ʻOku Faka-Hepelū e Fakamatalá ni

Hili ʻeku lau e Fuakava Motuʻá ʻi he ngaahi taʻu kuo hilí, ne u mahuʻingaʻia ʻi hono ngaahi akonakí, tautautefito ki he ngaahi tohi ʻa ʻIsaiá, peá u hokohoko atu leva hono akó. ʻI he 2010, ne u tangutu fakataha ai mo ha faifekau lāpai Siu. Naʻá ku kamataʻi ha pōtalanoa ʻaki haʻaku fehuʻi ange ha ngaahi fakamatala ʻi he tohi ʻa ʻIsaiá. ʻI he fākalalahi ʻo ʻema pōtalanoá, ne ma aleaʻi hono mahuʻinga ʻo e mafai e lakanga fakataulaʻeikí, fakatatau mo e Fuakava Motuʻá.

Ne ʻeke mai ʻe he faifekaú pe naʻe maʻu mei fē ʻe he kau mēmipa hoku siasí ʻa e mafai ʻo e lakanga fakataulaʻeikí. Naʻá ku fakaʻaongaʻi e faingamālié ni ke fakamatala ange kiate ia fekauʻaki mo e ʻUluaki Mata Meʻa-hā-mai ʻa Siosefa Sāmitá pea mo hono fakafoki mai ʻo e Lakanga Taulaʻeiki Faka-ʻEloné mo e Lakanga Taulaʻeiki Faka-Melekisētekí. Naʻá ma talanoa ki hono liliu ʻo e Tohi ʻa Molomoná pea mo hono taumuʻá ʻi heʻene hoko “Ko ha Fakamoʻoni ʻe Taha ʻo Sīsū Kalaisí.”

Naʻe ofo ʻa e faifekaú. Naʻá ne ʻeke mai pe naʻe taʻu fiha ʻa Siosefa ʻi heʻene maʻu ʻa e ʻUluaki Mata-meʻa-hā-maí. Ko e taimi naʻá ku fakahā ange ai naʻe taʻu 14 pē ʻa Siosefa, ʻo meimei taʻu tatau pē mo Samuela ʻo e Fuakava Motuʻá, talamai ʻe ia naʻe ui ha kau palōfita tokolahi ʻi heʻenau kei taʻu hongofulu tupú. Pehē ʻe ia ʻoku fenāpasi pē ia ke ui ʻe he ʻOtuá ʻa Siosefa Sāmita ʻi hono taʻu hongofulu tupú.

Naʻá ku fakaava leva ʻeku folofolá, peá ma lau fakataha e fakamoʻoni ʻa e Kau Fakamoʻoni ʻe Toko Tolú pea mo e Kau Fakamoʻoni ʻe Toko Valú. Naʻá ku talaange ne ʻi ai ha kau fakamoʻoni ne nau mavahe mei he Siasí ka naʻe hala ha taha ke ne fakaʻikaiʻi ʻene mamata ki he ʻū lauʻi peleti koulá.

Fehuʻi mai ia, “Anga fēfē ʻenau mavahe mei he Siasí hili ʻenau mamata ki ha ʻāngelo mo e ʻū lauʻi peletí?”

Ne u tali ange, “ʻOku ou manatuʻi naʻe faʻu ʻe he fānau ʻo ʻIsilelí ha ʻuhikiʻi pulu koula, hili pē ha taimi nounou mei heʻenau siotonu ki hono fakamavaeuaʻi ʻo e Tahi Kulokulá.”

Naʻá ne huke leva ki he 1 Nīfaí pea kamata ke ne lau. Kiʻi taʻofi pea pehē mai leva, “ʻOku faka-Hepelū e fakamatalá ni.”

Peá ne toki fakamatala mai leva ʻa e ʻuhinga ʻoku ngali ai ko e fakamatalá ko hano liliu faka-Pilitānia ia ʻo e faka-Hepeluú. Naʻá ku talaange ko e tohí naʻe hiki ia ʻe ha faʻahinga ʻo ʻIsileli. Naʻá ku lau ange leva ʻa e ʻIsikeli 37:15–20, ʻa ia ʻoku lau ki ha vaʻakau ʻo Siuta mo ha vaʻakau ʻo Siosefa. Naʻá ma felotoi ko e vaʻakau ʻo Siutá ʻokú ne fakafofongaʻi ʻa e Tohi Tapú, pea ko e vaʻakau ʻo Siosefá ko e Tohi ʻa Molomoná ia.

Ne fakahaaʻi ʻe he faifekaú ʻi he ʻosi ʻema talanoa houa ʻe tolú haʻane fie maʻu ha tatau ʻo e Tohi ʻa Molomoná. Ko e taimi ne u foki ai ki ʻapí, ne u ʻave leva haʻane Tohi ʻa Molomona kuo ʻosi tohiʻi fakafoʻituitui ki ai ʻeku fakamoʻoní. ʻOku ou fakamālō ne teuteuʻi au ʻe heʻeku feinga ke ako e Fuakava Motuʻá ke u aleaʻi e folofolá pea mo vahevahe ʻeku fakamoʻoní mo hoku kaumeʻa foʻoú ni, ʻa ia ko ha lāpai.