Mau Uiraa Pinepine no ni‘a i te Buka a Moromona

Te Buka a Moromona o te hoê ïa buka papa‘iraa mo‘a mai te Bibilia. O te Tahi faahou ïa ite no Iesu Mesia.¹ Te tuatapapa rahi nei te Bibilia i te oraraa e te mau haapiiraa no Iseraela tahito. Tei roto i te Buka a Moromona te mau papa‘i a te mau pŭpŭ e rave rahi tei tae atu i te fenua Amerika, e tae noa’tu i te hoê utuafare tei faaru‘e ia Ierusalema i te matahiti 600 h.m. Teie mau taata e mau huaai ïa no te utuafare o Iseraela. No reira ua papa‘ihia te Bibilia e te Buka a Moromona e te mau taata e hoê â fatu ai‘a i roto râ i te mau tufaa taaê no te ao nei.

Mai te Bibilia, ua hau atu te Buka a Moromona i te hoê noa aamu. Tei roto i te reira « te îraa o te evanelia a Iesu Mesia » (PH&PF 20:9) : te mau haapiiraa, te mau parau haapiiraa e te mau tohuraa o te faaite papû ra no ni‘a i te Atua te Metua e Ta’na Tamaiti, o Iesu Mesia.

Ua tatara te Peropheta Iosepha Semita e te « faaite nei te Buka a Moromona ia tatou e ua fâ to tatou Faaora i ni‘a i teie fenua (Amerika) i muri a‘e i To’na ti‘a-faahou-raa : e ua tanu Oia i te Evanelia i ŏ nei i roto i to’na îraa, e to’na faufaa, e to’na mana, e haamaitairaa; e e mau Aposetolo, Peropheta, Orometua, Haapii, Haapii Evanelia to ratou, hoê â haapa‘oraa, hoê â autahu‘araa, e hoê â mau oro‘a, horo‘araa, mana, e haamaitairaa mai tei oaoahia i ni‘a i te fenua hitiaa o te râ; … e ua faauehia to ratou peropheta hope‘a tei ora i rotopu ia ratou ia papa‘i i te hoê haapotoraa no ta ratou mau tohuraa, aamu, e te tahi atu â… e no te huna i te reira i roto i te fenua, e e ti‘a mai e ia hoêhia’tu i te Bibilia no te faatupuraa i te mau opuaraa a te Atua i te mau mahana hope‘a nei.²

E tuatapapa te mau melo no te Ekalesia i te Bibilia e te Buka a Moromona. Oia mau, e piti matahiti i ni‘a i te maha matahiti ua faataahia te mau buka haapiiraa no te Haapiiraa Sabati no te tuatapaparaa i te Bibilia. (No te tahi atu â haamararamaramaraa no ni‘a i teie tumu parau, a hi‘o i te mau api 16, 24, and 52 i roto i teie ve‘a.)

Te mau taata papa‘i tumu o te mau peropheta tahito ïa, mai ia Nephi, Iakoba, Moromona e te tamaiti a Moromona, o Moroni. Ua haaputuputu e ua haapoto o Moromona i te mau papaa parau tei tape‘ahia e te mau peropheta no ni‘a i to ratou aamu, ta ratou mau tohuraa, e ta ratou mau haapiiraa. Ua tuu atoa mai oia i te tahi o ta’na iho mau ohipa i rave. Ua ooti Moromona i teie buka i ni‘a i te mau api auri —te peni auro— o tei faahiti-pinepine-hia mai te mau api auro.

I muri a‘e i te poheraa o Moromona, ua faaoti Moroni i te papaa parau e ua huna atu i te reira i roto i te hoê aivi no te faaherehere i te reira no to tatou nei anotau. I te matahiti 1823 ua fâ atu o Moroni ei melahi ia Iosepha Semita e ua faaite atu ia’na te vahi i reira te papaa parau i hunahia‘i. E maha matahiti i muri mai ua faati‘ahia Iosepha ia rave i te mau papaa parau. Ua « iriti oia i te papaa parau na roto i te horo‘a e te mana o te Atua » i roto i te reo Paratane mai roto mai i te reo tahito i papa‘ihia‘i te reira. I muri iho ua nene‘i e ua opere oia i te Buka a Moromona. (No te tahi atu â haamaramaramaraa no ni‘a i teie tumu parau, a hi‘o i te mau api 22 e 72 i roto i teie ve‘a.)

