Atiina Ae o le Faatuatua ia Keriso

O faailoga muamua e faatatau i le faatuatua ia Iesu Keriso e oo mai e ala i le faalogologo i le afioga a le Atua—le talalelei a Iesu Keriso. Pe a tuuina mai lena aoaoga ma taliaina e ala i le Agaga Paia, “o le Agaga o le upumoni” (tagai i le MF&F 50:17–22), ua totoina le fatu o le faatuatua ia Keriso. Sa aoao atu e Paulo lenei mea i tagata Roma ina ua faamatala atu e mafai e tagata uma ona maua le meaalofa o le faatuatua: “E tupu le faatuatua i le taulogologo atu, o le taulogologo atu foi o i le afioga a le Atua lea” (Roma 10:17). I ni isi upu, e tupu le faatuatua e ala i le faalogo atu i le savali o lona uiga o le afioga, po o le talalelei, a Keriso.

A o ia faamatalaina le auaunaga a agelu, ua tau mai ai ia i tatou e Mamona o le mamanu lava lea sa i ai e tupu ai le faatuatua e ala i le faalogo i le talalelei:

“Ma o le tiute o la latou auaunaga [a agelu] o le valaau atu lea i tagata ia salamo, ma faataunuu ma faia le galuega o feagaiga a le Tama, ia na ia faia i le fanauga a tagata, e saunia le ala i totonu o le fanauga a tagata, i le tautino atu o le afioga a Keriso i ipu filifilia a le Alii, ina ia latou molimau atu ia te ia.

“Ma o le faia o lea mea, ua saunia ai e le Alii le Atua le ala e mafai ai e le toe vaega o tagata ona latou maua o le faatuatua ia Keriso, ina ia maua e le Agaga Paia se nofoaga i o latou loto, e tusa ma lona mana; ma o le ala lenei o le a faataunuu ai e le Tama, feagaiga na faia i le fanauga a tagata” (Moronae 7:31–32).

I le tofiaina ai e “molimau atu ia te ia,” ua valaauina ai faifeautalai, vaetofia, ma tuuina atu i ai le mana e ala mai i ki ma le pule faaaposetolo. Ma o lea ua faitaulia faatasi ai i latou “o ipu filifilia a le Alii.” I se isi faaupuga, i le avea ai ma avefeau faatagaina a le Alii, e auala atu i a latou aoaoga ma molimau e ala i le mana o le Agaga Paia, o le a faailoa atu ai le faatuatua ia Keriso i agaga o i latou o e faalogo ia i latou.

O le upu tatou te tautino atu, o le upu lea e fausia ai le faatuatua ia Keriso, o le talalelei lea, po o tala fiafia, ia Iesu Keriso. O le ta’u faigofie lava, o tala lelei e faapea o le oti e le o le iuga lea o le olaga ma o lo tatou o ese mai le Atua e le tumau. Ua i ai se tatou Faaola, o Iesu Keriso lea, le Alo paia o le Atua, o Lana Togiola na faatoilalo ai le oti ma seoli ina ia mafai ai e tagata uma ona toetutu ma o i latou uma o e o le a salamo ma papatiso i Lona suafa o le a mafai ona maua se nofoaga i le malo faalelagi o le Atua e faavavau.

E taua le matafaioi o le salamo i le fausiaina o le faatuatua ia Keriso. O le mauaina o le afioga a Keriso o le a fausia ai le faatuatua e manaomia mo le salamo, ma o le taui o le salamo, o le a fafagaina ai le faatuatua lea o le a tuputupu ae. Na tautino mai e Mamona, “Ma ua fetalai mai [Keriso]: Ia outou salamo outou tuluiga uma o le lalolagi, ma o mai ia te au, ma ia papatiso i lou igoa, ma faatuatua mai ia te au, ina ia faaolaina outou” (Moronae 7:34).

