Ko e Mālohi ʻo e Lakanga Fakataulaʻeikí

Lolotonga e Tau Lahi ʻa Māmani Hono II, ʻi he konga kimuʻa ʻo e 1944, naʻe hoko ha meʻa fekauʻaki mo e lakanga fakataulaʻeikí [pea] naʻe fekauʻaki mo ha faiongoongo—naʻe ʻikai ko ha mēmipa ʻo e Siasí—naʻe ngāue ki ha kautaha nusipepa ʻi Hauaiʻi. … Naʻá ne muimui atu mo hono kaungā faiongoongó ʻi he foʻi peau hono uá ʻi he Motu Kuasaliní. ʻI heʻenau ngaʻunu ki muʻá ne nau fakatokangaʻi ha talavou sōtia ne tētē foʻohifo mai, kuó ne kafo lahi ʻaupito. Naʻe toto e vai naʻe tētē aí. Pea ne nau fakatokangaʻi ha sōtia ʻe taha ʻoku haʻu fakahangatonu mai ki hono kaungā sōtia kafó. Naʻe kafo foki mo e sōtia fika uá pea tāupe pē hono nima hemá hono tafaʻakí. Naʻá ne hikiʻi hake ʻa e ʻulu ʻo e sōtia ne tētē mai he vaí ke ʻoua naʻa siʻi melemo. ʻI he leʻo ilifia naʻá ne ui tokoni. Naʻe sio atu e kau faiongoongó ki he tamasiʻi naʻá ne pukepuké pea nau ui atu ki ai, “Masiʻi, he ʻikai ke tau toe lava ʻo fai ha meʻa ki he tamasiʻí ni.”

Naʻe tohi ʻe he faiongoongó ʻo pehē, “Ne u vakai atu ki ha meʻa ne teʻeki ai ke u mātā kimuʻa.” Naʻe hanga ʻe he tamasiʻi kafó ni ʻo kaufakiʻi e sino ʻo hono kaungā sōtia kuo mālōloó ke na aʻu ki he matātahí. Naʻá ne “hilifaki e ʻulu ʻo hono kaungā sōtiá ʻi hono funga tuí. … Ko ha ʻata fakaofo moʻoni ia—ko ha ongo tamaiki kuo kafo—fakatouʻosi … ko ha ongo tangata maʻa mo fakaʻofoʻofa, neongo ʻena faingataʻaʻiá. Naʻe punou hifo ʻa e ʻulu ʻo e tamasiʻí ʻi he funga ʻo e tokotaha maté ʻo ne pehē ange, “ʻOku ou fekau kiate koe ʻi he huafa ʻo Sīsū Kalaisí pea ʻi he mālohi ʻo e lakanga fakataulaʻeikí, ke ke kei moʻui pē kae ʻoua ke u feinga ke maʻu mai ha tokoni fakafaitoʻo.’” Naʻe fakaʻosi ʻe he faiongoongó ʻene fakamatalá ʻaki e leá ni: “Ko kimautolu toko tolu ʻeni [ongo sōtiá pea mo au] ʻi falemahaki. ʻOku ʻikai ʻiloʻi ʻe he kau toketaá [pe naʻe anga fēfē ʻena kei moʻuí], ka ʻoku ou ʻilo ia ʻe au.”

Ngaahi Fehuʻi ke Fakalaulauloto ki aí:

• Ko e hā e ngaahi tāpuaki ʻoku maʻu ʻe he Kāingalotú ʻo fakafou mai ʻi he mālohi ʻo e lakanga fakataulaʻeikí?

• ʻOku anga fēfē ʻa e fehokotaki ʻa e tuí mo e lakanga fakataulaʻeikí—ki he kau maʻu lakanga fakataulaʻeikí mo kinautolu ʻoku nau maʻu e ngaahi tāpuakí?

Fakakaukau ke hiki hoʻo ngaahi fakakaukaú ʻi hoʻo tohinoá pe aleaʻi ia mo ha niʻihi kehe.