Ua noaa ia Iosepha Semita te mau api i te ava‘e Setepa 1827 e ua vai noa ia’na ra e tae noa’tu i te tau tupuraa raau no te matahiti 1829. I to’na papa‘iraa i to’na aamu i te matahiti 1838, ua faataa oia i te mea tei tupu i te mau api: « E i reira, mai te au i tei opuahia ra, ua tii mai te ve‘a [Moroni] i te reira ua faaho‘i au i te reira ia’na; tei ia’na ra te vairaa e tae noa mai i teie nei â mahana, oia hoi, i te 2 no Me, 1828 » (Iosepha Semita —Aamu 1:60).

Taaê noa’tu ia Iosepha Semita, e rave rahi atu mau tane e mau vahine tei ite mata i te mau api e tei faaite papû i to ratou vairaa. E hoê ahuru ma hoê ihoa ra mau taata, tei matauhia e Na IteTootoru e na Ite Toovau, tei papa‘i i to ratou mau iteraa papû no to ratou hi‘o mataraa i te mau api, e no na Ite Toovau no to ratou tape‘araa i te mau api. Tei roto to ratou mau iteraa papû i mua i te api tata‘itahi o te Buka a Moromona.

Te ti‘a nei teie mau taata ei mau ite puai no te Buka a Moromona, peneia‘e e hau atu â no te mea ua « inoino te tahi o ratou no te hoê tau ia Iosepha », te parau ra o Elder Jeffrey R. Holland no te Pŭpŭ no te Tino Ahuru ma Piti Aposetolo. Noa’tu râ te reira, ua « faaite ratou e tae noa’tu i to ratou poheraa e ua ite mau ratou i te hoê melahi e ua fafa ratou i te mau api. Ua parau ratou e ‘ua faaitehia mai te reira ia matou na te mana o te Atua e ere na te taata’ ‘No reira ua ite matou ma te papû e e parau mau te ohipa.’ »⁴

Noa’tu e aita tatou e niu nei i to tatou faaroo i ni‘a i te tapa‘o tino, te vai nei râ te faaiteraa no te reo, te aamu e te maimiraa a te aivanaa no ni‘a i te Buka a Moromona. Ei hi‘oraa, ua vahavahahia te hoê taime te mana‘o no te papa‘iraa i ni‘a i te mau api auri, i roto râ i te mau matahiti i ma‘iri a‘e nei ua ite hia e rave rahi mau hoho‘a no te mau papa‘iraa mo‘a i ni‘a i te mau api auri tei huna hia i roto i te mau afata ofa‘i.

Ua ite te mau aivanaa no te reo e aita te mau ta‘o e te mau parau no te Buka a Moromona e ta‘i maitai ra i roto i te reo Paratane e auraa maitai ra i roto i te reo Hebera e te tahi atu mau reo tuati atu o tei matauhia e te mau taata no te Buka a Moromona— e mau reo tei ore i matauhia e te tamaiti apî o Iosepha Semita.

E ere râ na teie mau huru tapa‘o i haapapû ia tatou i te parau mau o te Buka a Moromona. E ohipa râ no te faaroo e te heheuraa i te taata iho.

Te rave‘a papû hoêroa ia ite no outou iho e mea na roto ïa i te mana o te Varua Maitai. Te titau manihini nei te pene hope‘a i roto i te Buka a Moromona i te taata atoa o te tai‘o i te reira ia feruri no ni‘a i te reira,e ia hinaaro mau i te ite mai te mea e parau mau te reira ia ani i te Metua i te Ao ra i te i‘oa o Iesu Mesia. O ratou o te na reira e ite ïa ratou na roto i te mana o te Varua Maitai e e parau mau te buka ( a hi‘o Moroni 10:3–5). E rave rahi mau milioni melo o te Ekalesia tei pure e tei ite na roto i te faaiteraa a te Varua Maitai e e parau mau te Buka a Moromona. (No te tahi atu â haamaramaramaraa no ni‘a i teie tumu parau, a hi‘o i te mau api 4, 60, e 80 i roto i teie ve‘a.)

Te hoê o ta tatou mau ti‘aturiraa tumu oia ia ua heheu noa na te Atua i To’na hinaaro i Ta’na ra mau tamarii i te fenua nei e e na reira noa â oia. Te ti‘aturi nei tatou i te Bibilia ei parau a te Atua aita râ tatou e ti‘aturi e tei roto i te Bibilia te taatoaraa o te heheuraa ta te Atua i horo‘a aore râ e horo‘a i Ta’na ra mau peropheta. E tae noa mai i teie mahana te tamau noa â ra Oia i te heheu i To’na hinaaro na roto mai i te mau peropheta e te mau aposetolo ora, te niu hoi o te Ekalesia a Iesu Mesia i te Feia Mo‘a i te mau Mahana Hopea nei (a hi‘o Ephesia 2:20).

