Na oo Mai Lau Tali i le Konafesi

I le 2006 na ou a’oga ai i se vasega o manatu faalelotu i le tupuaga o tagata i se kolisi Katoliko. Na tofi i matou e lo matou faiaoga e faatautaia se suesuega e uiga i se lotu patino ma aoao atu i isi tagata o le vasega. Na ou filifili e fai lau aoaoga i Le Ekalesia a Iesu Keriso o le Au Paia o Aso e Gata Ai—aua, ua 21 tausaga o avea au ma se tagata o le ekalesia. Na ou iloa o se avanoa e le au maua ma ofoofogia lenei e faasoa atu ai ou talitonuga i uo ma paaga e 40.

I le lua masina na ou saunia ai lau aoaoga, na ou tauivi e sue se auala faigofie e aoao ai aoaoga faavae e pele ia te au i se auala e malamalama ai lau vasega. Sa ou le mautinoa po o a vaega e tatau ona ou faia ma pe faapefea foi ona ou faia. Ina ua toe tasi le vaiaso fai lau aoaoga, sa ou le iloa pea le mea e fai. I lou popole tele, na ou tatalo atu ai ma fesili mo le fesoasoani a le Alii.

Na oo mai lau tali i le tulaga o le konafesi aoao, lea na faia i le faaiuga o lena vaiaso. I le konafesi ia Aperila o le 2006, na tuuina mai ai e Peresitene James E. Faust (1920–2007), o le Fesoasoani Lua i le Au Peresitene Sili se lauga, e faaautu “O Le Toefuataiina o Mea Uma.”¹ Na ou lagonaina le Agaga Paia ua faamautinoa mai ia upumoni na faasoa mai e Peresitene Faust—ma o le auala na ia faasoa mai ai—o se mamanu e mafai ona ou mulimulitaia e tuuina atu ai lau aoaoga.

Na ou sii maia se kopi o le lauga mai le Initoneti ina ua maea le konafesi ma faaaogaina o se faavae mo le sauniaina o se ata faasolo e fai ai le aoaoga, lea na ou tuuina atu i le vaiaso na sosoo ai. Na tuuina mai ia te au le 20 minute, ae ona o fesili uma na tuuina mai e lou faiaoga ma tamaiti o le vasega, na oo ai i le 40 minute le aoaoga—o le taimi atoa lava o le vasega.

Ina ua uma lau aoaoga, na tau mai e lo matou faiaoga e le’i faia muamua lava e sana tamaitiiti aoga se aoaoga lelei faapea. Na ia tuuina mai ia te au se togi maualuga ma tau mai pau lava le mafuaaga na ou le maua ai se togi atoatoa i lau aoaoga ona sa ou le faaalia le tulaga laugatasia i le autu.

Na ou faasoa mulimuli ane i le faiaoga le itulau uepi o le Liahona, e mafai ona ia maua ai le lauga a Peresitene Faust ma isi atonu e mafai ona fesoasoani ia te ia. Na ou tuuina foi ia te ia se kopi o le Tusi a Mamona ma fai atu ia te ia e faitau ai, ma valaaulia o ia e talanoa mai ia te au pe a maea.

Na ou faafetai ua ou iloa na uunaia foi e le aoaoga nisi o tamaiti aoga. I le taimi atoa na totoe o le tausaga, sa ou vaaia le faamaoniga o le eseesega na faia e le aoaoga i o latou olaga. O se tasi o i latou na oo lava ina taliaina faifeautalai i lona aiga, lea na tuuina mai ai ia i maua le avanoa sili e faaauau ai la ma talanoaga e uiga i le talalelei a Iesu Keriso.

Ou te faafetai mo le avanoa na ou maua e faasoa atu ai ou talitonuga i au paaga i le vasega. Ae sili atu le taua, ou te faafetai na oo ina ou iloa e tali e le Alii a tatou tatalo faamaoni e ala mai i upu a perofeta ma aposetolo o aso nei.