Mo se faataitaiga, o se faifeautalai atamai o le a fefautuaai ma tatalo faatasi ma lana soa, ma saili atu i se musumusuga e faatatau i le ala o le salamo e tatau ona mulimulitaia e tagata sailiili taitasi. O le a fuafua ma le talafeagai e faifeautalai a laua aoaoga. O le a la fuafuaina ma le agaga tatalo po o le a se valaaulia po o ni valaaulia e tuuina atu i fesootaiga taitasi ma le tagata sailiili. O le a la fausia a laua lesona e faatatau i le valaaulia, faailoaina o aoaoga faavae ia e manaomia ona malamalama i ai le tagata sailiili ina ia mafai ai ona talia la la’ua valaaulia.

O le a fuafuaina e faifeautalai le auala e aoao atu ai na aoaoga faavae ina ia ausia le tulaga sili ona manino ma le talitonuga mo lena tagata patino. O le a la fuafuaina ni auala e faaaoga ai punaoa uma o loo maua, e aofia ai fesoasoaniga a tagata o le ekalesia, ina ia fesoasoani i tagata sailiili e tausia lana tautinoga e galue e tusa ai ma mataupu faavae po o se poloaiga o loo fesiligia. O lenei ituaiga aoaoga ma molimau faafaifeautalai o le auala lea tatou te fesoasoani e taitai atu ai se tagata sailiili e ala i le faagasologa o le salamo.

O le isi elemene taua o le salamo o le papatiso lea e ala i le faatofuina, lea e amata ai ona tatou tauaveina i o tatou luga le suafa o Keriso. E tele fuaiupu i totonu o tusitusiga paia e faatatau i le “papatisoga o le salamo” po o le “papatiso i le salamo” (tagai i le Galuega 19:4; Alema 5:62; 7:14; Moronae 8:11; MF&F 35:5–6). Ua faailoa mai i nei fasi fuaitau le aoaoga faavae o le papatisoga i le vai o le laasaga mulimuli pe tupito lea i le faagasologa o le salamo. O le lafoaia o agasala, faatasi ai ma la tatou feagaiga o le usiusitai, e faaatoatoa ai lo tatou salamo; o le mea moni, e le maea laasaga o le salamo pe a aunoa ma lena feagaiga. O lena mea ua tatou agavaa ai mo le faamagaloga o agasala e ala i le alofa tunoa o Iesu Keriso e ala i le papatisoga i le Agaga (tagai i le 2 Nifae 31:17). Ma le isi, o le feagaiga o le papatisoga e faatatau lea mo le lumanai faapea foi mo mea ua tuanai: o taimi uma lava tatou te salamo moni ai, ua toe faaaogaina lena feagaiga ma tatou toe agavaa ai foi mo se faamagaloga o agasala.

O le a le faiā o nei sauniga ma feagaiga e faatatau i ai i le fausiaina o le faatuatua? O le faatuatua ia Keriso o se mea taua lea e manaomia e ulu atu ai i feagaiga faalelagi, ae e faaopoopo atu foi ia feagaiga i le faatuatua o se tagata i se auala e le mafai ona ausia. E ala mai i feagaiga, o le a faatagaina ai e le Atua sili o le lagi o Ia lava ina ia noatia ia i tatou taitoatasi (tagai i le MF&F 82:10). Pau lava le mea o lo tatou usitaia o a tatou feagaiga ua osia ma Ia, ae ua noatia o Ia ina ia tuuina mai ia i tatou se nofoaga i Lona malo faatasi ai ma ni feagaiga maualuluga, ma le faaeaga i totonu o lena malo. O Ia o le Atua e i ai le mana uma ma e le mafai ona pepelo. O lea, e mafai ona tatou maua le faatuatua le faatuaoia o le a na Ia faataunuu Lana folafolaga ia i tatou. E ala i a tatou feagaiga ma le Atua, ua mafai ai ona tatou fiafia i se faatuatua ua lava lona malosi ia Keriso e fesoasoani ai ia i tatou i soo se luitau po o tofotofoga, ma le iloaina ua mautinoa lo tatou faaolataga i le faaiuga.