I to te Aposetolo Ioane papa‘iraa i te buka no te Apokalupo, e ere ïa te reira te buka hope‘a no te Bibilia. Aita te Faufaa Tahito e te Faufaa Apî i taamuhia i roto i te hoê noa iho buka no te papa‘iraa mo‘a tei piihia i teie nei te Bibilia e tae noa’tu i te toru o te tenetereI muri mai i te Mesia.

Hoê â atoa, te parau mai nei te Deuteronomi 4:2 ia tatou eiaha e amui faahou atu i te mau parau a Mose. Oia mau, eita teie irava, i te haamataraa o te Faufaa Tahito e haafaufaa ore i te toe‘a o te Bibilia. Eita e nehenehe ia Mose aore râ ia Ioane ia parau ia taui i te hoê buka tei ore â i tupu; ua faaara râ raua i te faahuru-ê-raa i te mau haapiiraa mau o te evanelia.

Eita te Buka a Moromona tei farii i te îraa o te evanelia e haataui i te parau a te Atua e haapapû râ i te reira. (No te tahi atu â haamaramaramaraa no ni‘a i teie tumu parau, a hi‘o i te mau api 24 e 38 i roto i teie ve‘a.)

Te pahonoraa i teie uiraa tei te huru ïa te maramaramaraa no ni‘a i te raveraa no te iritiraa e te nene‘iraa i te Buka a Moromona.

1. A iriti ai Iosepha Semita i te mau api auro e te mana o te Atua ua tai‘o oia i te mau parau i te hoê papa‘i parau. E rave te mau papa‘i parau i te tahi mau taime te mau hape i te pae no te pīaparaa e te tarame a papa‘i ai ratou i ta’na mau parau. Ei hi‘oraa, i roto i te 1 Nephi 7:20 ua papa‘ihia [na roto i te reo peretane] te mau parau « were sorrowful » mai teie « ware sarraful ». E ere te mau papa‘i parau i te feia ite ore, aita râ te pīaparaa i faaafarohia i taua taime ra.

2. Ua tapitihia te mau api matamua tei papa‘i-rima-hia no te iritiraa no te hamani i te hoê api tei papa‘i-rima-hia na te taata nene‘i. I teie tufaa, ua faatitiaifarohia te mau hape pīaparaa e no te tarame, e ua amuihia’tu te tomaraa. Ua ô atoa mai râ te tahi mau hape apî a hape ai te mau parau i te papa‘ihia.

3. Ua rave te taata nene‘i i te mau rave‘a no te faafaroraa i te matini nene‘iraa. Ua faaô atoa mai râ oia i te tahi atu mau hape. Ei hi‘oraa, i roto i te Alama 57:25 ua tai‘o hape oia i te ta‘o « joy » e ua nene‘i i te ta‘o « foes »

4. Ua hi‘opo‘a maitai te Peropheta Iosepha Semita i na nene‘iraa matamua e toru o te Buka a Moromona e ua tamau oia i te tautururaa i te haamaitai e te faatitiaifaro. Aita râ te tahi mau hape i itehia e tae noa’tu i te mau nene‘iraa i muri mai. I te matahiti 1981 ua faatiti‘aifarohia i te hope‘araa te hoê hape a te taata nene‘i i roto i te Alama 16:5tauiraa i te ta‘o « whether » i te ta‘o « whither » mai te au i te api papa‘i-rima-hia mai te au i ta te Peropheta i iriti mai roto mai i te mau api auro.

5. Te tahi atu mau tauiraa o te faataaraa ïa i te peni apî e te irava e te mau papa‘iraa i raro e te mau faahororaa irava .

Noa’tu eaha te mau uiraa ta te taata e ui no ni‘a i te Buka a Moromona, ua riro te buka to’na iho paruru maitai roa‘e. E nehenehe ta outou e faaite no ni‘a i te buka, a horo‘a i te hoê buka, e a ani ia vetahi ê ia pure no ratou iho no ni‘a i te buka. Mai te mea e aau mau e te hinaaro mau nei te hoê taata ia ite mai te mea e parau mau te buka, e e « faaite mai ïa te Fatu i te parau mau [i taua taata ra] na roto i te mana o te Varua Maitai » (Moroni 10:4).