te mau ati Nephi ei nunaa iino, no reira Mosia ₁ i arata‘i ai i te hoê pŭpŭ Ati Nephi parau-ti‘a i Zarahemela e ua apiti atu i te ati Muleka. Ua pii ratou ia ratou iho te mau Ati Nephi. Ua riro mai Mosia₁ to ratou arii parau-ti‘a. O te arii Beniamina ta’na tamaiti. (A hi‘o Omoni 1:12–23.)

Zenifa

I te area matahiti 200 H.M. ua arata‘i o Zenifa, te hoê ati Nephi, i te hoê pŭpŭ taata i te tufaa apatoa no te titau i te mau fenua no te ati Nephi. I to Zenifa taeraa’tu i reira e ta’na pŭpŭ, ua faatîtîhia ratou e te mau ati Lamana. I muri iho, ua tono atu te arii Mosia₂ ia Amona no te imi i te pŭpŭ, e ua faafariu Amona i te arii Limehi. (A hi‘o Mosia 7; 9–22.)

Alama₁

Fanauhia i rotopu i te nunaa taata a Zenifa, ua riro Alama₁ te hoê o te mau tahu‘a a te arii ino o Noa. Ua taparahi-pohe-hia te peropheta Abinadi i muri a‘e i to’na piiraa i te arii Noa ia tatarahapa. Ua ti‘aturi râ Alama₁ i te mau haapiiraa a Abinadi e ua tapuni oia e te hoê pŭpŭ taata faaroo, ma te amui atu i muri iho i te mau Ati Nephi. (A hi‘o Mosia 11; 17–18; 23–24.)

Alama₂ e te mau Tamaiti a Mosia₂

I to ratou taure‘are‘araa, ua haa o Alama₂ e te mau tamaiti a te arii Mosia₂ no te haamou i te Ekalesia. Ua avau te hoê melahi ia ratou e ua tatarahapa ratou. Ua riro mai Alama₂ ei hoê faatere parau-ti‘a. (A hi‘o Mosia 27–29). Ua riro mai te mau tamaiti a Mosia₂ ei mau misionare no te mau ati Lamana. I muri a‘e i to ratou manuïaraa rahi, ua amui faahou ratou ia Alama₂ e ua oaoa. (A hi‘o Alama 17–26.)

Te feia eiâ no Gadianotona

E mea puai roa te mana o teie amuiraa huna taparahi taata i te taime e mea ino te sotaiete e e mea paruru roa ratou ia vai parau-ti‘a ana‘e te sotaiete. I te area matahiti 350 M.P.M. ua haape‘ape‘a ratou i te oraraa papû o te mau taata atoa. (A hi‘o Helamana 2 ; 6 ; 4 Nephi 1:42–46.)

Iesu Mesia

I muri a‘e i To’na Ti‘a-faahou-raa i Ierusalema, ua fâ atu te Faaora i te fenua Amerika, ua utuutu i te nunaa, ua haapii i Ta’na evanelia, e ua faanaho i Ta’na Ekalesia. Ua ora te mau taata ma te hau e 200 matahiti te maoro i muri a‘e i To’na tere. (A hi‘o 3 Nephi 11–28).

Haamouhia te mau Ati Nephi

Ua ho‘i riirii noa mai te ino, ua u‘ana te mau tama‘i e ua haamouhia te mau Ati Nephi. Ua tape‘a o Moroni, te taata ana‘e tei ora mai, i te mau papaa parau e ua huna i te reira i muri iho hou a pohe ai oia. (A hi‘o 4 Nephi 1:24–28 ; Moromona 8:1–8 ; Moroni 10.)