O mea ua ou tauina atu e uiga i le fausiaina o le faatuatua ia Keriso ia i latou o loo aoaoina e faifeautalai e faatatau foi lea ia i tatou uma. E fanau mai i le Agaga lo tatou faatuatua ia Keriso pe a tatou faalogologo i le afioga a le Atua o loo aoao mai e i latou ua tofia o ni Ana auauna, i e ola atoa ma e ua oti. Pe a tatou fausiaina i luga o lena faavae, o le a faamalolosia lo tatou faatuatua e ala i tatalo o le faatuatua lea ua avea ma se vaega o o tatou olaga o aso uma—ma o nisi taimi o se vaega o o tatou olaga faaleitula.

O le faaauau ai pea ona taumamafa fiafia i afioga a Keriso mai totonu o le Tusi a Mamona ma isi tusitusiga paia o le a faaopoopo atu ma faalolotoina ai le faatuatua lea na faavae mai i le upu. O le a fafagaina atili e le salamo ua mauaa i le faatuatua lo tatou faatuatua a o faaatoatoaina le usiusitai. E faafouina e le salamo o tatou lava papatisoga i le vai ma le Agaga ina ia maua ai se faamagaloga o agasala ia na faia e le gata i le taimi a o lei papatiso ae faapea foi i le taimi ua uma ai ona papatiso. O auaunaga faaKeriso i o tatou tuaoi o se vaega taua tele lea o le tausiaina o feagaiga lea e faafaileleina ai le faatuatua ia Keriso. Tatou te iloaina i le aluga o taimi, o faamanuiaga folafolaina mo le usiusitai i le Atua o le mea moni ua iloa i o tatou olaga ma ua faamautuina ma faamalolosia ai lo tatou faatuatua.

O le mea o loo ou faamatalaina atu e oo mai i lenei tulaga o se maualuga o le faatuatua lea e aofia ai le faamautinoaga faaleagaga lea e maua ai ni galuega lelei, aemaise lava o le usiusitai i mataupu faavae ma poloaiga o le talalelei. O se faatuatua moni lea ia Keriso ma le maualuga lea e tatau ona taulai atu i ai a tatou aoaoga o tagata sailiili.

Ae peitai, e i ai se maualuga o le faatuatua e le gata o le a puleaina ai a tatou amioga ae e faamalolosia ai foi i tatou ina ia suia mea o loo i ai nei ma ia faatupuina nisi mea e le mafai ona tutupu. O loo ou talanoa atu e uiga i le faatuatua e le gata i le avea ai ma se mataupu faavae o faatinoga ae o se mataupu faavae foi o le mana. Sa taua e Paulo o le faatuatua lea “na faatoilaloina [ai e perofeta ia] malo, na fai ai amiotonu, na maua ai mea na folafolaina, na pupuni ai gutu o leona, na tineia ai le malosi o le afi, ma sao ai i le mata o le pelu, na faamalosia ai i latou sa vaivai, na avae ai ma fitafita i taua, na tutuli ai au a nuu ese, [ma] na maua mai e fafine o latou tagata oti ina ua toe tu mai” (Eperu 11:33–35). O ni mea ofoofogia ia—ae i se auala e le sili atu nai lo le faatoilaloina o se vaisu malosi tele po o nisi faafitauli e le mafaatusalia i le liua ma le papatisoga.

O le ki i lo tatou mauaina o le mana e ala i le faatuatua o le aoaoina, fesili atu, ma le faatinoina e tusa ai ma le finagalo o le Atua. “Sa fetalai mai Keriso: Afai tou te faatuatua mai ia te au o le a outou maua le mana e fai ai soo se mea e tatau ai ia te au” (Moronae 7:33).

Peitai, sa Ia lapatai mai, “Ma afai tou te ole atu mo se mea ua le tatau ai mo outou, o le a liua mo lo outou tausalaga” (MF&F 88:65).

O le a tuputupu ae ma le matagofie lou lava faatuatua ia Keriso pe a e saili i ai i aso taitasi ina ia iloa ma faia le finagalo o le Atua. O le faatuatua, ua uma ona avea ma se mataupu faavae o le faatinoga ia oe, o le a avea foi ma se mataupu faavae o le mana.