I hea e Nehenehe ai Ia’u ia Ite i te mau Pahonoraa ?

I te 21raa o to’u matahiti, te haapii ra te mau misionare no te Ekalesia a Iesu Mesia i te Feia Mo‘a i te mau Mahana Hopea nei i te mau piha Reo Marite i to’u nei fenua no Rusia. Ua haamata vau i te haere i te mau haapiiraa reo, e aita i maoro roa ua haamata vau i te faaea maoro atu no te mau mana‘o varua ta te mau misionare e horo‘a i muri a‘e i te haapiiraa e no te ani atu ia raua i te mau uiraa.

Ua paari au i roto i te haapa‘oraa rahi o to’u nei fenua, e rave rahi râ ta’u mau uiraa no te pae faaroo tei ore i pahonohia. E pahonoraa ta te mau misionare e te mau melo no ta raua Ekalesia i te mau uiraa tei ore roa i pahonohia e te hoê taata na mua’tu no te haamaha i to’u hinaaro.

I te hoê taime i muri a‘e i te hoê haapiiraa reo Marite, ua ani au i te mau misionare i te hoê o ta raua buka, te Buka a Moromona. I to’u râ ho‘iraa’tu i te fare ua vaiiho vau i te reira ma te tai‘o ore i ni‘a i te hoê vairaa buka.

Aita râ te reira i vai maoro roa i reira. Ua faaroo vau i te mau melo no te Ekalesia tei haere i te piha reo Marite i te parauraa e e pahonoraa ta te mau papa‘iraa mo‘a i te mau fifi. No reira i te taime a faaruru ai au i te mau tamataraa aore râ te mau pe‘ape‘a, ua rave mai au i te Buka a Moromona mai te vairaa buka e ua haamata vau i te tai‘o. Oia mau roa, ua iteahia ia’u te mau pahonoaraa, te mau huru pahonoraa tei parau ti‘a mai ia’u i te mea ta’u i hinaaro ia ite.

Ua haamata vau i taua taime ra i te ite e eita e nehenehe ia’u ia ora aita te Ekalesia . Tei reira te vahi ta’u e hinaaro ia parahi atu. Tei reira te vahi ta’u i ite e riro ai au e melo.

Ua hinaaro râ vau ia papû â na roto i te aniraa i te Atua. Te fifi, te ora ra vau i roto i te hoê vahi faaearaa na‘ina‘i e hoê ana‘e piha e te faaea amui ra maua e to’u fatu fare, te hoê vahine paari, e aita e vahi mo‘emo‘e no’u no te pure. I te hoê râ pô, ua haere atu vau i roto i te fare tūtu tei faataa-ê-hia’tu i te toe‘a o to maua fare e ua ani i te Metua i te Ao ra mai te mea e mea mau anei te Ekalesia. No te huru puai o te pahonoraa ta’u i farii ua ite au eaha te mea e ti‘a ia’u ia rave.

Ua bapetizohia vau tau taime poto noa i muri mai, e ua riro to’u taime ei melo no te Ekalesia ei taime oaoa roa‘e no to’u oraraa. I te vahi e mau uiraa ta’u na mua‘e, e mau pahonoraa ta’u i teie nei. I te mau taime ua mana‘o vau e aore e mea i roto ia’u, ua î roa ïa vau i teie nei.

Te mauruuru nei au e aita te Metua i te Ao ra i vaiiho noa mai ia tatou ma ore e mau pahonoraa. Ua ite au e e paraparau ïa Oia ia tatou, na roto i te pure e na roto i te mau papa‘iraa mo‘a.